Թեհրանի հայ համայնքի նիւթական եւ անհրաժեշտ գոյքերի նւիրում ջրհեղեղից տուժածներին

Ջրհեղեղի առաջին իսկ օրւանից, որը պատահեց շուրջ երկու ամիս առաջ և որի հետեւանքով տուժեցին Իրանի բազմաթիւ տարածքներ եւ եղան բազմաթիւ զոհեր, Իրանի հայկական համայնքը ինչպէս միշտ, այս անգամ եւս չխնայեց իր կարելին իր հայրենակիցներին օգնելու համար:

Այդ առիթով Թեհրանի հայոց թեմի Թեմական խորհուրդը, հովանաւորութեամբ թեմակալ առաջնորդ՝ գերշ. Տ. Սեպուհ Սարգսեանի, ժամանակին կեանքի կոչեց յանձնախումբ եւ յայտարարեց հաշւեհամար հայրենակիցների նիւթական նպաստը հաւաքելու նպատակով: Միութիւններում եւս կոչ արւեց հայրենակիցներին սանիտարական ապրանքներ եւ կենսապրուստի համար անհրաժեշտ իրեր հաւաքելու նպատակով:

Հաւաքագրւած նիւթական օժանդակութիւնը եւ գոյքերը, տուժած տարածքներ առաքելու նպատակով, կիրակի մայիսի 26-ի երեկոյեան, ազգային առաջնորդարանի դահլիճում Թեհրանի հայոց թեմի առաջնորդ գերշ. Տ. Սեպուհ Ս. արք. Սարգսեանը, նախորդ շրջանի գործող Թեմական խորհրդի ատենապետը եւ յանձնախմբի անդամները լուսաբանումներ փոխանցեցին լրագրողներին:

Սրբազան Հայրն իր ելոյթի ընթացքում ընդգծեց. «Մեր բոլորի պարտականութիւնն է նման բնական աղէտների ժամանակ համագործակցաբար նպաստել աղէտահար զանգւածներին, մեղմացնելու համար նրանց ցաւն ու տառապանքը»: Սրբազան Հայրը նշեց, որ երբ տուժած հայրենակիցներին նպաստելու կոչ ուղղեցինք, մեր հայրենակիցները նկատառելի օգնութիւն ցուցաբերեցին եւ մեծ քանակութեամբ անհրաժեշտ իրեր են հաւաքւել:

Թեմակալ առաջնորդն ընդգծեց. «Հայրենակիցների կողմից Հաւաքւած նիւթական օժանդակութիւնից բացի, ազգային իշխանութեան հետ միասին այս տարի Էֆթարի հանդիպման փոխարէն, որը 20 անընդմէջ տարի է ինչ կազմակերպւում է ի պատիւ պետական այրերի, որոշւեց այդ գումարը եւս յատկացնել այս բարեսիրական նպատակին, նաեւ բարերար պրն. Յովիկ Տէր-Պօղոսեանը միացաւ այս քայլին եւ ինքն էլ իր նիւթական նպաստն է յատկացրել: Իրանահայ այլ բարերարներ, ինչպէս «Յակոբեան» հաստատութիւնը եւ ուրիշներ եւս իրենց նպաստն են բերել»:

Նիւթական գումարը կազմում է 500 միլիոն ռիալ: Օգնութիւնները փոխադրող հսկայ բեռնատարը երկուշաբթի առաւօտեան շարժւեց Խուզիստան նահանգ եւ օգնութիւնները բաժանւելու են «Դաշտէ Ազադեգան» տարածքի գիւղերում: