ՅԻՇԱՏԱԿ ՏԱՍՆ ԿՈՒՍԱՆԱՑ

Տասը կոյսերի յիշատակին նւիրւած այս օրւան խորհուրդը իր անունը ստացած է նոյնինքն Մատթէոսի Աւետարանի 25-րդ գլխում Յիսուսի խօսած առակից, որտեղ ներկայացնում էր մարդկային ընկերութիւնը կազմող երկու խմբերը, որոնք 10 կոյսերի թւով են հանդէս գալիս: Տասը թիւը խորհրդանշում է մարդկային ցեղի ամբողջութիւնը, որոնք երկուսի են բաժանւում. հինգը իմաստուն իսկ միւս հինգը՝ յիմար:

Կոյսերի պատկերով են ներկայացւում, ցոյց տալու համար, թէ ինչպէս հաւատացեալներ իրենց կեանքում ընդօրինակելու են նրանց վարքը: Կոյսեր ամէն իմաստով զգուշ են իրենց շարժուձեւերին, հագւածքին, նայւածքին, արդ ու զարդին, միշտ փորձում են պատշաճ ու գեղեցիկ ներկայանալ, եւ մանաւանդ, եթէ նկատի ունենանք փոխանցւած առակի պատմական, ժամանակագրական եւ ընկերային ենթահողը, կոյսերը հարսի կողքին կանգնած, պատրաստ եւ արթուն վիճակում, իրենց լապտերները վառւած մեծ խանդավառութեամբ եւ անհամբերութեամբ սպասում էին դիմաւորելու փեսային: Փեսան ուշ գիշերին անակնկալ յայտնւելով՝ պիտի առնէր հարսը եւ նրա ընկերակիցների հետ միասին մտնելու էր հարսանիքի սրահ, որպէսզի այնտեղ շարունակէին ուրախութիւնն ու խրախճանքը: 

Ուրախութեան մասնակից դառնալու եւ հարսանեկան սրահ մտնելու գաղտնիքը կայանում էր արթուն եւ պատրաստ լինելու արարքում: Որովհետեւ հարսանեկան սրահ մտնելուց յետոյ փեսան ընդմիշտ փակելու էր դուռը եւ բնաւ նորից չէր բացելու: Ուստի անհրաժեշտ պահանջքը այն էր, որ մինչ կոյսերը հարսի հետ միասին սպասում էին փեսային գալուստին, իմաստութիւնն ունենալու էին նախապէս իրենց ճրագների համար յաւելեալ իւղ ապահովելու, որպէսզի եթէ պատահէր որ շատ ուշ ժամին գար փեսան, ապա դժւարութեան չմատնւէին, իրենց ճրագների համար իւղի սպառումի ու պակասումի պատճառով: Որովհետեւ կէս գիշերից յետոյ եթէ փորձէին ձէթ կամ իւղ գնելու եւ ապահովելու համար խանութպան փնտռել, վստահաբար ժամանակի անյարմարութեան եւ ուշ լինելու պատճառով չպիտի կարողանային այն գտնել, նաեւ չպիտի յաջողւէին փեսային դիմաւորելու գնալ եւ իրեն հետ հարսանեկան սրահ մուտք գործել: Իրենց անհոգութեան, անփութութեան եւ անտարբերութեան պատճառով սրահից դուրս մնալով դատապարտւելու էին խաւարում լացելու, տառապելու եւ իրենց ատամները կրճտեցնելու: 

Յիմար եւ իմաստուն կոյսերի առակով Յիսուս մեզ սովորեցնում է իմաստութեամբ, արթնութեամբ եւ զգաստութեամբ ապրել մեր երկրաւոր կեանքը, միշտ ակնկալութեամբը Քրիստոսի երկրորդ գալուստին, որովհետեւ ոչ ոք չգիտի ո՛չ օրը եւ ոչ էլ ժամը: Դրա համար պէտք է լաւագոյն կերպով արժեւորենք թէ ժամանակը, թէ աստւածային շնորհքներն ու պարգեւները եւ թէ մեր փրկութեան համար մեզ ընձեռւած բոլոր առիթներն ու պատեհութիւնները, յատկապէս հաւատքով ու առաքինութիւններով լեցուն կեանք ապրելը: 

Այսօրւայ աշխատանքը, պարտաւորութիւնը, պարտականութիւնը, հաւատքի, սիրոյ, ներողամտութեան, ծառայութեան, ապաշխարութեան, զղջումի, խոստովանութեան, ինքնընծայման, զոհողութեան, աստւածպաշտութեան, եղբայրսիրութեան եւ բարեգործութեան արարքները երբեք վաղւան մի՛ թող, մի՛ յետաձգիր մի՛ ուշացնիր: Կեանքումդ քեզ տրւած, վստահւած ու յանձնւած պարտականութեան նկատմամբ բնաւ անհոգ ու անտարբեր մի՛ գտնւիր, յատկապէս քո հոգու փրկութեան եւ յաւիտենական կեանքի գծով թոյլ, անզգայ, անփոյթ եւ անպատասխանատու մի եղիր: Որովհետեւ այսօրւան լուրջ եւ պատասխանատու մօտեցումիցդ է կախեալ ապագայի յաւիտենական ուրախութիւնդ ու հանգիստդ կամ յաւիտենական դատապարտութիւնդ ու կորուստդ:      

Այս խորհրդաւոր ու խորհրդանշական օրւայ առիթով, թւականիս երեքշաբթի 22 մարտի երեկոյեան ժամը 6-ին Թեհրանի բոլոր եկեղեցիներում տեղի ունեցաւ տասը կոյսերի նւիրւած յիշատակի արարողութիւնը: Ս. Սարգիս առաջնորդանիստ մայր եկեղեցում արարողութեան նախագահեց ու հանդիսապետեց Թեմիս առաջնորդ Գերշ. Տ. Սեպուհ Ս. Արք. Սարգսեանը եւ յաւուր պատշաճի քարոզեց: Ս. Գրիգոր Լուսաւորիչ, Սրբոց Թարգմանչաց եւ Ս. Աստւածածին եկեղեցիներում արարողութեան մասնակցեցին եւ որւայ առիթով քարոզեցին Գերշ. Տ. Նորայր Ս. Եպս. Աշըգեանը, առաջնորդական փոխանորդ՝ Գերշ. Տ. Մակար Ս. Եպս. Աշգարեանն ու Հոգշ. Տ. Շնորհք Վրդ. Աշըգեանը: 

 

Եկեղեցական արարողութեան ընթացքին առ Աստւած բարձրացւած աղօթքների, շարականների ու աւետարանական ընթերցումների ճամբով Աստծուց իմաստութիւն խնդրւեց, որպէսզի մեր ամբողջ կեանքի ընթացքում իմաստուն կոյսերի օրինակին հետեւելով՝ իբրեւ ճշմարիտ իմաստուն հոգեւոր կոյսերի, կարողանանք հոգով, մարմնով ու մտքով միշտ արթուն, զգաստ ու պատրաստ լինել դիմաւորելու համար երկնաւոր Փեսային՝ մեր Տիրոջ ու Փրկչին Յիսուսի Քրիստոսի եւ իրեն հետ հարսանեկան սրահ՝ այսինքն երկնային արքայութիւն մուտք գործելով՝ արժանի դառնանք վայելելու դարեր առաջ մեզ խոստացւած աստւածային յաւիտենական հանգիստն ու անվախճան ուրախութիւնը: Եւ քաւ լիցի, որ յիմար կոյսերին նմանւելով՝ զրկւենք յաւիտենական ուրախութիւնից եւ դուրս մնալով Երկնաւոր Փեսային ահաւոր եւ էութիւն ցնցող մերժողական պատասխանը հնչի մեր ականջներին. թէ «իսկապէս որ չեմ ճանաչում ձեզ» (Մտ 25.12): 

Առաջնորդ Սրբազան Հայրը իր քարոզի ընթաքին մեծապէս գնահատեց ու քաջալերեց պատանի պատանուհիներին, որոնք եկել էին մասնակից դառնալու օրւայ արարողութեան եւ հաղորդւելու խորհրդին: Նա ընդհանուր կէտերի մէջ խօսեց ու բացատրութիւն տւեց 10 կոյսերի առակից փոխանցւող հոգեւոր ու բարոյական ուսուցումների ու դասերի մասին, շեշտելով հաւատքի կեանք ապրելու գծով շարունակ արթուն, զգաստ ու պատրաստ լինելու հրամայական անհրաժեշտութիւնը եւ իր խօսքը եզրակացրեց, յիշեցնելով Քրիստոսի հետեւեալ արտայայտութիւնը, թէ «Ունեցողին պիտի տրւի նոյնիսկ աւելիով, իսկ չունեցողից պիտի վերցւի իր ունեցած փոքր բաժինն էլ» (Ղկ 16.29): 

Արարողութիւնից յետոյ եկեղեցիների եկեղեցական խորհուրդները յատուկ նւէրներ էին պատրաստած «գեղեցիկ թեւնոցներ» օրւայ եկեղեցական արարողութեան իրենց մասնակցութիւնը բերած տասը կոյսերը ներկայացնող երեխաներին, որոնք տրւեցին նրանց: Ս. Սարգիս եկեղեցում էլ արարողութիւնից յետոյ երեխաները իրենց ծնողների հետ բարձրացան Առաջնորդարանի դահլիճ, որտեղ տեղւոյն եկեղեցական խորհուրդը հիւրասիրութիւն էր պատրաստած: Ընթացքին երեխաները առիթ ունեցան մտերմիկ զրոյց ունենալ Առաջնորդ Սրբազան Հօրը հետ եւ քաջալերւած նրա հայրական մօտեցումից  ու վարմունքից, մրցակցական ոգով կատարեցին բազում ասմունքներ, մեներգներ ու խմբերգներ: Որի իբրեւ արդիւնք յաւելեալ նւէրներով պարգեւատրւեցին: