Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



ԹԵՀՐԱՆԻ ԵԿԵՂԵՑԻՆԵՐՈՒՄ ԸՆԹԵՐՑՒԵՑ Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻ ՊԱՏԳԱՄԸ ՆՒԻՐՒԱԾ «ՍՓԻՒՌՔԻ ՏԱՐՒԱՆ»

 

Կիրակի թւականիս յունւարի 23-ին, Թեհրանի բոլոր եկեղեցիներում ի բացառեալ Ս. Գէորգ եկեղեցու յընթացս Սուրբ եւ Անմահ Պատարագի յատուկ հանդիսաւորութեամբ ընթերցւեց Ն.Ս.Օ.Տ.Տ. Արամ Ա. Կաթողիկոսի պատգամը, որով Վեհափառ Հայրապետը 2022 տարին անւանակոչում է «ՍՓԻՒՌՔԻ ՏԱՐԻ»։

Սուրբ Սարգիս եկեղեցում Հայրապետական հռչակագիրն ընթերցեց Թեմիս Առաջնորդ Գերշ. Տ. Սեպուհ Ս. Արք. Սարգսեանը։

Վեհափառ Հայրապետը պատգամի առաջին բաժնում, անդրադառնալով սփիւռքի ձեւաւորմանը նշել է, որ հայերի արտագաղթը Հայաստանից յաճախ եղել է պարտադրաբար եւ լայնատարած Սփիւռքի գոյաւորումը ունի իր պատմական պատճառները, իսկ քաղաքական ու ապահովական ազդակների կողքին, տնտեսական պատճառները նաեւ հայերին մղել են արտագաղթի եւ ընդգծել, որ հայերը այնտեղ, որտեղ հաստատւել են, փորձել են ազգային, հոգեւոր, կրթական եւ այլ կառոյցներով համայնք կազմել եւ իրենց ազգային ինքնութիւնը, լեզուն, հաւատքը եւ աւանդոյթները պահպանելու համար գերագոյն ճիգ են թափել։

Ապա անդրադարձել է Սփիւռքի մտահոգութիւններին ու մարտահրաւէրներին եւ նկարագրել մի շարք կարեւոր երեւոյթներ ընդգծելով, որ Հայաստանի սահմաններում իբրեւ հայ գոյատեւելը բնական երեւոյթ է իսկ Սփիւռքի մէջ հայ մնալը՝ նախընտրութեան հարց է եւ, հետեւաբար՝ ամենօրեայ տագնապ ու պայքար, ինչը այսօր աւելի է բարդացել քանի որ փաստօրէն հայապահպանման գործիքները եւ չափանիշերը արդէն իսկ չեն համապատասխանում ներկայ աշխարհի պայմաններին եւ նոր սերնդի մօտեցումներին եւ սպասումներին, հետեւաբար նոր սերունդն սկսել է հեռանալ մեր կառոյցներից եւ դարեր ի վեր զոհողութեամբ պահպանւած մեր արժէքներից եւ աւանդութիւններից: Ակնյայտ է, որ Սփիւռքն ունի մշակութային, հոգեւոր, տնտեսական, մասնագիտական, յարաբերական եւ փորձառական հսկայ ներուժ։ Սակայն, մի տեղում համակերպումը եւ տեղայնացումը, մի ուրիշ տեղում՝ անտարբերութիւնը եւ անտեսումը սկսել են հայ կեանքից հեռացնել իր սեփական ներուժին։

Կարեւորելով եւ շեշտաւորելով Սփիւռքի վերակազմակերպման մարզերի եւ գործընթացին մասին, Վեհափառ Հայրապետը նշել է, որ մատնանշւած մտահոգութիւններն ու մարտահրաւէրները կարօտ են խոր, իրատես ու համապարփակ քննարկման եւ ընդգծել, որ աւելի քան երեսուն տարի Հայաստանը եւ Արցախը դարձան Սփիւռքի կեանքի կիզակէտը եւ անկասկած, հայ ազգի այս երկու բեւեռները իրենց խնդիրներով եւ հրամայականներով Սփիւռքի համար միշտ մնալու են առաջնահերթութիւն եւ յաւելել, որ Սփիւռքը ինքնավախճան իրականութիւն չէ. այն իր տեսլականը պիտի միշտ սեւեռած պահի Հայաստանի ուղղութեամբ, որը ողնասիւնն է հանդիսանում հայ ազգի ներկայի եւ երաշխիքը՝ դրա ապագայի։

Հետեւաբար այս խոր գիտակցութեամբ, Սփիւռքը կոչւած է ինք իրեն վերակազմակերպելու նկատի ունենալով նաեւ, որ այսօր մեր ազգի մեծամասնութիւնը ապրում է Սփիւռքում։ Հետեւաբար ժամանակն է, որ մեր ազգի պատմութեան այս փուլում, ինքնակազմակերպումը լինի Սփիւռքի առաջնահերթութիւնը։

Վեհափառ հայրապետն իր հռչակագիրը եզրափակել է ասելով. Հաւատարիմ իր անցեալին, հայ ժողովուրդը կոչւած է ինքզինք յարատեւօրէն վերարժեւորման եւ վերանորոգման ենթարկելու՝ համահունչ փոփոխւող ժամանակներին, պայմաններին եւ մարտահրաւէրներին։ Ա՛յս տեսլականով եւ յանձնառութեամբ Սփիւռքը պիտի վերակազմակերպի եւ վերաշնչաւորի ինք իրեն։ Սփիւռքը իր ներկայ վիճակին թողնել, նշանակում է դրա ինքնամաշումը արագացնել։ Սփիւռքի վերակազմակերպումը՝ դրա հզօրացումն է, իսկ Սփիւռքի հզօրացումը Հայաստանի եւ Արցախի հզօրացումն է. եւ այս համազգային առաջնահերթութիւն է եւ մարտահրաւէր։ Հարկ է անյապաղ լծւել աշխատանքի:

Ազգային Առաջնորդարանի Հանրային Կապ

 

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ