Ուրբաթ, 24 յունւար 2025 թւականին, Թեհրանի հայոց թեմի բոլոր եկեղեցիներում, կիրակնօրեայ Ս. եւ Անմահ Պատարագի ընթացքում, յատուկ հանդիսաւորութեամբ ընթերցւեց Մեծի Տանն Կիլիկիոյ Կաթողիկոսութեան Ն.Ս.Օ.Տ.Տ. Արամ Ա. Վեհափառ Հայրապետի Հռչակագիրը՝ 2025 թւականը «Աւանդութիւնների Վերակենսաւորման տարի» հռչակելու կապակցութեամբ:

Սուրբ Սարգիս եկեղեցում Հայրապետական Հռչակագիրն ընթերցեց Հոգշ. Տ. Առաքել Աբղ. Գատեհճեանը:

Վեհափառ Հայրապետը Հռչակագրում՝ ԳՈՐԾՆԱԿԱՆ ԹԵԼԱԴՐՈՒԹԻՒՆՆԵՐԻ անւան տակ ընդգծել է հետեւեալ կէտերը՝

1) Աւանդութեան կարեւորութիւնը շեշտող յօդւածներ գրւեն հոգեւոր հայրերի ու մտաւորականների կողմից:
2) Մատչելի եւ դաստիարակչական մօտեցումով յատուկ գրքոյկներ պատրաստւեն՝ աւանդութիւնների ծնունդը, հոլովոյթն ու նպատակը պարզող:
3) Հոգեւոր հայրեր, թէ՛ իրենց քարոզների եւ թէ՛ ընտանիքներին տւած այցելութիւնների ընթացքում, յիշեցնեն մեր աւանդութիւնների ներկայացրած իւրայատո՛ւկ կարեւորութիւնը:
4) Մեր կառոյցները, յատկապէս տիկնանց միութիւնները, ժողովրդային յատուկ հաւաքներ կազմակերպեն՝ աւանդութիւններ բացատրող եւ նրանց դերն ու այժմէականութիւնը պարզող:

Վեհափառ Հայրապետը վերջում մատնանշել է.-«Վստահ ենք, որ յիշեալ գործնական քայլերը մեր զաւակներին կը մղեն վերականգնելու, վերարժեւորելու ու վերակենսաւորելու մեր այնքա՜ն գեղեցիկ եւ իմաստալից աւանդութիւնները ներկայ ժամանակների լոյսի տակ»:

Եկեղեցիներում արարողութեանը եւ Հռչակագրի ընթերցմանը ներկայ էին Թեմական խորհրդի եւ Ազգային մարմինների ներկայացուցիչները եւ հաւատացեալ ժողովուրդ:

Ազգային Առաջնորդարանի Հանրային կապ