1918 թւականի Մայիսեան յաղթանակի106-րդ տարեդարձը նշւեց, Հ. Ուս. «Չհարմահալ» միութեան նախաձեռնութեամբ, միութեան «Յովհ. Թումանեան» դահլիճում: Մայիսի 30-ին կազմակերպւած բանախօսական-գեղարւեստական միջոցառման բանախօս էր հրաւիրւել Պատմական գիտութիւնների թեկնածու, Դերենիկ Մելիքեանը:

Հինգշաբթի՝ 30 մայիսի 2024 թւականին, Հայ Համալսարանականների Ընդհանուր միւոթեան նախաձեռնութեամբ միութեան «Նիկոլ Աղբալեան» սրահում տեղի ունեցաւ գեղարւեստական միջոցառում, նւիրւած Մայիս 28-ին:

Հովանաւորութեամբ թեմիս բարեխնամ առաջնորդ Գերշ. Տ. Սեպուհ Ս. Արք. Սարգսեանի, վերսկսւել են մեր Աստւածաշնչական սերտողութիւնների լսարանները Ս. Գրիգոր Լուսաւորիչ, Ս. Սարգիս եւ Սրբոց Թարգմանչաց եկեղեցիներում հետեւեալ ժամանակացուցային կարգով՝

- Սուրբ Գրիգոր Լուսաւորիչ եկեղեցի, ամէն երկուշաբթի երեկոյեան ժամը 6։00-ին:
- Ս. Սարգիս եկեղեցի, ամէն երեքշաբթի առաւօտեան ժամը 10։00-ին:
- Սրբոց Թարգմանչաց եկեղեցի, ամէն չորեքշաբթի երեկոյեան ժամը 6։00-ին:

Լսարանները վարում եւ աստւածաշնչական սերտողութիւնները կատարում է Հոգշ. Տ. Առաքել Աբղ.Գատեհճեանը։

Հրաւիրում ենք մեր ժողովրդի սիրելի զաւակներին, որ ջանան անպայմանօրէն մասնակցել վերոնշեալ լսարաններին Աստծու խօսքով լիցքաւորւելու եւ հաղորդւելու նաեւ մեր հայրերի հաւատքով։

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Հայոց Տօների տօն Մայիսի 28-ի եւ Հայաստանի Առաջին Հանրապետութեան հիմնադրման 106-րդ տարեդարձի առիթով, գեղարւեստական-բանախօսական միջոցառումներ տեղի ունեցան Հ. Մ. «Սիփան» եւ Հ. Մ. «Սարդարապատ» միութիւններում:

Երեքշաբթի, 28 մայիս 2024 թւականին, Ի. Իսլ. յեղափոխութեան հիմնադիր առաջնորդ հանգուցեալ Իմամ Խոմէյնիի մահւան 35-րդ տարելիցի առիթով, Իրանում կրօնական փոքրամասնութիւնների հոգեւոր եւ աշխարհիկ ներկայացուցիչները, իրենց յարգանքի տուրքը մատուցեցին Հանգուցեալի դամբարանում:

Երկուշաբթի, 27 մայիս 2024 թւականին Թեմական խորհրդի հրաւէրով, համատեղ հանդիպում կայացաւ Կրթական խորհրդի եւ թեմիս հայկական դպրոցների հայ տեսուչ-ուհիների եւ փոխտեսուչ-ուհիների հետ:

Կիրակի, 26 մայիս 2024 թւականին, Թեհրանի բոլոր եկեղեցիներում Ս. եւ Անմահ Պատարագի մատուցմամբ, Հանրապետական Մաղթանքի կատարումով եւ Սարդարապատի, Ղարաքիլիսայի եւ Բաշ Ապարանի ճակատամարտերին զոհւած հերոսների հոգիների հոգեհանգստեան կարգով, յիշատակւեց Հայաստանի առաջին հանրապետութեան հիմնադրութեան 106 ամեակը:

Այսու ուրախութեամբ Թեհրանի թեմի մեր սիրելի ժողովրդի զաւակներին յայտնում ենք, որ առաջիկայ հինգշաբթի 30 Մայիս 2024 թւականին, տօնն է Դուլաբի Ս. Յովհաննէս Մկրտիչ մատռանը:

Այս առիթով տեղի է ունենալու Ս. եւ Անմահ պատարագ՝ հինգշաբթի առաւօտեան ժամը 10:00-ին, Դուլաբի գերեզմանատնում:

Ս. Պատարագից յետոյ տեղի է ունենալու Հոգեհանգստեան յատուկ արարողութիւն՝ Դուլաբ գերեզմանատնում թաղւած ննջեցեալների հոգիների խաղաղութեան համար:

Զայս կը հաղորդենք հաւատացեալ ժողովրդին՝ առ ի գիտութիւն:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Ծանօթագրութիւն՝
Մեկնելու համար դիմել Ս. Սարգիս, Ս. Գրիգոր Լուսաւորիչ, Սրբ. Թարգմանչաց եւ Սրբ. Վարդանանց եկեղեցիների գրասենեակներին:

Ուրբաթ, 24 մայիս 2024 թւականի առաւօտեան, Թեհրանի Սուրբ Սարգիս Եկեղեցում Սուրբ եւ Անմահ Պատարագից յետոյ տեղի ունեցաւ յիշատակի արարողութիւն Իրանի Իսլ. Հանրապետութեան Նախագահ այաթօլլահ Սէյէդ Էբրահիմ Ռէյիսիի եւ նրան ուղեկցող պատւիրակութեան նահատակութեան առիթով:

Այսու Թեհրանի թեմի մեր սիրելի ժողովրդի զաւակներին յայտնում ենք, որ կիրակի, 26 Մայիս 2024 թւականի առաւօտեան Թեհրանի մեր բոլոր եկեղեցիներում յընթացս Ս. Պատարագի, տեղի է ունենալու Հանրապետական մաղթանք եւ դրօշի օրհնութիւն Հայաստանի Առաջին Հանրապետութեան հիմնադրութեան 106-րդ տարեդարձի առիթով:

Իսկ յաւարտ Ս. Պատարագի կը կատարւի հոգեհանգստեան յատուկ արարողութիւն Ղարաքիլիսէի, Բաշ Ապարանի, Սարդարապատի եւ այլ վայրերում տեղի ունեցող ճակատամարտերում զոհւած նահատակների հոգու խաղաղութեան համար։

Ս. Սարգիս առաջնորդանիստ մայր եկեղեցում կրօնական արարողութեանց նախագահելու եւ յաւուր պատշաճի քարոզելու է թեմիս առաջնորդ Գերշ. Տ. Սեպուհ Ս. Արք. Սարգսեանը:

Մեր ժողովրդի զաւակներին հրաւիրում ենք ներկայ լինելու կրօնական արարողութեանց եւ հաղորդւելու հայրենիքի ազատութեան համար նահատակւած հայորդիների նահատակութեան խորհուրդով:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ