Ուրբաթ 24 եւ կիրակի 26 յունւար 2020-ին Թեհրանի մեր բոլոր եկեղեցիներում առաւօտեան յընթացս սուրբ եւ անմահ պատարագի յատուկ հանդիսաւորութեամբ ընթերցւեց Ն.Ս.Օ.Տ.Տ. Արամ Ա. Կաթողիկոսի պատգամը, որով վեհափառ հայրապետը 2020 տարին անւանակոչում է Յատուկ խնամքի կարօտ հայորդիների տարի։
Սրբոց Թարգմանչաց եկեղեցում վեհափառ հայրապետի կոնդակը ընթերցեց թեմիս առաջնորդ Գերշ. Տ. Սեպուհ Ս. Արք. Սարգսեանը։
Յայտնենք, որ վեհափառ հայրապետը վերջին երկու տասնամեակների իւրաքանչիւր տարին մեր ժողովրդի կեանքի հետ անմիջական կապ ունեցող մի արժէքի կամ մի երեւոյթի է ընծայած, այսպէս անցեալ 2019 տարին նւիրւած էր հայ մամուլին եւ ահա այս տարի վեհափառը մեր ուշադրութիւնը կենտրոնացնում է Յատուկ խնամքի կարօտ հայորդիներին վրայ, ովքեր «ծնունդով թերի, ֆիզիկական, մտային կամ հոգեկան թերութիւն, անկարողութիւն կամ սահմանափակ կարողութիւն ունեցող մարդիկ՝ ի ծնէ կամ հետագայում արկածների հետեւանքով հաշմանդամ դարձած»։
Վեհափառ հայրապետը բնորոշել է ետք յատուկ խնամքի կարօտ հայորդիներին, կարեւորութեամբ հաստատում է որ անոնք ընկերութեան անբաժան մաս են կազմում եւ պետութիւններ, եկեղեցի ու ընկերութիւններ պարտին ամէն տեսակ դիւրութիւններ ստեղծել իրենց հանգիստ ապրելակերպի, շարժումի եւ հնարաւորութեան պարագային նրանց նկատի ունենալ, ներգրաւել մեր ազգային, ընկերային եւ եկեղեցական կեանքում, անհրաժեշտութեան պարագային առանձին կենտրոններ հաստատել նրանց համար եւ զգոյշ լինել որեւէ մի ձեւով զգացնել չտալ խտրականութեան ոգին։
Իր պատգամի վերջաւորութեան վեհափառ հայրապետը կոչ է ուղղում մեր հոգեւոր, պետական, ազգային, բարեսիրական կազմակերպութիւններին, թեմակալ առաջնորդներին եւ ազգային իշխանութեանց մանաւանդ մեր ժողովրդի ունեւոր ազգայիններին, որ իրենց ունեցած նիւթական հնարաւորութիւններից մէկ բաժին յատկացնեն վերոնշեալ վիճակներում գտնւող մեր հայրենակիցներին յատուկ հիմնադրամներ հաստատելով կամ պետական, եկեղեցական ու ազգային կառոյցների միջոցով նիւթապէս օգտակար հանդիսանալով։
Վեհափառ հայրապետը իր պատգամը աւարտում է Մաշտոցի մէջ տեղ գտած բժշկութեան յատուկ աղօթքով, մաղթելով որ մեր Տիրոջ Յիսուս Քրիստոսի պատմած Բարի Սամարացիի առակի մարդու պէս լինենք, այլ խօսքով լինենք Բարի Սամարացիներ մեր ժողովրդի կեանքում։
Ազգային Առաջնորդարանի հանրային կապ
http://www.tehranprelacy.com/news-am/9-content-hy/news-hy/2824-2020012605?tmpl=component&print=1#sigProId615b2710a2