Երեքշաբթի, օգոստոսի 30-ին Թեհրանի Ս. Սարգիս եւ Ս. Մինաս եկեղեցիներում՝ Տ. Արիստակէս քհնյ. Շահմիրեանի ձեռամբ տեղի ունեցաւ Իրանի 53-րդ համահայկական խաղերի ջահերից երկուսի բոցավառման արարողութիւնը։

Պատւիրակութեան ուղեկցութեամբ երկու եկեղեցիներ են մուտք գործել Իրանի 53-րդ համահայկական խաղերի երկու ջահեր վետերան ֆուտբոլիստներ Համբարձում Դարաբիդեանի եւ Կոնստանդ Յարութիւնեանի միջոցով:

Իսկ Չորեքշաբթի, օգոստոսի 31-ի առաւօտեան Տ. Խաչատուր քհնյ. Յարութիւնեանի, Տ. Սարգիս քհնյ. Խոսրովեանի եւ Տ. Վրթանէս քհնյ. Բաբախանեանի ձեռամբ Թեհրանի Ս. Թարգմանչաց եկեղեցում տեղի ունեցաւ յիշեալ խաղերի 3-րդ ջահի օրհնութեան արարողութիւնը:

Ջահակիր Մարգար Ներսիսեանի եւ ուղեկցող պատւիրակութեան միջոցով Իրանի 53-րդ համահայկական խաղերի 3-րդ ջահն մուտք է գործել Ս. Թարգմանչաց եկեղեցի, այնուհետեւ կատարւել է օրհնութիւն:

Ուրբաթ սեպտեմբերի 2-ին նաեւ, Թեհրանի Ս. Գրիգոր Lուսաւորիչ եկեղեցում Տ. Գրիգորիս քհնյ. Ներսիսեանի եւ Տ. Մեսրոպ քհնյ. Ռաթէոսեանի ձեռամբ կօրհնւի Իրանի 53-րդ Համահայկական խաղերի 4-րդ ջահը, ջահակիր՝ Յովիկ Հաթամզադէի միջոցով:

Իրանի 53-րդ համահայկական խաղերի բոլոր 4 ջահերը բոցավառելուց յետոյ, փոխանցւելու են Ս. Խաչ մատուռ, որոնց միջոցով վառւելու խաղերի հիմնական՝ մեծ ջահը:

Այս տարի խաղերը նւիրւած են «Արարատ»-ի ֆուտբոլի 66-ամեակին։

Ջահերի օրհնութեան արարողութիւններին ներկայ են եղել Հ.Մ.Ա.Կ.-ի Կենտրոնական վարչութեան, Մարզական միութեան վարչութեան եւ Համահայկական խաղերի գործադիր յանձնախմբի անդամները:

Լուրը՝ «ԱԼԻՔ»-ից
Լուսանկարները՝ Հատիսի