Sunday, 19 March 2023
Դատաւորի կիրակի (Մեծ պահքի հինգերորդ կիրակի)
Մեծ պահքի հինգերորդ կիրակին ունի արարչութեան հինգերորդ օրւայ ու այս կեանքի հինգերորդ դարի խորհուրդը և կոչւում է «Դատաւորի կիրակի»: Այս անունը նոյնպէս վերցւած է այդ օրն ընթերցւող Ճաշու Աւետարանից: Ըստ եկեղեցու հայրերի մեկնաբանութեամբ պատմւում է, որ Աստւած՝ Արդար Դատաւորը, ամբողջ մարդկային բնութեան մէջ, հաստատել է մարդկային միտքը, որ պիտի համադրի մարմնի եւ դրա զգայարանների ու հոգու հաղորդակցութիւնը։ Երբ մարդկային մարմինը ոտնահարում է Աստծու օրէնքը եւ կատարում է իր ցանկութիւնը ու մարդուն դէպի մեղք է առաջնորդում, հոգին մտքին է բողոքում ու երբ պատասխան չի ստանում, աղօթքով դիմում է Արդար դատաւորին։ Այս թեմայի շուրջ Պօղոս առաքեալը հռոմէացիներին գրւած նամակի եօթերորդ գլխում տեսնում ենք, որ նա ուսուցանում է երբ մարմնի անդամների մէջ դրւած օրէնքը հակադրւում է Աստծու օրէնքին, պիտի դիմել Քրիստոսին, որը իր շնորհներով կը կարողանայ ազատել մեզ այդ խղճալի վիճակից։
Այս առակը նաեւ յորդորում է յարատեւ աղօթել եւ չձանձրանալ։ Մեր Տէր Յիսուս Քրիստոսը անգամներ ուսուցանել է, որ անդադար պիտի աղօթենք, որպէսզի գայթակղութեան մէջ չընկնենք, ու պատրաստ լինենք վերջին օրը, Նրա ատեանի առջեւ կանգնելու համար։ Յիսուսը նաեւ ուսուցանում է մեզ թէ մեր աղօթքը պիտի լինի խոնարհութեամբ ու մեղքերի խոստովանութեամբ։ Եսայիա մարգարէի գրքում Աստւած ասում է, որ մարդու աղօթքը իրեն չհասնելու պատճառը նրա մեղքն է։ Առաքեալը եւս հետեւելով Տէրունի խօսքին, հաւատացեալներին քաջալերում է ամէն տեղ սուրբ ձեռքերով եւ բարի խղճմտանքից աղօթք բարձրացնենք Աստծուն։ Յակոբոս Տեառնաեղբայրը եւս Յիսուսի այս խօսքին վստահելով թէ «Խնդրեցէք եւ պիտի տրւի ձեզ» յորդորու մ է վստահութեամբ խնդրել Աստծուն։
Յիսուսը ասում է․«Եթէ հաւատքով, խնդրէք Հօրից, Նրա անունով կտայ խնդրողին։»