×

Զգուշացում

JFolder: :files: Հասցեն չի տանում դեպի պանակ։ Հասցե՝ [ROOT]/images/202301/202301402
×

Տեղեկացում

There was a problem rendering your image gallery. Please make sure that the folder you are using in the Simple Image Gallery Pro plugin tags exists and contains valid image files. The plugin could not locate the folder: images/202301/202301402

ԹԵՀՐԱՆԻ 6-ՐԴ ՇՐՋԱՆԻ ՔԱՂԱՔԱՊԵՏԻ ԱՅՑՆ ԱԶԳԱՅԻՆ ԱՌԱՋՆՈՐԴԱՐԱՆ

Ամանորեայ եւ Ս. Ծննդեան տօների առիթով, երեքշաբթի, թւականիս յունւարի 3-ին, Թեհրանի 6-րդ շրջանի քաղաքապետ Ճրտգ. Ռեզա Մոհամմադին եւ իրեն ընկերակցող պատւիրակութիւնը այցելեցին Ազգ. Առաջնորդարան եւ հանդիպում ունեցան Թեմիս Առաջնորդ գերշ. Տ. Սեպուհ Ս. Արք. Սարգսեանի հետ։

Սրբազան Հայրը ողջունելով հիւրերին յայտնեց, որ տօնական օրերը գեղեցիկ առիթ են միմեանց սէր արտայայտելու հետեւաբար նմանատիպ հանդիպումները հպարտութեան տեղիք են տալիս։ Ապա անդրադառնալով Իրանում ապրող կրօնների միջեւ առկայ բարեկեցիկ յարաբերութիւններին յայտնեց, որ Իրանը իր պատմութեան ամենավաղ շրջաններից սկսեալ Կրօնների համակեցութեան օրրան է եղել եւ ընդգծեց այն իրողութիւնը, որ Իրանում կրօնական միւս համայնքների՝ յատկապէս քրիստոնեաների վայելած ապահովութիւնն ու անվտանգութիւնն արդիւնքն է քաղաքապետարանի տարբեր շրջանների տնօրէնների կողմից եկեղեցիների եւ այլ ազգային կենտրոնների նկատմամբ ցուցաբերած ուշադրութեան։ Սրբազան Հայրը մատնանշելով զօրավար Ղասէմ Սոլէյմանիի նահատակութեան երրորդ տարելիցին անդրադարձաւ Զօրավարի անձնաւորութեան եւ տարածաշրջանում խաղաղութեան ապահովման համար ունեցած դերակատարութեանը եւ նրան սեպեց, որպէս խաղաղութեան եւ արդարութեան հաստատման ռահվիրա։ Սրբազան Հայրը իր խօսքի միւս բաժնում նրան բնորոշելով, որպէս բարեսէր ու նւիրեալ պատերազմիկ շեշտեց, որ նա խաղաղութեան ժամանակ եւս ամենուրեք էր ու Սիրիայի ու Իրաքի սահմաններում ահաբեկչական ուժերի դէմ կռիւ էր մղում բոլորի համար անվտանգութիւն ապահովելու նպատակով։ Սրբազան Հայրը նաեւ ակնարկեց այն իրողութեան, որ դաէշի դէմ պայքարի օրերին պետական ուժերի կողքին կը կռւէին նաեւ հայ երիտասարդներ, որոնք առիթը ունեցան ճանաչելու եւ զինակից լինելու զօրավար Ղասէմ Սոլէյմանիին։ Կռւող հայ երիտասարդները երախտագիտութեամբ են յիշում Զօրավար Սոլէյմանին, ով իր հերոսական կեցւածքով, զինւորական հմտութեամբ բայց մանաւանդ իմաստութեամբ կարողացաւ չեզոքացնել թշնամու յարձակումներն եւ այնուհետ նաեւ Հալէպ քաղաքը ազատագրել ընդդիմադիր եւ ահաբեկիչ ուժերից։

Սրբազան Հայրը յայտնեց, որ տօնական պատգամներում անընդմէջ առ Բարձրեալ Աստւած իր աղօթքն է բարձրացնում Իսլամական յեղափոխութեան Առաջնորդ Այաթօլլահ Խամենէիի արեւշատութեան, առողջութեան ու երկրի եւ ժողովրդի խաղաղութեան ու բարեկեցութեան համար, քանի որ հաւատում է այն բանին, որ խաղաղութիւնը բարգաւաճման երաշխիքն է, այն ինչ հրեշտակները Քրիստոսի ծննդեան գիշեր աւետեցին մարդկանց ու աշխարհին եւ երկնքում երգեցին «Աստծուն փառք բարձունքներում, խաղաղութիւն երկրի վրայ եւ մարդկանց մէջ հաճութիւն»։

Թեմակալ առաջնորդը շնորհակալութիւն յայտնեց հիւրերին իրենց ներկայութեան ու շնորհաւորանքների համար եւ իր գնահատանքի խօսքը ուղղեց ընդհանուր Թեհրանի Քաղաքապետարանի եւ բոլոր շրջանների գործունէութեան եւ համագործակցութեան համար, նշելով այն շրջանները, որոնց սահմաններում են գտնւում թեմիս եկեղեցիները եւ ազգապատկան կալւածները, ինքնըստինքեան առաւել սերտ են յարաբերութիւնները եւ փոխհամագործակցութիւնները, որի համար երախտապարտ ենք։ Նա մաղթեց, որ գալիք տարին լինի խաղաղութեան, նոր նւաճումների, եղբայրութեան եւ սիրոյ առաւելագոյն ծաղկումի տարի։

Պրն. Մոհամմադին նաեւ իր շնորհաւորանքի խօսքը ուղղեց իրանահայութեան եւ յատկապէս թեհրանահայ համայնքին եւ իր արտայայտութիւնների ընթացքում ակնարկեց այն իրողութեան, որ տօնական օրերին, Իրանի Իսլամական Հանրապետութեան աւագանին՝ սկսած յեղափոխութեան Առաջնորդ՝ Այաթօլլահ Խամենէից մինչեւ օրէնսդիր եւ գործադիր մարմինները յատուկ ուշադրութիւն են դարձնում հայութեան, կրօնական եւ ազգային իշխանութիւններին, ի մասնաւորի հայ նահատակներին ու անձնուրացներին, ովքեր իրենց կեանքն ու առողջութիւնը զոհեցին իրանեան հայրենիքի հողային ամբողջութեան, ուստի ինքը նաեւ իր հերթին պարտք է համարել այցելել հայ ժողովրդին ի մասնաւորի հոգեւոր առաջնորդին։ Պրն. Քաղաքապետը յաւելեց, որ հայերը համարւում են մեր լաւ հայրենակիցներ, ուստի իրենց պարտքն են իմանում սպասարկեն առանց որեւէ խտրականութեան։ Նա իր խօսքերի աւարտին պատրաստակամութիւն յայտնեց համագործակցութիւնները շարունակելու համար։

Սոյն հանդիպման ներկայ էին նաեւ Թեմական խորհրդի ներկայացուցիչներ պարոնայք Հայրիկ Աղանեանը եւ Արմէն Նազարեանը: Պրն. Հայրիկ Աղանեանը իր հերթին ողջունելով հիւրերին շնորհակալութիւն յայտնեց այցելութեան եւ ցուցաբերած ուշադրութեան համար։

Ազգային Առաջնորդարանի Հանրային Կապ

{gallery}202301/202301402{/gallery}