Շաբաթ, 2 մարտ 2024 թւականին, Թեմիս Առաջնորդ Գերշ. Տ. Սեպուհ Ս. Արք. Սարգսեանը, իր գրասենեակում ընդունեց «Ա. Ահարոնեան» մանկապարտէզի նորանշանակ տեսչուհի Նադիա Այվազեանին եւ Կրթական խորհրդի ներկայացուցիչ՝ տկն. Կարինէ Մանուչերեանին, ովքեր եկել էին Սրբազան Հօր օրհնութիւնը հայցելու Տեսչուհի Նադիա Այվազեանի ստանձնած նոր պաշտօնի առիթով նաեւ Սրբազան Հօր հովանաւորութիւնը եւ օրհնութիւնը խնդրելու յիշեալ մանկապարտէզի հիմնադրման 30-ամեակին նւիրւած նախաձեռնութիւնների կապակցութեամբ:

Սրբազան Հայրը ջերմօրէն ողջունեց եւ յաջողութիւն մաղթեց Տեսչուհուն եւ կարեւորելով նոր սերնդի մօտ ազգային-հոգեւոր դաստիարակութեան զարգացումն ընդգծեց, որ դա այն կարեւոր կէտն է, որն սկիզբ է ստանում ընտանիքից յետոյ մանուկների առաջին հասարակական միջավայրերից՝ մանկապարտէզ-նախակրթարաններից:

Սոյն հանդիպումը շարունակւեց «Ա. Ահարոնեան» մանկապարտէզի նախկին տեսչուհիներ՝ տկն. Անետ Բաղդասարեանի եւ տկն. Անահիտ Մարգարեանի ներկայութեամբ, ովքեր ստանձնել են աշխատանքը՝ յիշեալ մանկապարտէզի 30 տարւայ անցած ուղին ներկայացնող հրատարակւող գրքի կազմութեան ուղղութեամբ:

Սրբազան Հայրը մեծապէս գնահատեց եւ անհրաժեշտ թելադրութիւնները կատարելով, յաջողութիւն մաղթեց նրանց աշխատանքներին:

Ազգային Առաջնորդարանի Հանրային կապ