Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



ԹԵՀՐԱՆԻ ՈՍՏԻԿԱՆՈՒԹԵԱՆ ԵՒ ԻՐԱՒԱՊԱՀ ՈՒԺԵՐԻ ԳԼԽԱՒՈՐ ՀՐԱՄԱՆԱՏԱՐԻ ԱՅՑԸ ԱԶԳԱՅԻՆ ԱՌԱՋՆՈՐԴԱՐԱՆ

Ամանորեայ եւ Ս. Ծննդեան տօների առիթով, երեքշաբթի, 9 յունւար 2024 թւականին, Ազգային Առաջնորդարան այցելեցին Թեհրանի Ոստիկանութեան եւ Իրաւապահ ուժերի գլխաւոր հրամանատար գեներալ Աբբաս Ալի Մոհամադեանը եւ նրա գլխաւորած պատւիրակութիւնը:

Սոյն հանդիպման գլխաւորութեամբ թեմակալ առաջնորդ գերշ. Տ. Սեպուհ Ս. Արք. Սարգսեանի ներկայ էին Սրբազան Հօր հրաւէրով քաղաքս հիւրաբար գտնւող՝ Հոգեշնորհ Տ. Վիգէն Վրդ. Տալգլըճեանը, 17-րդ շրջանի Պատգամաւորական Ժողովի ատենապետ Սուրիկ Աբնուսեանը եւ ատենադպիր Արտոյտ Զոհրաբեանը, Թեմական խորհրդի ատենապետ ճրտպ. Նորայր Արամեանը եւ նոյն խորհրդի անդամ՝ պրն. Արմէն Նազարեանը, Արժանապատիւ քահանայ հայրեր՝ Տ. Գրիգորիս քհնյ. Ներսէսեանը եւ Տ. Արիստակէս քհնյ. Շահմիրեանը, Իրան-Իրաք Պարտադրեալ Պատերազմի Հայ Նահատակների եւ Անձնուրացների Արժէքների Պահպանման յանձնախմբի ատենապետ եւ անձնուրաց՝ Գուրգէն Քարամեանը եւ Նահատակ Վարդան Աղախանեանի մայրը նաեւ Ազգ. Առաջնորդարանի դիւանապետ՝ Զօրիկ Կրապետեանը:

Սրբազան Հայրը հիւրերին ողջունելով եւ մեծապէս գնահատելով գեներալ Աբբաս Ալի Մոհամադեանի եւ նրան ընկերակցող տարբեր շրջանների հրամկազմի այցելութիւնը Ազգ. Առաջնորդարան, իր ուրախութիւնը յայտնեց քաղաքի անվտանգութիւնը եւ խաղաղութիւնը ապահովող նւիրեալ անձանց ներկայութեան համար:

Առաջնորդ Սրբազանը իր արտայայտութիւնների սկզբում անդրադառնալով վերջին օրերին Քերման քաղաքում տեղի ունեցած անմարդկային ահաբեկչութեանը, որը յանգեցրեց աւելի քան 100 անմեղ քաղաքացու մահւան եւ բազմաթիւ վիրաւորների յայտնեց, որ օրին դատապարտել է անմարդկային արարքը, իսկ նաեւ Էջմիածնի եւ Անթիլիասի երկու կաթողիկոսները ցաւակցել եւ դատապարտել են ահաբեկչական գործողութիւնը: Թեմակալ Առաջնորդը իր խօսքը շարունակելով յայտնեց, որ մէկ րոպէ յոտնկայս լռութեամբ յարգւի ահաբեկչական գործողութեան զոհ գնացած նահատակների յիշատակը: Ընթացքում «Հոգւոց հանգուցելոց» մաղթանքով եւ «Քրիստոս որդի Աստծոյ» աղօթքով յարգեց նահատակաների յիշատակը:

Գեներալ Աբբաս Ալի Մոհամադեանը նաեւ իր հերթին տօնական օրերի առիթով բարեմաղթանքներ փոխանցելուց յետոյ անդրադարձ ունեցաւ հայրենասիրութեան եւ նահատակութեան վեհ կոչմանը եւ յայտնեց, որ իրաւապահ ուժերը իրենց առաքելութեանը հաւատարիմ մնալով պահպանում են ապահովութիւնը եւ նահատակւում ի խնդիր երկրի անվտանգութեան: Նա անդրադարձաւ նաեւ Յեղափոխութեան տարիներին եւ Իրան-Իրաք պարտադրեալ պատերազմի ընթացքում հայ նահատակների եւ անձնուրացների քաջագործութիւններին, որոնք Իրանեան հայրենիքի հողային ամբողջականութիւնը իրենց նպատակակէտը դարձնելով, առաջնագծում յայտնւելով սխրանքներ են գործել ու իրենց կեանքն ու առողջութիւնն են զոհել ի խնդիր իրենց հայրենակիցների անվտանգութեան եւ երկրի պաշտպանութեան: Գեներալ Մոհամադեանը իր խօսքը շարունակելով յայտնեց, որ իրաւապահ ուժերի աշխատանքը նմանում է արեւի լոյսին, որը ճառագայթում է բոլոր ժողովրդի համար, ովքեր ապրում են Իրանում ի մասնաւորի հայ ժողովրդի համար, որոնք երկար պատմութեան ընթացքում, որպէս իրանցիներ ապրել եւ իրենց ներդրում են ունեցել տարբեր բնագաւառներում:

Քաղաքական եւ կրօնական բաժնի պետ Հոջաթոլիսման Մովահեդեանը նաեւ իր հերթին Նոր տարւայ եւ Ս. Ծննդեան տօների առիթով իր բարեմաղթանքները յայտնելով լուսարձակի տակ առաւ Ղուռանի այն բաժինները, որտեղ մեծարանքով եւ յարգանքով են յիշւել Յիսուս Քրիստոսի եւ Ս. Մարիամ Աստւածածնի անունները: Նա յաւելեց, որ Քրիստոսը Աստծու ընտրեալ մարգարէներից է եւ մենք հաւատացած ենք որ Քրիստոսի ծնունդը նմանում է Ադամի ծննդեան: Նա յոյս յայտնեց, որ բոլորս կարողանանք մարգարէների հաւաստի ճանապարհորդները լինենք եւ նոյն ուղղութեամբ մեր կեանքի ճանապարհը շարունակենք:

Թեմական խորհրդի ատենապետ ճրտպ. Նորայր Արամեանը իր ելոյթի ընթացքին դատապարտեց ահաբեկչական անմարդկային վերաբերմունքը, նաեւ երախտագիտութեան եւ շնորհակալութեան խօսք ուղղեց կրօնական արարողութիւնների եւ տօնակատարութիւնների անվտանգութեան ապահովման հարցում իրաւապահ ուժերի արժէքաւոր ու շարունակական համագործակցութեան կապակցութեամբ:

Վերջում Սրբազան Հայրը յատուկ անդրադարձ ունեցաւ նահատակ գեներալ Ղասէմ Սոլէյմանիի նկատմամբ համայն հայութեան սիրոյ եւ յարգանքի փաստին եւ նշեց, որ գեներալը կարեւոր դեր է ունեցել տարածաշրջանում ահաբեկիչների հետ պայքարում, յատկապէս Հալէպի հայ համայնքի անվտանգութիւնը ապահովելու գործում: Նա յաւելեց, որ հարկ է երկու միաստւածեան կրօնները միշտ միասին լինեն եւ պայքարեն ապականութեան դէմ, պայքարեն յանուն արդարութեան, խաղաղութեան եւ Աստւածային ճշմարտութիւնները մեր կեանքում արտայայտման համար: Նա մէկ անգամ եւս յատուկ գնահատանք եւ շնորհակալութիւն յայտնեց իրաւապահ ուժերին, որոնք աչալուրջ կերպով հսկում են Թեհրանի եւ ընդհանրապէս շրջապատի խաղաղութիւնը, անդորրութիւնը եւ ապահովութիւնը եւ աղօթեց, որ Աստւած պահի եւ պահպանի Իրանը՝ իր Հոգեւոր Առաջնորդով, պետութեամբ եւ մանաւանդ երկրի սահմանները ապահովող բանակով եւ եւ իրաւապահ ուժերով:

Հանդիպման աւարտին յուշանւէրներ եւ գնահատագրեր փոխանակւեցին կողմերի միջեւ, որից յետոյ այցելուները Հայոց Ցեղասպանութեան նահատակների յուշարձանի մօտ իրենց յարգանքը մատուցեցին զոհերի յիշատակին եւ այցելեցին Սուրբ Սարգիս եկեղեցի:

Ազգային Առաջնորդարանի Հանրային կապ

ՏՕՆԵՐ

Կրօնական Տօների Օրացոյց


Կիրակի 28 Ապրիլի 2024;
Սուրբ Խաչի Երեւման Տօն

Հինգշաբթի 09 Մայիսի 2024;
Համբարձման Տօն

Կիրակի 12 Մայիսի 2024;
Երկրորդ Ծաղկազարդ

ԸՆԹԵՐՑՈՒՄՆԵՐ

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ