«ՊԷՏՔ Է ՅԱՐԳԵԼ ՄԵՐ ՍՐԲԱՎԱՅՐԵՐԸ՝ ԵՐԿԻՒՂԱԾ ՄՕՏԵՑՈՒՄՈՎ»

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ

Այսպէ՛ս է ասել Ն.Ս.Օ.Տ.Տ. Արամ Ա. Վեհափառ Հայրապետն իրեն այցելած եւ իր հետ հեռաձայնային հաղորդակցութեամբ կապ հաստատած հայ քաղաքական կուսակցութիւնների ներկայացուցիչներին։ Նորին Սրբութիւնը փոխանցել է, որ ներկայ կացութիւնը, ներքին թէ արտաքին, ահաւոր վտանգների դիմաց կարող է դնել Հայաստանը եւ այն առաջնորդել անդառնալի իրավիճակների:

Հինգշաբթի՝ յունիսի 26-ին, Թ.Հ.Թ. Թեմական խորհրդի անդամ Հայրիկ Աղանեանը, Տէր Գրիգորիս քհնյ. Ներսիսեանը եւ «Ալիք» օրաթերթի ներքին վարիչ Արգիշտի Թովմասեանն այցելել են հիւանդանոց, որտեղ հոսպիտալացւել է ռմբակոծութեան հետեւանքով ծանր վիրաւորում ստացած թեհրանահայ Անահիտ Շահբազեանը:

Սիրելի՛ հայրենակիցներ,

Տեղեկացնում ենք, որ Ձեզ ՅՈՒԶՈՂ ՀԱՐՑԵՐԻ պատասխանը ստանալու կամ որեւէ ԱՐՏԱԿԱՐԳ ԻՐԱՎԻՃԱԿԻ դէպքում, կարող էք կապ հաստատել հետեւեալ հեռախօսահամարներով՝

02188907901
09102293213

Յաւելեալ տեղեկութիւններ ստանալու համար հետեւէք մեր առաջիկայ յայտարարութիւններին:

ԹԷԺ ՇՏԱԲ

Երկուշաբթի, 16 Յունիս 2025 թւականի առաւօտեան, Ն.Ս.Օ.Տ.Տ. Արամ Ա. Վեհափառ Հայրապետը հեռախօսային կապ է հաստատել Թեմիս Առաջնորդ՝ Գերշ. Տ. Սեպուհ Ս. Արք. Սարգիսեանի եւ հայ համայնքի պատասխանատուներին հետ։ Արամ Ա. Կաթողիկոսի հեռախօսի նպատակն էր իմանալ թեհրանահայ համայնքի ներկայ կացութեան եւ Ազգային կենտրոնական վարչութեան քաղաքական ժողովին մասնակից պատւիրակութեան վերադարձի մասին։ Սրբազան հայրն ու պատասխանատուները Հայոց Հայրապետին փոխանցել են, թէ հայ համայնքը որեւէ վնասի չի ենթարկւել, իսկ ժողովականները հանգստութեամբ Իրան են ժամանել։

Յիշեցնենք, թէ Ն.Ս.Օ.Տ.Տ. Արամ Ա. Վեհափառ Հայրապետը մնայուն կերպով կապի մէջ է Սրբազան Հօր, նրա օգնական Հայր Սուրբին եւ համայնքի պատասխանատուներին հետ։

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Կիրակի, 15 յունիս 2025 թւականին, Ամենայն Հայոց Կաթողիկոս Գարեգին Բ. Վեհափառ Հայրապետը, հեռախօսային կապ է հաստատել Թեմիս Առաջնորդ Գերշ. Տ. Սեպուհ Ս. Արք. Սարգսեանի հետ եւ իր օրհնութիւնը եւ զօրակցութիւնն է յայտնել վերջին օրերի ընթացքին Իրանի դէմ սիոնիստական ռեժիմի յարձակումների եւ ստեղծւած տագնապալի իրավիճակի կապակցութեամբ:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Սիրելի’ հայրենակիցներ,

Տեղեկացնում ենք Ձեզ, որ հաշւի առնելով երկրում տիրող իրավիճակը Թ.Հ.Թ. Թեմական խորհուրդը խորհրդակցելով Պատգամաւորական ժողովի դիւանի հետ, կեանքի է կոչել շտաբ, որը հետեւում է իրադարձութիւնների ընթացքին եւ պատրաստ է անհրաժեշտութեան դէպքում ձեռնարկել իրավիճակին համարժէք քայլեր` հնարաւոր խնդիրները կարգաւորելու համար։

Կոչ ենք անում Ձեզ` պահպանել սառնասրտութիւնը, չտրւել ապատեղեկատւութեանը եւ հակաքարոզչական սադրանքներին ու յաւելեալ տեղեկութիւններ ստանալու համար հետեւել մեր առաջիկայ յայտարարութիւններին։

Թ.Հ.Թ. Թեմական խորհուրդ
17.06.2025 թ.

Իրանի եւ Իսրայէլի միջեւ շարունակուող ռազմական գործողութիւնները բնականաբար երկու երկիրներուն մէջ հաստատուած հայ համայնքներուն մօտ յառաջացուցին լուրջ մտահոգութիւններ:

Արդարեւ, Ն.Ս.Օ.Տ.Տ. Արամ Ա. Վեհափառ Հայրապետը այս առաւօտ, Երկուշաբթի, 16 Յունիս 2025-ին, դժուարութեամբ կարողացաւ կապ հաստատել Թեհրանի Հայոց Թեմի առաջնորդ Գերշ. Տ. Սեպուհ Արք. Սարգիսեանի եւ հայ համայնքի պատասխանատուներուն հետ եւ իմացաւ, որ հայ համայնքը չէ ենթարկուած որեւէ վնասի եւ մօտէն կը հետեւի տեղի ունեցող մտահոգիչ զարգացումներուն՝ իր կրօնական ու համայնքային կառոյցներուն ու պատասխանատուներուն ճամբով: Ինչ կը վերաբերի Երուսաղէմի եւ շրջակայքի հայ համայնքին, Նորին Սուրբ Օծութիւնը դարձեալ մօտէն կը հետեւի անոր ապահովական կացութեան:

Մեծի Տանն Կիլիկիոյ մամլոյ ծառայութիւն

Կիրակի, 15 յունիս 2025 թւականին, Թեհրանի Ս. Սարգիս եկեղեցում, կիրակնօրեայ պատարագի ընթացքին, հովանաւրութեամբ թեմիս առաջնորդ Գերշ. Տ. Սեպուհ Ս. արք. Սարգսեանի տեղի ունեցաւ զօրակցութեան աղօթք եւ զգաստութեան եւ դատապարտման կոչ ուղղւեց՝ վերջին օրերի ընթացքին սիոնիստական ռեժիմի Իրանի դէմ ահաբեկչական բնոյթի յարձակումների եւ նաեւ Հայաստանի բարձրաստիճան ղեկավարութեան կողմից եկեղեցւոյ դէմ դրսեւորած անյարիր կեցւածքի առիթով:

Թեհրանահայ համայնքի անունից խստօրէն դատապարտում ենք սիոնիստական ռեժիմի ահաբեկչական յարձակումները Իրանի վրայ։

Այս յարձակումները երիցս փաստեցին, որ թշնամին չի հետեւում քաղաքակիրթ մարդկութեան կողմից ընդունւած բարոյական նորմերին, ինչպէս նաեւ միջազգային իրաւունքի սկզբունքներին եւ օրէնքներին ու գործում է բացառապէս բռնութեան, սպանութեան եւ աւերածութեան տրամաբանութեան սահմանում` հատելով բոլոր կարմիր գծերը։ Հետեւաբար այս յանցաւոր արկածախնդրութեան բոլոր հետեւանքների անմիջական պատասխանատւութիւնը կրում է հէնց այս յանցագործ ռեժիմը։

Ցաւակցելով երկրի Զինւած ուժերի հրամանատարների, միջուկային գիտնականների, ինչպէս նաեւ միւս անմեղ հսյրենակիցների նահատակութեան առիթով, օրհասական այս պահին մեր լիակատար աջակցութիւնն ու զօրակցութիւնն ենք յայտնում երկրի ղեկավարութեանն ու Զինւած ուժերին, եւ վստահ ենք, որ սիոնիստական ռեժիմի այս յանցագործութիւնը կարժանանայ համարժէք եւ համաչափ պատասխանի։

Միեւնոյն ժամանակ, կոչ ենք անում մեր համայնքի սիրելի անդամներին` չտրւել թշնամու սադրանքներին, չտարածել հակաիրանական ուժերի կողմից տարածւող ապատեղեկատվութիւնը, եւ հետեւել միայն պաշտօնական տեղեկատւութեանը։

Սոյն գրութեամբ, մեր ցաւակցութիւնը յայտնելով Գերագոյն Առաջնորդին եւ նահատակների ընտանիքներին, մաղթում ենք տոկոնութիւն ու համբերութիւն սիրելի ժողովրդին եւ առ Աստւած հայցում ենք շուտափոյթ ապաքինում վիրաւորներին, ու յայտարարում ենք` մեր համերաշխութիւնն ու աջակցութիւնը բոլոր պետական եւ ռազմական պաշտօնեաներին։

Թող, որ ամենակարող Աստւածը պահի եւ պահպանի Իրանը, եւ Իրանի ժողովրդին բոլոր տեսակի փորձութիւններից ու արհաւիրքներից։

ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ