Կիրակի, 24 դեկտեմբեր 2023 թւականին, Թեհրան նահանգի քաղաքների Նահատակների Հիմնարկի (Բոնեադ Շահիդ) տնօրէն՝ Աբասալիէ Ռէզայի հրաւէրով, Թեմական խորհրդի ատենապետ ճրտպ. Նորայր Արամեանը ընկերակցութեամբ Ազգ. Առաջնորդարանի դիւանապետ Զօրիկ Կարապետեանի մասնակցել է յիշեալ Հիմնարկի կենտրոնում կազմակերպւած հանդիպմանը, որտեղ նաեւ ներկայ են եղել Ի. Իսլ. Խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը եւ Իրանում կրօնական փոքրամասնութիւնների ներկայացուցիչները:

Հանդիպումը հիմնականում առնչւած է եղել Իսլ. յեղափոխութեան յաղթանակի 45-րդ տարեդարձը մեծարելու ծրագրերի շարանում կրօնական փոքրամասնութիւնների նահատակների յիշատակին կազմակերպւող յարգանքի միջոցառմանը, որն այս տարի նախատեսւել է այն կազմակերպել Նոր Բուրաստան գերեզմանատան նահատակների բաժնում:

Հանդիպման ընթացքում խորհրդակցութիւն է տեղի ունեցել կազմակերպչական աշխատանքների եւ միջոցառումը լաւագոյն կերպով կազմակերպելու վերաբերեալ:

Հարկ է նշել, որ յիշեալ ծրագիրն ամէն տարի կայանում է կրօնական փոքրամասնութիւններից մէկի գերեզմանատան նահատակների բաժնում:

Ազգային Առաջնորդարանի Հանրային կապ