ՅԱՅՏԱՐԱՐՈՒԹԻՒՆ


Այսու յայտնում ենք մեր թեմի սիրելի ժողովրդի զաւակներին, որ թեմիս Կրօնական Խորհուրդը երեքշաբթի 9 յունիս 2020-ին գումարեց իր հերթական նիստը նախագահութեամբ թեմիս առաջնորդ Գերշ. Տ. Սեպուհ Ս. Արք. Սարգսեանի եւ մասնակցութեամբ քահանայ հայրերի։ Ժողովին մասնակցում էր նաեւ Քրիստոնէական Դաստիարակութեան բաժանմունքի պատասխանատու՝ Տիկին Շաքէ Եղիայեանը։

Ժողովը նախ լսեց ամփոփ զեկոյցներ քաղաքամասերի եկեղեցական կեանքի մասին, ապա ընթերցւեց Անթիլիասից Կիլիկիոյ Կաթողիկոսութեան Ազգային Վարչութեան Կրօնական Ժողովի նամակը, որով փոխանցում էր ժողովի կողմից առնւած որոշումները կապւած քրիստոնէական դաստիարակութեան, ընկերային ծառայութեան, քահանայից դասընթացքին, միջ-եկեղեցական, դպրեվանքի, տեղեկատւական եւ եկեղեցական արարողութիւններին։

Ժողովը քննարկեց մեր թեմում կատարւող քրիստոնէական դաստիարակութեան հետ առնչւած հարցերը, առցանց եւ դիմատետրային հաղորդումները եւ կարեւորութեամբ շեշտւեց այս աշխատանքի աշխուժացումը. սրա կողքին խօսւեց նաեւ Ամարաս Շաբաթաթերթի վերահրատարակութեան կարելիութեան մասին եւ քրիստոնէական դաստիարակութեան յատուկ կայքէջի անհրաժեշտութեան մասին։

Ընկերային ծառայութեան բնագաւառի մասին խօսելիս շեշտւեց եկեղեցու դերակատարութիւնը նիւթական եւ բարոյական աշխատանքների իրագործման մէջ։ Սրբազան հայրը կարեւորութեամբ թելադրեց քահանայ հայրերին, որ դժւարին այս օրերին, հոգեւոր հայրերը պարտին այցելել իրենց ծուխերը, յատկապէս չքաւոր ընտանիքներին, նրանց զօրացնելու եւ մխիթարելու Աստծու Խօսքով եւ ունեւոր մեր հայորդիներին թելադրելու, որ նիւթական բարեգործութեամբ օգնութեան հասնեն մեր չքաւոր ընտանիքներին եւ բոլոր նրանց, ովքեր համաճարակի պատճառով գործազրկւել են ուղղակի եւ անուղղակի միջոցներով, բոլորին յիշեցնելով Քրիստոսի այն խօսքը, որ ասում է. «Աւելի երջանկաբեր է տալը, քան առնելը» (Գրծ. 20։35)։

Ժողովը որոշեց նաեւ որ յունիս 14-ից Ս. Հաղորդութիւն մատակարարւի ծայրահեղ բծախնդրութեամբ հետեւեալ ձեւով. քահանան Ս. Հաղորդութեան մօտեցող իւրաքանչիւր հաւատացեալի աջ ձեռքի երեսի վրայ կը դնի Ս. Հաղորդութիւնը եւ հաւատացեալն էլ երկիւղածութեամբ այն ճաշակում է։

Հաւատացեալները նախքան հաղորդութիւն ստանալը իրենց աջ ձեռքը հականեխելու են եկեղեցու խորհրդի կողմից տրամադրւած ալքոլով։

Կարեւորութեամբ ուզում ենք յիշեցնել մեր ժողովրդին, որ իւրաքանչիւր հայորդու ֆիզիքական ապահովութիւնն ու առողջութիւնը եկեղեցու եւ ազգի համար շատ էական են. հետեւաբար դիմակ կրելը, ընկերային հեռաւորութեան պահպանումը, յաճախակիօրէն ձեռք լւալն ու մեծաթիւ հաւաքներից հեռու մնալը կարող են երաշխիք լինել համաճարակից պաշտպանւելու։

Այս առիթով ողջունում ենք մեր ժողովրդի բոլոր զաւակներին, բոլորին մաղթում ենք առողջութիւն, յաջողութիւն եւ արեւշատ կեանք լի օրհնութեամբ եւ Աստծու շնորհքներով։

ԴԻՒԱՆ Թ. Հ. Թ. ԿՐՕՆԱԿԱՆ ԽՈՐՀՐԴԻ

9 Յունիս 2020
Թեհրան