Սիրելի Հայրենակիցներ, ցաւօք պիտի տեղեկացնենք Թեհրանի հայ համայնքում կորոնավիրուսի պատճառով մահերի թիւը 135-ի հասաւ։ Իրանական մորդադ ամսւայ ընթացքում՝ համաճարակի հինգերոդ ալիքի ցունամին մեզնից խլեց 19 հայորդու։
Երեւոյթ, որ մեզ պարտադրեց Թեմիս Բարեխնամ Առաջնորդ՝ Գերշ․ Տ․ Սեպուհ Սրբ․ Արք․ Սարգսեանի կարգադրութեամբ Յիսուս Քրիստոսի Այլակերպութեան, Վարդավառի, Աստւածածնայ վերափոխման եւ խաղող օրհնէքի տօները կատարել դռնփակ կարգով։ Ազգային Առաջնորդարանը հնարաւորին չափով սկսեց հեռավար կարգով կատարել կառոյցիս դիմող հայորդիների պահանջները։ Սահմանափակւեցին նաեւ պսակի եւ մկրտութեան արարողութիւններին մասնակից հիւրերի թիւը, իջեցնելով մինչեւ 15 հոգի։
Բայց բազմամարդ ընտանեկան խրախճանքների կազմակերպումը, հիւանդութեան քողարկումը եւ մահւան առիթով կատարւող արարողութիւններին գերեզմանատանը մեծ թւով մասնակցութիւնը, ճամբորդութիւնը եւ առողջապահական կանոնների խախտումը, բոլորիս փաստի առջեւ կանգնեցրեց․ ունեցանք նաեւ երիտասարդ եւ միջահասակ տարիքում ցաւալի մահեր, որոնք խորը վիշտ եւ ցաւ պատճառեցին մեր ընտանիքներին։
Ուստի կրկին անգամ յորդորում ենք ազգովի լինելով զգօն՝ կատարենք առողջապահական բոլոր կանոնները, ախտանիշ նկատելու պարագային դիմել բուժկենտրոն եւ խուսափել բազմամարդ հաւաքներից։
Ազգային Առաջնորդարանի Հանրային կապ