Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



ՔՐԻՍՏՈՍԻ ԾՆՈՒՆԴԸ՝ ՃԱՆԱՊԱՐՀ ԴԷՊԻ ՓՐԿՈՒԹԻՒՆ

Այս օրերին ողջ աշխարհը, մի անգամ եւս վերանորոգ հաւատքով ապրում է իր Փրկչի՝ Յիսուսի Քրիստոսի Ծննդեան եւ Աստւածայայտնութեան խորհուրդից իրեն փոխանցւող անանցանելի ու անապական երջանկութիւնն ու խանդավառութիւնը։ Մի անգամ եւս քրիստոնեայի, իրաւ քրիստոնեայի գիտակցութեան մէջ վերակենդանանում է փրկութեան խորհուրդը, պատւանդանւած քրիստոսաւանդ հաւատքի վրայ։ Մարդկութեան փրկութիւնը խարսխւած աստւածային սիրոյ վրայ, մարդ արարածին առաջնորդում է աստւածահաճ, յաւիտենական կեանքի.«Քանի որ Աստւած այնքան սիրեց աշխարհը, որ մինչեւ իսկ իր միածին Որդուն տւեց, որպէսզի նա ով հաւատում է նրան, չկորչի, այլ յաւիտենական կեանք ունենայ» (Յհ. 3։16)։

Արդարեւ Աստւած սիրով է, որ իր Որդին ղրկեց, որպէսզի մեղքի տիղմի մէջ ընկղմւած մարդը փրկւի։ Ծննդեան խորհրդի մեծագոյն գաղափարը փրկութիւնն է մարդուն։ Համատեսական Աւետարանների մէջ փրկութեան խորհուրդը կապւած է Երկնքի Արքայութեան հաստատման գաղափարին. «Ով հաւատում է Որդուն յաւիտենական կեանք կ՛ունենայ» (Յհ. 4։36) Ու յաւիտենական կեանքը ուրիշ բան չէ եթէ ոչ Երկնքի Արքայութեան բնակիչ դառնալը։

Աստւածորդու Ծննդեան դրւագի մէջ կարդում ենք հրեշտակների մարդկութեան տւած Աւետիսը։ Հովիւները, ովքեր գիշերով իրենց հօտի պահակութիւնն էին անում, ընդունեցին այցելութիւնը երկնառաք հրեշտակի, որ նրանց փոխանցեց պատմութեան մեծագոյն աւետիսը, աշխարհի Փրկչի ծնունդը. «Մի՛ վախեցէ՛ք, ես մի աւետիս եմ տալու ձեզ, որ մեծ ուրախութիւն պիտի պատճառի ամբողջ ժողովրդին. այսօր Դաւթի քաղաքում ծնւեց ձեր Փրկիչը, որ օծեալ Տէրն է»(Ղկ. 2։10-11)։ Յովհաննէսի Աւետարանում կարդում ենք.«Աստծու սէրն այս ձեւով է յայտնւել մեզ. Աստւած իր մածին Որդուն ուղարկեց աշխարհ, որպէսզի կեանք ունենանք նրանով» (Ա. Յհ. 4։9)։

Քրիստոսի մարդեղութեան խորհուրդը, խորհուրդն է սիրոյ, որի պտուղն է խաղաղութիւնն ու հաճութիւնը. այսպէս պատգամեցին երկնաէջ հրեշտակն ու իրեն միացած երկնային զօրքերը, երգելով ամենագեղեցիկ ու բովանդակալից երգը երբեւիցէ լսւած.-
«Փա՜ռք Աստծուն՝ բարձունքներում,
Խաղաղութի՜ւն երկրի վրայ
Եւ հաճութիւն մարդկանց միջեւ» (Ղկ. 2։14)

Ծննդեան խորհուրդով տեղի է ունենում երկնքի ու երկրի գիրկընդխառնում եւ այդ գիրկընդխառնումից ճառագայթում է աստւածային սէրը, խաղաղութիւնը, ճշմարտութիւնը, եղբայրութիւնն ու կատարեալ կեանքի հեռանկարն ու տեսիլքը. «Ես եկայ, որպէսզի կեանք ունենան, եւ կեանքը լինի առաւել լեցուն» (Յհ. 10։10)։
Քրիստոսի փրկագործական արարքով մեղաւորները Աստծու առջեւ արդարանում են։ Պօղոս առաքեալը ասում է. «Թէպէտ բոլոր մարդիկ մեղանչեցին եւ զրկւած են մնում Աստծու փառքից, սակայն Աստւած արդարացնում է նրանց ձրիաբար իր պարգեւած շնորհով, Քրիստոս Յիսուսի փրկագործութեան միջոցով» (Հռ. 3։23-24)։

Արդարեւ Քրիստոսի հրաշափառ ծնունդով հաւատացեալը կոչւած է վերանորոգելու ինքնիրեն իր աստւածակերպ պատկերի մէջ։ Պօղոս առաքեալը ասում է Ադամով մարդիկ հեռացան Աստծուց, մեղքի ազդեցութեան տակ աստւածային նմանութիւնը եղծւեց։ Յիշենք, որ Աստւած մարդը ստեղծեց իր նմանութեամբ։ Քրիստոսով վերականգնւեց մարդու մէջ իր աստւածանմանութիւնը։

Քրիստոսով աստւածանմանութիւնը իրագործւեց Քրիստոսի մարդեղութեամբ։ Ս. Աթանաս Հայրապետը ասում է. «Աստւած մարդացաւ, որպէսզի մարդը աստւածացնի»։ ՛՛Խորհուրդ խորին՛՛ է սա. Քրիստոս իր մարդեղութեամբ մարդուս, մարդկութեան վրայ տարածեց փրկութիւնը։ Աւելին Աստւածորդու փրկագործական արարքով ողջ մարդկութեան առջեւ բացւեց փրկութեան ճանապարհը։ Ահա այստեղ մեր առաջ պատնեշւում է մեծագոյն մարտահրաւէրը, որուն յաղթելու, կամ այն շրջանցելու պայմանը մեղքից սրբւելն է, դէպի Աստւած ետ դարձն է եւ իր նմանի մէջ ինքն իրեն տեսնելը։ Քրիստոս այս կարելիութիւնը, հնարաւորութիւնը տւաւ մեզ, որպէսզի դրանով ձեռք ձգենք նաեւ փրկութեան հնարաւորութիւնը։

Քրիստոս երկրաւոր իր կեանքի եւ յատկապէս իր այդ կեանքի վերջին երեք տարիներին քարոզեց, բժշկեց, յարութիւն տւեց մեռելներին, իր կեանքով հարազատ պատկերը եղաւ Աստծու երկրի վրայ։

Քրիստոսի հրաշափառ ծննդեան եւ Աստւածայայտնութեան տօնակատարութեամբ վերապրելու ենք Աստծու սէրն ու ներկայութիւնը մեր մէջ, աւելի ճիգ ենք թափելու կատարելութեան հասնելու, չէ որ նա մեզ պատւիրեց. «Կատարեալ եղէք ինչպէս ձեր երկնաւոր Հայրը ինք կատարեալ է»։ Աստւածորդին, մարմնացեալ Բանը, Աստւածամարդը իբրեւ կամուրջ երկնքի եւ երկրի եւ միւս կողմից էլ իբրեւ միակ Փրկիչ մարդկութեան հանդիսացաւ սկիզբը նոր կեանքի եւ իբրեւ այդպիսին Նա չխօսեց միայն ճշմարտութեան մասին, այլ ասաց «Ես եմ ճշմարտութիւնը եւ կեանքը» չխօսեց սիրոյ մասին, այլ եղաւ թանձրացեալ սիրոյ արտայայտիչ՝ դրսեւորած իր խաչի կեանքով, չխօսեց ներողամտութեան մասին միայն, այլ ինք աղօթեց եւ Աստծուց թողութիւն խնդրեց նրան չարչարողներին, խաչ հանողներին եւ վերջապէս եղաւ լոյս իր շրջապատի համար։

Աստւածորդու հրաշափառ ծնունդը իր հրաշակերպող իրականութեամբ մարդը առաջնորդում է Աստծուն նրան վերածելով սիրոյ, խաղաղութեան եւ բարութեան գործիք երկրի վրայ։
Քրիստոնէական այս բիւրեղ հաւատքը աւանդւած առաքեալների եւ եկեղեցու հայրերի կողմից եղաւ լուսոյ փարոս մեր ժողովրդի, որ ապրեց ու գործեց մշտանորոգ ու կենսաւորւող հաւատքով։

Մեր ժողովրդի վերջին երկհազարամեայ կեանքը վկան է այս ճշմարտութեան։ Հայ ժողովուրդը Քրիստոսի Ծննդեան խորհուրդով վերանորոգ իր երկիրը վերածեց դէպի երկինք սլացող տաճարների, քարերը՝ աղօթաբոյր խաչքարերի, իր հոգու եւ մտքի գանձերը մագաղաթների վրայ դրոշմելով մագաղաթն ու թուղթը վերածեց յաւերժաբոյր ճշմարտութիւնների շտեմարան։ Վանքերի ՛՛մութ խուցերում՛՛ գրւած այդ ձեռագիրների մեծ մասը անօրէն թշնամիների կողմից այրւեցին, փճացւեցին. նոյն ճակատագրի ենթարկւեցին մեր տաճարները, վանական համալիրներն ու սրբաբոյր մատուռները եւ աննման խաչքարերը։ Սակայն մեր ժողովուրդը իր Փրկչի Ծննդեան ու Աստւածայայտնութեան հաւատքով վերանորոգ վերակառուցեց իր երկիրը նոր իմն պայծառափայլումով։

Այսօր եւս նոյն մարտահրաւէրների առաջ ենք կանգնած։ Մեր հայրենիքը իր արդի պատմութեան ամենաճակատագրական ու անորոշ, անբաղձալի իրավիճակ է ներկայացնում. ունենք մի բանակ, որ ի վիճակի չէ վերականգնել իր հայրենիքի տարածքային ամբողջականութիւնը. ապազգային քաղաքականութեամբ երկիրը ղեկավարող իշխանութիւն. կեղծ խաղաղութեան երազանք ու անհեռանկար վիճակ, առաւել Արցախի Հանրապետութեան մեծ մասի կորուստ. երկիրը ներքին պառակտումի առաջնորդող անհեռատես քաղաքականութիւն. կեղծ ժողովրդավարութիւն եւ սորոսական ապաբարոյ տւայտանքների ենթակայ վիճակ. ահա այսօրւայ մեր հայրենիքի վիճակը։

Քրիստոսի հրաշափառ ծննդեան տօնից մեզի եկող վերանորոգ հաւատքով կենսաւորւած ճանաչենք մեր պատմութիւնը եւ այդ ճանաչողութեամբ առաջնորդւենք։ Չմոռանա՛նք, որ հաւատքը ծնուցիչն է հաւատարմութեան իսկ հաւատարմութիւնը մեզ կապելու է մեր արմատներին։ Մեր ժողովուրդը յաճախ է յայտնւել նման վիճակների մէջ։ Ցեղասպանութեան, հայրենազրկման դառն բաժակն է ըմպել եւ սակայն վերստին վերականգնւել է ու վերընձիւղւել կերտելով իր հայրենիքը։ Եւ հիմա էլ Պօղոս առաքեալի յուսադրիչ խօսքերով զօրացած տէր ենք կանգնում մեր իրաւունքներին. «Ամէն կողմից նեղւած ենք, բայց ընկճւած չենք, տագնապի ենք մատնւած, բայց յուսահատ չենք, հալածանքներն անպակաս, բայց լքւած չենք, յաճախ խոշտանգւած, բայց խորտակւած չենք» (Բ. Կր. 4։8-9)։

Վերանորոգւած ամրակուռ հաւատքով հզօրանանք, յոյսով ու սիրով զրահաւորւենք, մեր պատմութեան իմացութեամբ ուժեղացած շարունակենք մեր գոյապայքարը յանուն մեր իրաւունքների ձեռքբերման, յանուն մեր ազգային արժանապատւութեան վերականգնման։
Մեր դատի, հողերին վերատիրանալու պահանջատիրական գոյապայքարը մեր կեանքի սկզբունքն է եւ այդ սկզբունքով ենք գործելու, պայքարելու մինչեւ ամբողջական Հայաստանի երազի իրականացումը։

Համախմբւենք սիրելիներ մեր հայրենիքի շուրջ, մէկ կողմ թողնելով մեղքը, «Որ հեշտութեամբ է պաշարում մեզ, եւ համբերութեամբ պայքարենք մեզ ներկայացնող փորձութիւնների դէմ. մեր աչքերն ուղղենք Յիսուսին՝ մեր հաւատքի հիմնադրին» (Եբր. 12։1-2)։ Մեղք է միմեանց չսիրելը, մեղք է անտարբերութիւնն հայրենիքի եւ ազգային մեր արժէքների հանդէպ։ Մեղք է տեսակ-տեսակ օտարոտի ուսուցումներով տարւելը։ Խտրութիւն դնելը մեղք է, իսկ եղբայրասիրութիւն, բարեսրտութիւնը ազնիւ զգացումներ են, մարդը սրբող եւ մաքրող։ Առաքեալը յուշում է մեզ Աստւածաշունչ Մատեանի արքայական օրէնքը. «Սիրի՛ր քո ընկերոջը, ինչպէս ինքդ քեզ» (Յկ. 1։8)

Այս խոհերով շնորհաւորում եմ մեր ժողովրդի բոլոր զաւակներին Ամանորի եւ Ս. Ծննդեան ու Աստւածայայտնութեան տօների առիթով։ Սիրոյ, խաղաղութեան ու հաճութեան զգացումներով լուսաւոր շնորհաւորենք միմեանց սիրելի՛ ժողովուրդ աղօթելով միանգամայն՝ աշխարհի խաղաղութեան, Իրանի Իսլամական Հանրապետութեան եւ իր ժողովրդի բարեկեցութեան, մեր պատմական հայրենիքի ու վիրաւոր Արցախի ժողովրդի համար, մաղթելով որ չարամիտ մարդկանց աչքը բացւի, ճշմարտութիւնը տեսնեն ու վերջ տան իրենց անմարդկային արարքներին եւ թշնամական արտայայտութիւններին։

Աղօթենք նաեւ մեր եկեղեցու եւ նրա նւիրապետական Աթոռների ու նրա գահակալների համար, աղօթենք նաեւ մենք մեզ համար։
Խաղաղ կեանքի հեռանկարով ձայնակցում ենք երկնային հրեշտակների եւ երկնային զօրքի քաղցրահնչիւն երգին.
« Փա՜ռք Աստծուն՝ բարձունքներում,
Խաղաղութի՜ւն երկրի վրայ
Եւ հաճութիւն մարդկանց միջեւ»։

Քրիստոս ծնաւ եւ յայտնեցաւ
Ձեզ եւ մեզ մեծ Աւետիս. Ամէն.

ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ

ՏՕՆԵՐ

Կրօնական Տօների Օրացոյց


Կիրակի 24 Մարտի 2024;
Ծաղկազարդ

Երկուշաբթի 25 Մարտի 2024;
Աւագ երկուշաբթի

Երեքշաբթի 26 Մարտի 2024;
Աւագ երեքշաբթի

Չորեքշաբթի 27 Մարտի 2024;
Աւագ չորեքշաբթի

Հինգշաբթի 28 Մարտի 2024;
Աւագ հինգշաբթի

Ուրբաթ 29 Մարտի 2024;
Աւագ ուրբաթ

Շաբաթ 30 Մարտի 2024;
Ճրագալոյց

Կիրակի 31 Մարտի 2024;
Սուրբ Յարութիւն կամ Զատիկ

Կիրակի 07 Ապրիլի 2024;
Կրկնազատիկ եւ Աւետումն Սուրբ Կոյս Մարիամ Աստւածածնի

Կիրակի 14 Ապրիլի 2024;
Կանաչ կամ Աշխարհամատրան Կիրակի

ԸՆԹԵՐՑՈՒՄՆԵՐ

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ