Երկուշաբթի 3 փետրւար 2020 թ.-ին Թեմիս Առաջնորդ՝ գերշ. Տ. Սեպուհ Ս. Արք. Սարգսեանը առաջնորդարանի դահլիճում հանդիպեց Թեհրանի Եկեղեցական խորհուրդների ատենապետներ եւ փոխատենապետներին, ի ներկայութեամն Կրօնական խորհուրդի ատենապետ՝ Արժ. Տ. Կոմիտաս Աւ. քհն. Ղարախանեանի եւ քրիստոնէական դաստիարակութեան բաժանմունքի պատասխանատու՝ տկն. Շաքէ Եղիայեանի:

Սրբազան հայրը ողջունեց ներկայութիւնը բոլորի եւ յայտնեց, որ յառաջիկայ ամիսներին մեր առջեւ ունենք մի շարք ազգային եւ կրօնական տօններ, որոնց պէտք է պատրաստւենք եւ պատշաճօրէն տօնենք ինչպէս Ս. Սարգիս զօրավարի տօնը, առաջւորաց պահքը, Սրբոց Ղեւոնդեանց եւ Վարդանանց տօնները ու մեծ պահքը իր կիրակիններով:

Սրբազան հայրը նշեց՝ «Պէտք է մեծ պահքը առիթ լինի մեզ հոգեւոր կեանքի վերանորոգման»:

Այնուհետ ժողովականները եկեղեցոյ արարողական եւ ծիսական կեանքի հետ կապւած հարցեր տւին Սրբազան Հօրը, որոնց պատասխանեց Սրբազան Հայրը:

Վերջում Սրբազան Հայրը թելադրեց, որ եկեղեցական խորհուրդների անդամները պարտ են բոլոր եկեղեցական արարողութիւնների՝ Ս. պատարագ, կիրակնամուտի ժամերգութիւն, պսակ, մկրտութիւն,նշանտուք եւ թաղում ներկայ լինեն:

Ազգային Առաջնորդարանի Հանրային կապ