Անցան դպրոցական եռանդով լի ամիսները և այն էլ այնպէս արագ կարծես թէ դեռ երէկ էր որ մեր փոքրիկները թիթեռնիկների պէս գոյնզգոյն հագուստներով եռանդուն, աշխոյժ և ուրախ մուտք գործեցին «Ալմաստ և Անդռէ Ահարոնեան» մանկապարտէզ:

Առաջին օրերի յուզմունքը և երկմտանքը  շուտով փոխւեց ուրախ ծիծաղների և ինքնավստահութեան:  Մեր փոքրիկները շատ շուտ հասկացան, թէ իրենց դաստիարակների սիրալից գրկում կը գտնեն նոյնչափ ջերմութիւն և սփոփանք, ինչ հարազատ ընտանիքում և ահա ապացոյցը նրանց վերջին օրւայ յուզւած դէմքերն էր: Նրանք ափսոսանքով թողեցին իրեն հարազատ մանկապարտէզը և իրենց սիրելի դաստիարակներին որտեղ ամիսներ շարունակ ամէն օր ուրախ-ուրախ շտապում էին այնտեղ և մանկական խաղերի, զրոյցների, երգերի և զանազան աշխատանքների ընթացքին սովորում էին իրենց համատարիքների հետ յարաբերւելու և միասին աշխատելու գաղտնիքը: 

Այս տարի Ա.Ա.Ահարոնեան ազգային մանկապարտէզ մուտք են գործել 149 3-ից 5 տարեկան մանուկներ որոնք բաժանւել են 7 խմբակների: Մանկապարտէզի օղակի 4 խմբակների դաստիարակներն էին՝ Անէթ Մուշկանբարեանը, Արմանուշ Բաղդասարեանը , Ռուբինա Շահումեանը , Էռլին Աւետիսեանը, Անի Նարթինեանը, Օլգա Յակոբեանը, Ռիմա Յակոբեանը և Գայիանէ Մինայանը:

Իսկ նախակրթարանի 3 խմբակների ուսուցչուհիներն էին՝ Հերմինէ Նազարբէգեանը, Փօլետ Մուրադխանեանը, Լուսինէ Մահմուդեանը և Ստելլա Նազարեանը:

Երգի և երաժշտութեան ուսուցչուհին էր Արսինէ Յովհաննիսեանը իսկ պարի ու մարզանքի ուսուցչուհին էր Անի Ալլահվերդեանը:

Գրասենեակի աշխատանքների պատասխանատուն էր Ովսաննա Նազարեանը:

Մանկապարտէզի տեսչութեան պարտականութիւնները յանձնարարւել էր Անէթ Բաղդասարեանին:

Մանկապարտէզը լինելով մեր փոքրիկների հասարակական կեանքի մէջ մտնելու առաջին միջավայրը առիթ է ստեղծում նրանց համար ձեռք բերելու հասարակական և կենցաղային հմտութիւններ, նրանց մէջ զարգացնելով՝ ընկերասիրութիւն, համագործակցութիւն և կարգապահութիւն:

Մանկապարտէզների աշխատանքների նպատակն է ապահովել երեխաների  բազմակողմանի աճը: Այսու շաբաթական աշխատանքներին մաս են կազմում զրոյցներ, գծագրութիւն, թւաբանութեան  հասկացութիւնների ուսուցում, նկարչութիւն, ձեռքի աշխատանք, մարզանք, պար, երգ ու երաժշտութիւն:  Իսկ զանազան խաղերի միջոցով նրանց մէջ զարգանում է հասարակական և այլ հմտութիւններ: 

Սեպտեմբերի  26-ին տեղի ունեցաւ 2015-2016 ուսումնական տարեշրջանի տարեմուտը: Այդ օրը երեխաները  մանկապարտէզ այցելեցին իրենց ծնողների հետ:

Յաջորդ օրը երեխաների համար նախատեսւած էր անակնկալներ նաև  նկարչութեան և խաղի կրպակներ:

Սեպտեմբերի  30-ին Թեհրանի Հայոց Թեմի առաջնորդ Տ. Սեպուհ Ս.Արք. Սարգսեանը տարեմուտի առիթով այցելեց Ալմաստ և Անդռէ Ահարոնեան ազգային մանկապարտէզ: Այցելութեան ներկայ էին նաև կրթական խորհրդի ներկայացուցիչները:

Սրբազան հօր յրահանգով դպրոցական տարեմուտի նոր տարւայ և Ս. Զատկական տօների առիթով բոլոր սաները հաղորդութիւն են ստացել Ս.Գրիգոր Լուսաւորիչ եկեղեցում:  Շաբաթական աշխատանքներին զուգընթաց մանկապարտէզում իւրայատուկ կարևորութիւն Է տրւում երեխաների ազգային ու կրօնական դաստիարակութեան  և տօնւում են բոլոր տօները իրենց համապատասխան սովորութիւններով:

Հոկտեմբերի 4-ից մինչև  հոկտեմբերի 7 -ը մանկապարտէզում տօնւեց «Մանուկների շաբաթ»՝ մանուկների համաշխարհային օրւայ առիթով: Առաջին օրը բոլոր երեխաները իրենց  միասնական աշխատանքներով զարդարեցին մանկապարտէզի միջանցքը: Երկրորդ օրը երեխաները ստացան իրենց նւէրները որոնք պատրաստւել էին ուսուցիչների միջոցով: Երրորդ օրը երեխաները մասնակցեցին խնջոյքի  և բակում նախատեսւած աշխոյժ խաղերի: Վերջին օրը ուսուցիչների միջոցով ներկայացւեց «Կլորիկ գաթան» տիկնիկային թատրոնը:

Հոկտեմբերի 7 -ին Հայ մշակոյթի օրը նշւեց մանկապարտէզում և բոլոր երեխաները այդ օրը խորհրդանշող ձեռքիաշխատանքները իրենց հետ տուն տարեցին:

Այս տարի հայ մշակոյթի օրւայ առիթով կրթական խորհրդի կողմից գնահատագրեր յանձնւեց բոլոր ուսուցչուհիներին իրենց բոլորանւէր աշխատանքի համար: 

Նոյենբերին  «Ա»  տառի սովորելու ուրախ առիթով  նախակրթարանի խմբակների   համար կազմակերպւել էր    խնջոյք: Երեխաները ուրախ երգերով, պարերով և խաղերով տօնեցին իրենց առաջին քայլը դէպի այբուբենի աշխարհ:

Մանկապարտէզում տարբեր առիթներով բեմադրւել են տիկնիկային թատրոններ դաստիարակչական նիւթերով:

Դեկտեմբերի 28-ին տեղի ունեցան մանկապարտէզի ձմեռպապի դիմաւորման ներքին հանդիսութիւնները: Երեխաները ուրախ երգերով ու պարերով դիմաւորեցին ձմեռպապին և ստացան իրենց գեղեցիկ կապոցները:

Փետրւարի 14-ին, Տեառնընդառաջի տօնի առիթով մանկապարտէզի բակում վառւեց աւանդական կրակը և երեխաները դաստիարակների օգնութեամբ ցատկեցին կրակի վրայից: Նոյն առիթով  երեխաները ստացել են  ծնողակակ խորհրդի միջոցով պատրաստւած աղանձի կապոցները:

Բուն Բարեկենդան  և Վարդանանք

Փետրւարի    6, 7 և 8-ին  ճոխ տօնակատարութեամբ նշւեց Վարդանանքը և Բուն Բարեկենդանը ծնողների ներկայութեամբ:

Ծրագրի առաջին բաժնում կարճ բացատրութիւններ տրւեցին Վարդանանքի մասին և երեխաները երգեցին Վարդան Զօրավարի երգը ու արտասանեցին օրւան պատշաճ ոտանաւորներ: Ծրագիրը շարունակւեց խաղերով՝ դիմակախաղ, տարբեր հմտութիւններ զարգացնող մանկական  ռիթմիք խաղեր և խաղեր ծնողների մասնակցութեամբ:

Այս տարի, գեղարւեստական բաժնից յետոյ, նախակրթարանի ծնողների համար կազմակերպւել էին այլ խաղեր: Ծնողները իրենց երեխաների հետ միասին բաժանւեցին երեք խմբերի՝ աղցանի, դիմակի և դեսերի պատրաստելու խմբերի:

Այդ հաճելի պահերը վայելելով բոլորը խանդավառւած թողեցին մանկապարտէզը:

Փետրւարի 3-ից մինչև 10-ը կազմակերպւել էր նկարչութեան ցուցահանդէս Վարդանանքի նիւթով:

Ապրիլի  19-ին , տեղի ունեցաւ Ապրիլ 24-ի բիւրաւոր նահատակների յիշատակին նւիրւած ծաղկեմատոյցի ծրագիրը  Ս. Գրիգոր Լուսաւորիչ եկեղեցում: 

Նոյն նիւթով  մանկապարտէզում պատրաստւել էր միասնական աշխատանք:

Համադպրոցական Խաղեր 

Այս տարի առաջին անգամը լինելով համադպրոցական խաղերի մէջ նկատի էր առնւել նաև 3-ից 6 տարեկան մանկապարտէզների երեխաների համար  խաղեր:

«Ա.Ա.Ահարոնեան» ազգային մանկապարտէզը ընդառաջելով կազմակերպիչ յանձնախմբի հրաւէրը 61 սաներով մասնակցեց սոյն խաղերին: Խաղերի փակումը տեղի ունեցաւ մարտի 4-ին և բոլոր մասնակիցներին յանձնւեց գնահատագրեր և շքանշաններ:

Առողջապահական

Կարևորելով երեխաների առողջապահական խնդիրները մանկապարտէզի բոլոր երեխաների ատամները ստուգման են ենթարկւել ատամնաբոյժ Դոկտ. Եստեր Բաղումեանի միջոցով:

Նոյեմբեր ամսին ուսուցիչների միջոցով կատարւեց երեխաների աչքի ծուլութեան (ամբլեօփի) ախտորոշում:   

Ծնողներ և մանկապարտէզ

Ծնողներին մանկապարտէզի աշխատանքներին ծանօթացնելու նպատակով  Նոյեմբեր և յունւար ամիսների  ընթացքին մանկապարտէզի և նախակրթարանի եօթ դասարանների ծնողները առիթ ունեցան այցելել մանկապարտէզ և մասնակցել դասարանային աշխատանքներին ու խաղերին : Ծնողները իրենց երեխաների հետ միասին նաև պատրաստեցին ձեռքի աշխատանքներ:

Կազմակերպւել են նաև դասախօսութիւններ դաստիարակչական նիւթերով:

Ձեռնարկներ

Մանկապարտէզի ծնողական խորհուրդը տարբեր առիթներով կազմակերպել էր հասոյթաբեր ձեռնարկներ որոնք են եղել՝ դաշտահանդէս, ճաշկերոյթ, նորտարւայ բազար , ձմեռպապի դիմաւորում 

Արարատ մարզաւանում,  տարազահանդէս բուն բարեկենդանի առիթով և «Փիցցա Փարթի» Սուքերեան սրահում :

Հ.Մ.Մ. «Նայիրի» Միութեան «Նայիրի» պարախմբի համագործակցութեամբ կազմակերպւել էր գեղարւեստականն ձեռնարկ: Ծրագրի մէջ ներառւած  էր պարեր և մանկապարտէզի արտադասարանային որֆի դասընթացների խմբերի ելոյթները:

Փետրւարի 25 -ին, ծնողների և մանկապարտէզի նւիրատուների մասնկցութեամբ կայացաւ մանկապարտէզի տարեկան ընթրիք-երեկոն, Արարատ մարզաւանի՝ Վաչիկ Ղարաբէգեան սրահում:

Մանկապարտէզի հայրիկների ֆուտբոլի խումբը մասնակցել է «Նւարդ Գուլբենգեան» դպրոցի միջոցով կազմակերպւած ֆուտբոլի մրցութիւններին:

Այս տարի ևս կազմակերպւել են արտադասարանային դասընթացներ երաժշտական խաղերի, լէգօյի և օրֆի բնագաւառներում:

Մայիսի 8-ին,  կազմակերպւել էր շնորհակալական թէյասեղան նախաճաշի հերթապահ և օժանդակ ծնողների համար:

Շրջագայութիւններ

Այս տարի  նախակրթարանի սաները այցելեցին Ֆարամուզ կենտրոնը, այնտեղ երեխաները մասնակցեցին նախատեսւած տարբեր կրպակների աշխատանքներին ինչպիսին էր՝ հեքիաթի,ցեխագործութեան, կենտրոնացման , անտառի և տիկնիկախաղի կրպակները:

Մայիսի 11-ին, կազմակերպւել էր զբօսանք Արարատ մարզաւանում:

Այդ օրը երեխաները վայելեցին գարնանային հաճելի օրը տարբեր խաղերով և ճոխ ուտելիքներով: Երեխաները նաև այցելեցին Ս. Խաչ մատուռը: Բոլոր երեխաները  խանդավառւած թողեցին Արարատ մարզաւանը իրենց հետ տանելով վառ յուշեր :

Մայիսի 15-ին, կապոյտ  , մանուշակագոյն և կանաչ խմբակները այցելեցին Դարաբադի  չորացրած կենդանիների թանգարանը և վայելեցին այնտեղի գարնանային բնութիւնը:

Այլ Աշխատանքներ

 Մանկապարտէզում Մայիս ամսւայ ընթացքին երեխաները ունեցան ցեխագործութեան և ազատ ջրաներկի միասնական աշխատանքներ:

Այս տարի նախակրթարանի սաների համար կազմակերպւեց համակարգչի հետ ծանօթացման աշխատանք:

Մայիսի 2-ին ճոխ խաղերով ու խնջոյքով նախակրթարանի սաները տօնեցին տառերի աւարտը:

Մայիսի 4-ին, համբարձման տօնի առիթով, մանկապարտէզում կազմակերպւել էր խնջոյք և այլ խաղեր: Երեխաների համար պատրաստւել էր ջանգիւլումներ որոնք պարունակում էին ժողովրդական ասացւածքներ և խրատական խօսքեր:

Հանդէսներ

Մանկապարտէզում տարւայ ընթացքին կազմակերպւում են երկու արտաքին հանդէսներ ձմեռային և տարեվերջի հանդէսներ:

Դեկտեմբերի 23, 24 և 25-ին  տեղի ունեցան մանկապարտէզի ձմեռային հանդէսները: 

Հանդէսները  սկսւեցին Ս. Ծնունդի պատկերի ներկայացումով , մանկապարտէզի սաների միջոցով: Առաջին բաժինը շարունակւեց մանկապարտէզի օղակի խմբակների ձմեռային և նորտարւայ նիւթերով ուրախ երգերով ու ոտանաւորներով, իսկ երկրորդ բաժնում նախակրթարանի սաները բեմադրեցին «Նոր տարի, ուրախ տարի» պարային պիեսը:

Մայիսի 22- ից մինչև 31-ը, եօթ գիշերներ տեղի ունեցան մանկապարտզի տարեվերջի հանդէսները որոնք բաղկացած էին երեք բաժիններից:

Մանկապարտէզի Վարդագոյն խմբակը իր հանդէսի առաջին բաժնում  ներկայացրեց երկու պարեր՝ «Մռութիկ» և «Սասնայ պար» և « Բարի նապաստակը» թատրոնը:

Մանուշակագոյն , Կապոյտ և կանաչ  խմբակները իրենց հանդէսի առաջին բաժնում ներկայացրեցին «Պապն ու Շաղգամը» պարային պիեսը: 

Նախակրթարանի Դեղին, Կարմիր և Նարնջագոյն  խմբակները ծրագրի առաջին բաժնում ներկայացրեցին երեք պարեր Զուռբա՝ յունական, Կազաչոկ՝ ռուսական և Զարթօնք՝ հայկական պարերը: Ապա «Հայաստանը մերն է» ոտանաւորների շարանով և ցոյցով աւարտւեց  հանդէսների առաջին բաժինը:

Հանդէսների երկրորդ բաժնում երեխաները բեմ են բարձրացել հարւածային նւագարանների ելոյթով,  որին յաջորդեց խմբական երգերն ու ոտանաւորները:

Նախակրթարանի սաները հանդէսի աւարտին ստացան իրենց հայերէնի վկայականները:

Յունիսի 1-ին, բոլոր երեխաները ստացան իրենց տարեկան աշխատանքների թղթապանակները:  Ծնողական խորհուրդը ևս կազմակերպել էր դաշտահանդէս և երեխաները ուրախ մթնոլորտում հրաժեշտ տւեցին իրենց դաստիարակներին, ընկերներին և հարազատ մանկապարտէզին: Նրանք այժմ թողնում են մանկապարտէզը իրենց հետ տանելով այնպիսի գիտելիքներ և հմտութիւններ որոնք իրենց պիտի առաջնորդեն դէպի նորանոր յաջողութիւններ:

Թող միշտ կանգուն մնան մեր կրթական օջախները յատկապէս մանկապարտէզները որտեղ ձևաւորւում են մեր փոքրիկների անհատական առանձնայատկութիւնները և հիմք է դրւում նրանց  հոգևոր կրօնական և ազգային դաստարակութեան:

Շնորհակալութիւն ենք յայտնում այս աստւածահաճոյ գործին իրենց մասնակցութիւնը ցուցաբերած բոլոր կազմերին՝ դաստիարակներին, ծնողական խորհրդին և  բարերար անհատներին և ծնողներին որոնք իրենց բարոյեական և նիւթական օժանդակութեամբ նեցուկ են հանդիսացել մեզ:

Յոյսով ենք « Ա.Ա.Ահարոնեան » մանկապարտէզը ինչպէս միւս ազգային մանկապարտէզները խրոխտ քայլերով կը շարունակի իր ընթացքը և երկար տարիներ կը ծառայի մեր փոքրիկների դաստիարակութեան գործին:

«Ա.Ա.Ահարոնեան» Ազգային Մանկապարտէզի փոխտեսչութիւն

{gallery}201607/2016071202{/gallery}