Այսու Թեհրանի մեր սիրելի ժողովրդին յայտնում ենք, որ գեղեցիկ եւ դաստիարակիչ աւանդութեան համաձայն, կիրակի, դեկտեմբերի 31-ի կէս գիշերւայ ճիշդ ժամը 12:00-ին Նոր տարւայ առիթով՝ մատուցւելու է հանդիսաւոր Ս. եւ Անմահ Պատարագ, Թեհրանի՝ Ս. Սարգիս, Ս. Աստւածածին, Սրբոց Վարդանանց, Սրբոց Թարգմանչաց եւ Ս. Գրիգոր Լուսաւորիչ եկեղեցիներում:

Առ ի տեղեկութիւն՝ մեր սիրելի ժողովրդի զաւակներին, որ Թեհրանի բոլոր եկեղեցիներում ս. պատարագ է մատուցւելու նաեւ երկուշաբթի 1 յունւար 2024 թւականիի առաւօտեան ժամը 10:30-ին:

Արդարեւ մեր հաւատացեալ ժողովրդին կոչ ենք ուղղում, որ ներկայ գտնւեն Ս. Պատարագի եւ սկսւող 2024 Նոր տարւայ առաջին րոպէները անցկացնեն եկեղեցում՝ եւ Աստծու ներկայութեան մէջ, միաժամանակ աղօթելու աշխարհի խաղաղութեան, մեր ժողովրդի, եկեղեցու եւ հայրենիքի յաւերժութեան համար:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Այսու մեր սիրելի հաւատացեալ ժողովրդին յայտնում ենք, որ Ս. Գրիգոր Լուսաւորիչ եկեղեցու օծման 40-ամեակի առիթով բարձր հովանաւորութեանբ թեմիս բարեխնամ առաջնորդ՝ Գերշ. Տ. Սեպուհ Ս. Արք. Սարգսեանի ուրբաթ, դեկտեմբեր 22-ին, 2023թ. Ս. Գրիգոր Լուսաւորիչ եկեղեցում տեղի է ունենալու յոբելեանի նշում հետեւեալ կարգով.

Առաւօտեան ս. եւ անմահ պատարագի մատուցում: Յաւարտ ս. պատարագի ի Տէր հանգչած եկեղեցուս բարերարների եւ սպասաւորների հոգիների խաղաղութեան համար տեղի կունենայ հոգեհանգստեան արարողութիւն:

Տօնի առիթով պատարագելու եւ քարոզելու է Մեծի Տանն Կիլիկիոյ կաթողիկոսութեան միաբան՝ Հոգեշնորհ Տ. Վիգէն վրդ. Տալգլըճեանը.

Նոյն օրը ժամը 17:30-ին, տօնակատարութեան յատուկ միջոցառում՝ գեղարւեստական յայտագրով:

Ս. ԳՐԻԳՈՐ ԼՈՒՍԱՒՈՐԻՉ ԵԿԵՂԵՑՈՒ ԵԿԵՂԵՑԱԿԱՆ ԽՈՐՀՈՒՐԴ

Այսու Թեհրանի մեր հաւատացեալ ժողովրդի զաւակներին յայտնում ենք, որ յառաջիկայ երկուշաբթի 25 դեկտեմբեր 2023-ին, Սրբոյն Ստեփանոսի նախասարկաւագին եւ առաջին մարտիրոսին տօնն է: Այս տօնը մեր թեմում յայտարարւած է որպէս Սարկաւագաց եւ դպրաց դասերի օր:

Արդարեւ այս առիթով, հովանավորութեամբ Թեհրանի Հայոց Թեմի Առաջնորդ Գերշ. Տ. Սեպուհ Ս. Արք. Սարգսեանի, երկուշաբթի 25 դեկտեմբեր 2023-ի առաւօտեան Ս. Մինաս Եկեղեցում մատուցւելու է հանդիսաւոր Ս. եւ անմահ պատարագ:

Պատարագելու եւ քարոզելու է՝ հիւրաբար քաղաքս գտնւող Հոգեշնորհ Տ. Վիգէն Վրդ. Տալգլըճեանը:

Սկիզբ ժամերգութեան ժամը 9:00
Ս. պատարագ ժամը 10:00
Քարոզ ժամը 11:00

Յաւարտ Ս. պատարագի տեղի է ունենալու հոգեհանգստեան յատուկ արարողութիւն ի տէր հանգուցեալ սարկաւագների, դպիրների եւ երգեցիկ խմբերի հանգուցեալ անդամ-անդամուհիների հոգիների խաղաղութեան համար:

Հրաւիրում ենք մեր հաւատացեալ ժողովրդի զաւակներին, ներկայ լինելու Ս. պատարագին, հաղորդւելու համար Ս. Ստեփանոսի նահատակութեան խորհուրդով:

ԴԻՒԱՆ ԱԶԳ. ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Այս օրերին, որոշ անհատներ եւ խմբեր անձնական հաշւեհամարներ ներկայացնելով, հանդէս են եկել յայտարարութիւններով՝ կարիքաւոր ընտանիքներին օժանդակելու նպատակով, նիւթական գանձումներ կատարելու, որոնք որեւէ առընչութիւն չունեն ու հաշւետու չեն Ազգ. Առաջնորդարանին եւ առ այդ համայնքիս անհատների եւ պատասխանատու անձանց բողոքի տեղիք են տւել:

Հարկ ենք համարում նշել, որ Թեմիս կանոնագրութեան համաձայն բարեսիրական բնագաւառում աշխատանքներն ընթանում են Կարիքաւորներին Օժանդակող Մարմնի միջոցով, որն իր առաքելութիւնը, ըստ հիմունքների եւ Թ.Հ.Թ. Թեմական խորհրդի հովանաւորութեան ներքոյ, կանոնաւոր կերպով շարունակում եւ իր ծառայութիւնն է մատուցում Թեմիս կարիքաւոր ընտանիքներին:

Ուստի այլ անւանումների ներքոյ իրականացւող բարեսիրական բոլոր աշխատանքները եւ ներկայացւած անհատական հաշւեհամարները անվաւեր ճանաչելով յայտնում ենք, որ Թեմիս Ազգային Առաջնորդարանը, որեւէ պատասխանատւութիւն չի ստանձնելու հետեւանքների համար:

Յատկանշական է, որ բարեսիրական նպատակով Ձեր նիւթական նւիրատւութիւնները կարող էք փոխանցել հետեւեալ հաշւեհամարին՝

بانک تجارت
شماره کارت 7571-0711-8370-5859
بنام شورای خلیفه گری ارامنه تهران و شمال

Թ.Հ.Թ. ԹԵՄԱԿԱՆ ԽՈՐՀՈՒՐԴ

Դեկտեմբերի սկզբին համաձայն մեր եկեղեցու ծիսական օրացոյցի՝ քրիստոնէական եկեղեցու 4-րդ դարի մեծագոյն սրբերից՝ Ս. Մինասի եւ իր նահատակակից ընկերների՝ Եւգրափոսի եւ Երմոգինէսի յիշատակի օրն է:

Սոյն տօնը համընկնում է նաեւ Վանաքի Ս. Մինաս եկեղեցու անւանակոչութեան տօնին:

Արդարեւ այս առիթով, երկուշաբթի, 11 դեկտեմբեր 2023 թւականին, համանուն եկեղեցում մատուցւեց Ս. եւ Անմահ պատարագ եւ տօնակատարւեց Ս. Մինասի եւ համանուն եկեղեցու անւանակոչութեան տօնը։

Արցախից տեղահանւած մեր հայրենակիցներին աջակցելու նպատակով, Թեհրանի հայոց թեմի Թեմական խորհրդի կողմից կեանքի կոչւած յանձնախումբը երկուշաբթի թւականիս դեկտեմբերի 11-ին, Հայ հասարակական միութեան (Հայ ակումբ) յարկի տակ գումարած իր նիստի ընթացքում, որին ներկայ էին Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը եւ Թ.Հ.Թ. Թեմական խորհրդի ատենապետ ճրտ. Նորայր Արամեանը, համապարփակ գծերով անդրադարձ կատարեց մինչ այժմ կատարւած աշխատանքների մասին:

Կիրակի, 10 դեկտեմբեր 2023 թւականին, Թեմական խորհրդի ատենապետ ճրտպ. Նորայր Արամեանը Ազգ. Առաջնորդարանի դահլիճում հանդիպում ունեցաւ Թեհրանի նահանգի քաղաքների Նահատակների Հիմնարկի (Բոնեադ Շահիդ) ներկայացուցիչներ՝ Քարոզչական բաժնի տնօրէն՝ պրն. Մոհսէնիի եւ Մշակութային հարցերով տեղակալ՝ տկն. Թաբիրէյի հետ: Հանդիպմանը ներկայ էր նաեւ Ազգ. Առաջնորդարանի դիւանապետ՝ պրն. Զօրիկ Կարապետեանը:

Չորեքշաբթի, 6 դեկտեմբեր 2023 թւականի երեկոյեան, Թեմական խորհրդի ատենապետ ճրտպ. Նորայր Արամեանը մասնակցել է Թեհրանի 6-րդ շրջանի քաղաքապետ՝ Սէյեդ Մորթէզա Ռոհանիի հրաւէրով, շրջանի քաղաքապետարանի ժողովասրահում կազմակերպւած խորհրդակցական հանդիպմանը, որտեղ նաեւ ներկայ են եղել պատկան շրջանի մշակութային կենտրոնների պատասխանատուները:

Չորեքշաբթի, 6 դեկտեմբեր 2023 թւականին, Ռուս ուղղափառ եկեղեցու հոգեւոր հովիւ եւ եկեղեցու հաղորդակցութեան բաժնի տնօրէն՝ Դանիալ Գրիգարի Մատրոսաֆը, որը հիւրաբար գտնւում էր Ղոմի Ալմոստաֆայ համալսարանում, պատկան պատասխանատուների ընկերակցութեամբ այցելեց Ս. Սարգիս եկեղեցի եւ Ազգ. Առաջնորդարան: Պատւիրակութեանը դիմաւորեցին Թեմիս Առաջնորդ Գերշ. Տ. Սեպուհ Ս. Արք. Սարգսեանի հրաւէրով Թեհրան գտնւող՝ Հոգեշնորհ Տ. Վիգէն Վրդ. Տալգլըճեանը, Իրանի Իսլ. Խորհրդարանում Իրանահայութեան զոյգ պատգամաւորներ՝ պրն. Ռոբերթ Բեգլարեանը եւ պրն. Արա Շահվերդեանը, Թեմական խորհրդի ատենապետ ճրտպ. Նորայր Արամեանը, Կրօնական խորհրդի ատենապետ Տ․ Մաշտոց քհնյ. Խաչատրեանը եւ ատենադպիրներ՝ Տ․ Գրիգորիս քհնյ. Ներսէսեանսը եւ Տ․ Արիստակէս քհնյ. Շահմիրեանը եւ Ազգ. Առաջնորդարանի դիւանապետ՝ պրն. Զօրիկ Կարապետեանը:

Այսու Թեհրանի մեր հաւատացեալ ժողովրդի զաւակներին յայտնում ենք, որ յառաջիկայ երկուշաբթի 11 դեկտեմբեր 2023-ին, տօնն է Ս. Մինասի: Ս. Մինասի տօնը համընկնում է Վանաքի Ս. Մինաս եկեղեցու անւանակոչութեան տօնին:

Արդարեւ այս առիթով, Ս. Մինաս եկեղեցում, հովանավորութեամբ Թեհրանի Հայոց Թեմի Առաջնորդ Գերշ. Տ. Սեպուհ Ս. Արք. Սարգսեանի, երկուշաբթի 11 դեկտեմբեր 2023-ին, մատուցւելու է հանդիսաւոր Ս. եւ անմահ պատարագ:

Պատարագելու եւ քարոզելու է՝ հիւրաբար քաղաքս գտնւող Հոգեշնորհ Տ. Վիգէն Վրդ. Տալգլըճեանը:

Սկիզբ ժամերգութեան ժամը 9:00-ին
Ս. Պատարագ          ժամը 10:00-ին
Քարոզ                  ժամը 11:00-ին

Մեր ժողովրդի զաւակներին հրաւիրում ենք՝ ներկայ լինելու կրօնական արարողութեան եւ Ս. պատարագին՝ հաղորդւելու համար սուրբի յիշատակով եւ վերաթարմացնելու Քրիստոնէական իրենց հաւատքը:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Ծանօթ: Բոլոր այն հաւատացեալ ուխտաւորները որոնք ուզում են նւիրատւութիւն եւ կամ մատաղ անել, թող բարի լինեն կապ պահել Ս. Մինաս Եկեղեցու Խորհրդի հետ: