«Ֆարս» լրատւական կենտրոնի լրատւութեան համաձայն՝ վերանորոգման է ենթարկւում Մաշհադ քաղաքի միակ հայկական եկեղեցի Ս. Մեսրոպը, որը կառուցւել է 1941 թւականին:

Այդ մասին յայտարարել է Մաշհադ քաղաքի Մշակութային ժառանգութեան կայքէջի տնօրէն Վաֆա Սաբեթին: Նրա հաւաստմամբ եօթ տարի է, ինչ եկեղեցին գրանցւել է երկրի ազգային կոթողների ցանկում, սակայն մինչ օրս վերանորոգման հարցով լուրջ աշխատանքներ չեն իրականացւել: 

Լուրի մանրամասնութիւններին տեղեկանալու նպատակով «Ալիք»-ը հեռախօսազրոյց է ունեցել Իրանի մշակութային ժառանգութեան կազմակերպութեան Իրանի  եկեղեցիների կենտրոնի տնօրէն Շեռլի Աւետեանի հետ ով մեզ հետ զրոյցում անդրադառնալով վերանորոգման աշխատանքներին նշեց. «Իրանի զբօսաշրջութեան կազմակերպութիւնը երկրում զբօսաշրջութիւնը զարգացնելու նպատակով, գումարներ է յատկացնում պատմական կոթողների վերանորոգման աշխատանքներին: Իրանի մշակութային ժառանգութիւնների կազմակերպութեան կողմից մի քանի ամիս է, որ բացի ԻՒՆԵՍԿՕ-ում գրանցւած եկեղեցիներին, պետական բիւջէ է յատկացւել նաեւ  մի շարք պատմական եկեղեցիների վերանորոգման աշխատանքներին: Այդ թւում է  Մաշհադի  Ս. Աստւածածին եկեղեցին, (նշեմ, որ Ս. Մեսրոպը վերաօծւել է Ս. Աստւածածին անւամբ): Եկեղեցին տարիներ, մասամբ, ինչ որ չափով  վերանորոգւում էր համայնքի բարերար Ալֆրէդ Հաւանի վերահսկողութեամբ, սակայն տարիներ է,  ինչ հիմնական վերանորոգումներ չեն իրականացւել, ուստի  յատկացում կատարւեց այդ եկեղեցուն: Յատկացւած բիւջէն շուրջ 120 միլիոն թուման է, որը թէեւ աշխատանքների համեմատութեամբ շատ էլ մեծ գումար չէ, սակայն նախնական աշխատանքերը կը սկսւեն: Օրեր առաջ կազմակերպութեան պատասխանատու մասնագէտների եւ Ալֆրէդ Հաւանի հետ շրջեցինք եկեղեցու տարածքում եւ արդէն մշակւել են առաջնահերթութիւն վայելող աշխատանքների գրաֆիկան: Հիմնականում  անհրաժեշտ է նախ վերանորոգել եկեղեցու տանիքի  փայտեայ եւ թիթեղեայ ծածկը, բարեփոխել ու բարեկարգել յատակը եւ բակի թէ՛ յատակը, եւ թէ՛ արտաքին պատերը, նաեւ իրականացնել խոնաւազերծման աշխատանքներ,  վերանորոգել եկեղեցուն կից մի քանի սենեակներ եւս, որոնք ժամանակին օգտագործւել են, որպէս գրադարան եւ նմանօրինակ աշխատանքներ: Այդ սենեակները վերանորոգելուց յետոյ կարելի է օգտագործել, որպէս ցուցասրահ կամ թանգարան եւ զբօսաշրջիկներին ծանօթացնել իրանահայ համայնքի պատմական անցեալին:

Ըստ կազմակերպութեան մասնագէտների՝ այս տարածքը զբօսաշրջիկների ուշադրութեան կենտրոնում է եւ հիմնականում այն կարելի է օգտագործել զբօսաշրջիկների այցելութեան համար: Առաջիկայ երկու-երեք ամիսների ընթացքում կը կատարւեն այն ամէնը, ինչի մասին զեկուցեցի եւ խոստացել են վեց ամսեայ կտրւածքի սահմաններում պետական բիւջէի յատկացումը, մինչեւ աշխատանքների աւարտը»:

Լուրը քաղւած է «Ալիք»-ից