Երէկ՝ սեպտեմբերի 19-ի կէսօրին Ադրբեջանը լայնածաւալ ռազմական գործողութիւններ է սկսել Արցախի սահմանագծի ողջ երկայնքով՝ յատկապէս թիրախաւորելով խաղաղ բնակչութեանը:

Արցախի եւ ողջ հայութեան համար այս ճակատագրական իրողութիւններով մտահոգ, երէկ անմիջապէս պատերազմի սկսելուց ընդամէնը ժամեր անց, Թեհրանի հայոց թեմի առաջնորդ Տ. Սեպուհ արք. Սարգսեանը եւ «ԱԼԻՔ» հաստատութեան ներկայացուցիչ Սեւան Դանիէլեանը մեծ դժւարութեամբ հեռախօսակապ են հաստատել Արցախի նախկին նախագահ Բակօ Սահակեանի եւ Արցախի Ազգային ժողովի նախագահ Դաւիթ Իշխանեանի հետ:

Զրուցակիցները Արցախից ներկայացրել են պատերազմական ցաւալի իրավիճակը եւ անակնկալի եկած պայմաններում հապճեպ նախաձեռնւող քայլերը:

Թեհրանի հայոց թեմի առաջնորդը իր եւ իրանահայ ողջ համայնքի զօրակցութիւնն է յայտնել նշելով, որ ինչպէս միշտ Արցախ սրբավայրը եղել եւ մնում է հայոց պահպանիչ դարբնոց եւ ողջ մեր ներուժը դնելու ենք օգնութեան հասնելու մեր հարազատ արցախցիներին, որոնց հզօր կամքն ու պայքարը բոլորիս համար սրբազան պայքարի վառ խորհրդանիշ է:

Սեւան Դանիէլեանը մեզ հետ զրոյցում նշեց, որ այս պահին պէտք է անյապաղ ձեռնարկել վճռորոշ քայլեր, որպէսզի հոգեբանական զօրակցութիւնից բացի, որպէս բարեկամ եւ ամենամօտ երկրի հայ համայնք կարողանանք Իրանի կառավարութեան բարձրաստիճան ղեկավարութեան, ինչպէս նաեւ Իրանի Իսլ. խորհրդարանի պատգամաւորների հետ ելքեր գտնել դադարեցնելու արիւնահեղութիւնը Արցախում, եւ որ ամենակարեւորն է արցախցիների՝ իրենց հողում ապրելու եւ արարելու արդար իրաւունքի հարցը լսելի դարձնել քաղաքական այրերին:

«ԱԼԻՔ» հաստատութեան ներկայացուցիչը տեղեկացրեց նաեւ, որ այսօր հրատապ կարգով ազգային առաջնորդարանում տեղի կունենայ հանդիպում՝ բոլոր կառոյցների ներկայացուցիչների հետ, որպէսզի քննարկեն Արցախում ստեղծւած իրավիճակին հնարաւոր եղանակներով աջակցելու հարցերը:

Նա նշեց, որ ինքը եւս իր հերթին Արցախի ներկայացուցիչներին վստահեցրել է, որ ամէն ինչ անելու են Արցախի հզօր ժողովրդին աջակցելու համար:

Լուրը՝ «Ալիք»-ից