Ի հետեւումն թւականիս ապրիլի 26-ին, Հ.Մ.Մ. «Րաֆֆի» Համալիրի յարկի ներքոյ կազմակերպւած Հայոց Ցեղասպանութեան 109-րդ տարելիցին նւիրւած ծրագրին՝ Թեմիս Առաջնորդ Գերշ. Տ. Սեպուհ Ս. Արք. Սարգսեանի կողմից ձեռնարկին ներկայ Հոգեշնորհ Տ. Առաքել աբեղայ Գատեհճեանի դիմաց ցուցաբերւած անարգալից վերաբերմունքի, ստորեւ ներկայացնում ենք Թ.Հ.Թ. Թեմական խորհրդի կողմից «Րաֆֆի» Համալիրի վարչութեանը յղւած բողոքի եւ դժգոհանքի նամակը՝

Յարգարժան Վարչութիւն
Հ.Մ.Մ. «Րաֆֆի» Համալիր

Սոյն գրութեամբ հարկ ենք համարում մեր բողոքն ու դժգոհանքը յայտնել վերջին օրերին Միութեանդ յարկի ներքոյ տեղի ունեցած անսպասելի երեւոյթի համար, ինչը ի զարմանս ոչ միայն թոյլատրւել, այլեւ յայտարարութեամբ հովանաւորւել է Վարչութեանդ կողմից:

Այն ինչ ակնյայտ է, Հայաստանեայց Առաքելական եկեղեցին ընդմիշտ անւանւել եւ անւանւում է, որպէս Հայոց Ազգային եկեղեցի: Քանզի պատմութեան ընթացքում հայ ազգն իր հոգեւորականներին մշտապէս տեսել է ազգային-ազատագրական պայքարում: Հայոց ցեղասպանութեանը զոհ գնացած հազարաւոր մտաւորականների փաղանգի շարքում են եղել հոգեւորականները եւ Հայ Առաքելական Սուրբ Եկեղեցին ընդմիշտ եղել է պատմական արդարութեան համար պայքարի հոգեւոր մարտիկը:

Հետեւաբար հայրենիքում տիրող ներկայ տագնապալի իրավիճակում, երբ հայրենիքի թշնամիների կողմից ճնշումները զարգանում եւ գործող վարչակազմը մարտահրաւէրներին դիմակայելու համար ազգային անվտանգութեան հակառակ քաղաքականութիւն է կիրառում եւ սխալ գործողութիւններ է ծաւալում, ազգային ոգի եւ նկարագիր ունեցող թէ՛ հոգեւորական եւ թէ՛ աշխարհական հայի բնական հակազդեցութիւնն է մտահոգութեան եւ ցասման արտայայտութեան դրսեւորումը եւ պահանջատիրութեան բարձրաձայնումը, ինչը պատահել է թւականիս ապրիլի 26-ին Միութեանդ յարկի ներքոյ կազմակերպւած Հայոց Ցեղասպանութեան 109-րդ տարելիցին նւիրւած ծրագրին՝ Թեմիս Առաջնորդ Գերշ. Տ. Սեպուհ Ս. Արք. Սարգսեանի կողմից ձեռնարկին ներկայ Հոգեշնորհ Տ. Առաքել աբեղայ Գատեհճեանի միջոցով, ով իր արտայայտութիւններում անդրադարձել է այդ դառն իրողութեան եւ առկայ սպառնալիքներին, որն այս օրերին պատահում է Հայաստանում, մասնաւորապէս սահմանամերձ Տաւուշում:

Ուստի անթոյլատրելի երեւոյթ է միութեանդ յարկի ներքոյ Հայր Սուրբի դիմաց ցուցաբերած անարգալից վերաբերմունքը, քանի որ քաղաքակիրթ մօտեցումը պահանջում է ազատ խօսքի իրաւունք եւ հանդուրժողականութիւն, որին դուք ականատես էք եղել տարբեր հանդիպումների ընթացքում, որտեղ հնչել են արտայայտութիւններ, որոնք համախոհ չեն եղել կառոյցիս սկզբունքներին:

Արդ եւս մէկ անգամ յայտնում ենք մեր վրդովմունքը եւ յստակօրէն շեշտաւորում, որ այլեւս նմանօրինակ անախորժ երեւոյթները չենք հանդուրժելու եւ կրկնւելու դէպքում կը դադարեցւի Միութեանդ հետ համագործակցութիւնը՝ համայնքային տարբեր աշխատանքներում:

Թ.Հ.Թ. ԹԵՄԱԿԱՆ ԽՈՐՀՈՒՐԴ