Շաբաթ, 3 փետրւար 2024 թւականին, Թեմիս Առաջնորդ Գերշ. Տ. Սեպուհ Ս. Արք. Սարգսեանը իր գրասենեակում ընդունեց Սրբ. Վարդանանց եկեղեցու խորհրդի ներկայացուցիչներին, ովքեր եկել էին Սրբազան Հօր հովանաւորութիւնը եւ օրհնութիւնը խնդրելու Սրբ. Վարդանանց տօնին եկեղեցու անւանակոչութեան տօնակատարութեան կապակցութեամբ:
Սրբազան Հայրն իր գոհունակութիւնը յայտնելով, անհրաժեշտ թելադրութիւնները կատարեց, գնահատեց եկեղեցական խորհրդին եւ քաջալերելով խորհրդի համագործակցութիւնը քաղաքամասի միութիւնների հետ, յաջողութիւն մաղթեց նրանց աշխատանքներին:
Նոյն օրը Թեմիս Առաջնորդն իր գրասենեակում ընդունեց, Լիբանանահայ գործարար՝ պրն. Մանւէլ Բէգարեանին, ով եկել էր Նոր Տարւայ եւ Ս. Ծննդեան տօների առիթով իր շնորհաւորանքները եւ բարեմաղթանքները փոխանցելու Սրբազանին:
Պրն. Բէգարեանը իր ուրախութիւնը յայտնեց նաեւ Սրբազան Հօր առողջութեան ու ապաքինման կապակցութեամբ:
Սրբազան Հայրը ջերմօրէն ողջունեց եւ իր գոհունակութիւնը յայտնեց պրն. Բէգարեանի քաղաքավարական այցի համար եւ փոխադարձ շնորհաւորանքները փոխանցեց տօնական օրերի առթիւ:
Հանդիպումն առիթ եղաւ խօսելու երկուստեք հետաքրքրող հարցերի մասին: Նշելի է, որ պրն. Բէգարեանը երկար տարիներ ի վեր բնակւում է Թեհրանում:
Ազգային Առաջնորդարանի Հանրային կապ