ԱՅՑԵԼՈՒԹԻՒՆ ԱԶԳԱՅԻՆ ԱՌԱՋՆՈՐԴԱՐԱՆ

Սոյն թւականի յունիսի 22-ին, ՀՀ ԿԳՄՍ նախարարութեան Գիտութեան կոմիտէի դրամաշնորհով Թեհրան են ժամանել մի խումբ մասնագէտներ։ Այցելութեան նպատակն է Թեհրանի «Արտակ Մանուկեան» թանգարանի հաւաքածուների համալիր ուսումնասիրութիւնը։

Տարիների ընթացքում թէեւ նկատւում է հաւաքածուի համալրում, սակայն միաժամանակ ցաւալիօրէն տեսնում ենք, որ այս թանգարանի նիւթերի գիտական համալիր ուսումնասիրութիւն դեռեւս չի կատարւել: Ուստի ստեղծագործութիւնների արձանագրումը, ցուցակագրումը, դրւագային լուսանկարումը եւ քննութիւնը հրատապ է:

Շաբաթ թւականիս յունիսի 25-ին, Թեմիս Առաջնորդ Գերշ. Տ. Սեպուհ Ս. Սարգսեանն, Ազգ. Առաջնորդարանի դահլիճում ընդունեց գիտական խմբի անդամներին, որոնց ընկերակցում էին Թանգարանի տնօրէնուհի Ալիս Շահմուրադեանի եւ աշխատակից Ռազմիկ Դաւթեանը: Հանդիպմանը նաեւ ներկայ էր Թեմական խորհրդում «Ա.Մանուկեան» թանգարանի կապ՝ Ռաֆիկ Մելիքսէթեանը:

Սրբազան Հայրը ջերմօրէն ողջունեց, գնահատեց եւ կարեւորեց այս նախաձեռնութիւնը:

Հանդիպման ընթացքին քննարկւեցին գաղթօջախի նոսրացման, համայնքի ապագայի եւ մշակութային ժառանգութեան պահպանման մի շարք խնդիրներ։
Խմբի անդամները շնորհակալութիւն յայտնեցին տնօրէնին թանգարանի իւրաքանչիւր միաւորի նկատմամբ սրտացաւ վերաբերմունքի, թանգարանի հանրահռչակմանն ուղղւած քայլերի եւ այս ընթացքում իրենց նեցուկ լինելու, պատրաստակամ եւ հոգատար վերաբերմունքի համար։

Հիւրերը հանդիպման աւարտին հանդէս եկան կոչով՝ ուղղւած իրանահայութեանը։ Կարեւորելով նմանատիպ թանգարանի գոյութիւնը, մշակութային առարկաների միջազգային չափանիշներին համապատասխան պահպանութեան եւ ուսումնասիրութեան համար ժառանգաբար փոխանցւած եւ իրենց ընտանիքներում պահւող մշակութային այս առարկաները, հնարաւորութեան դէպքում յանձնել թանգարանին, որի արդիւնքում կը փրկւեն ոչնչացումից եւ հանդէս կը գան իրանահայութեան պատմութեան եւ իրանահայ համայնքի փաստացի վկաներ։

Ազգային Առաջնորդարանի Հանրային կապ