Շաբաթ, 20 մայիս 2023 թւականին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց Իրանում հաւատարմագրւած Էսթոնիոյ հանրապետութեան պատւոյ հիւպատոս տիար՝ Արմէն Մութաֆեանին եւ իր եղբօր՝ պրն. Ալբերտ Մութաֆեանին, ովքեր քաղաքավարական այցելութեամբ հանդիպեցին Սրբազան Հօր հետ:

Սրբազան Հայրը ջերմօրէն ողջունեց Մութաֆեան եղբայրներին եւ գոհունակութիւն յայտնելով ներկայացրեց իրենց սիրայօժար մեկենասութեամբ հրատարակւած Առաջնորդ Սրբազան Հօր Քահանայական ձեռնադրութեան 50-ամեակին եւ Թեհրանի Թեմի Առաջնորդութեան 20-ամեակին նւիրւած՝ Սեպուհ Արք. Սարգսեանի «ՅԻՍՈՒՆԵՐԿԱՄԵԱՅ ԳՈՐԾՈՒՆԷՈՒԹԵԱՆ» խորագրով գիրքը:

Սրբազան Հայրը մեծապէս գնահատեց Մութաֆեան եղբայրներին հաստատելով, որ նրանք ընդմիշտ իրենց բարոյական եւ նիւթական աջակցութիւնն են ցուցաբերել եւ մասնակից են եղել ազգային-կրօնական կեանքին:

Նոյն օրը, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում նաեւ ընդունեց Հայաստանի Առաջին Հանրապետութեան 105-ամեակի տօնակատարութեան Կենտրոնական յանձնախմբի ներկայացուցիչներին ընկերակցութեամբ Թեմական խորհրդի կապ՝ տկն. Լինդա Ղարախանեանի:

Յանձնախմբի ատենապետ Ալֆրէդ Քեշիշեանն ամփոփ զեկոյց ներկայացրեց կատարւած աշխատանքների նաեւ նախատեսւած ծրագրերի մասին:

Սրբազան Հայրը ողջունեց եւ յորդորեց անհրաժեշտ խորհուրդներն ու ցուցումները եւ յաջողութիւն մաղթեց յանձնախմբի աշխատանքներին:

Ազգային Առաջնորդարանի Հանրային Կապ