Երկուշաբթի փետրւարի 1-ին, Սոցիալապէս խոցւածներին օժանդակող ու հովանաւորող միութեան՝ «Էհիա»-ի, ինչպէս նաև Հաշմանդամ մանուկ-պատանիներին հովանաւորող միութեան՝ «Թավանեաբ»-ի գործադիր տնօրէնն ու յիշեալ հաստատութեան հոգեբանն այցելելով Թեհրանի ազգային առաջնորդարան, հանդիպում ու զրոյց ունեցան Թեհրանի հայոց թեմական խորհրդի փոխատենապետ՝ Վարուժ Յովհաննիսեանի և ազգային առաջնորդարանի սոցիալական աշխատող՝ Լինդա Մինասեանի հետ:

Հանդիպման նպատակն էր տեղեկութիւններ փոխանցել այս հաստատութեան աշխատանքների կապակցութեամբ և դրան զուգահեռ նաև ՁԻԱՀ-ի (ایدز) կանխարգելման ուսուցումների նպատակով սեմինարների կազմակերպման ծրագրաւորում կատարել: Նաև հաշմանդամ երեխաներին հովանաւորելու կապակցութեամբ այս հաստատութեան միջոցով տարւող աշխատանքների հետ հայ համայնքին ծանօթացնելու ձևերի շուրջ խորհրդակցութիւն կատարւեց: 

Հանդիպման ընթացքում համագործակցութիւնների ընդլայնման նպատակով որոշումներ ընդունւեցին, որոնցից կարելի է յիշել «Ալիք» օրաթերթի և Թեհրանի հայ մարզա-մշակութային միութիւնների միջոցով այս հաստատութեան աշխատանքի ծանօթացումը, այս հաստատութեան կողմից «Ա. Աւետիսեան» բուժարանին ծառայութիւնների մատուցումը, ՁԻԱՀ-ի (ایدز) ու նաև դրա կանխարգելման հետ ծանօթացման սեմինարներ կազմակերպելը, նաև հաշմանդամ երեխաների համար տարբեր բնագաւառներում այս հաստատութեան մատուցած ծառայութիւններից օգտւելը, որոնցից կարելի է յիշել լոգոպեդիան (گفتار درمانی) , ֆիզիոթերապիա (فیزیوتراپی) և աշխատանքի միջոցով բուժումը (کار درمانی):

Սոցիալապէս խոցւածներին օժանդակող ու հովանաւորող միութիւն-«Էհիա»

Հեռ. 66935533, 66921372, 66935124

Կայքէջ: www.spasdi.ir

Հաշմանդամ մանուկ-պատանիներին հովանաւորող միութիւն-«Թավանեաբ»

Հեռ. 66935533, 66921372, 66935124

Կայքէջ: www.tavanyab.ir