Թ. Հ. Թեմի պատւիրակութիւնը՝ Թեհրանի Քաղխորհրդի Նիստում

 

Երեքշաբթի,  դեկտեմբերի 26-ի առաւօտեան, Թեհրանի քաղխորհրդի հրաւէրով Թ.Հ.Թ. Առաջնորդ Գերշ. Տ. Սեպուհ Ս. արք. Սարգսեանի գլխաւորած պատւիրակութիւնը, որի կազմում էին Թ.Հ.Թ. Թեմական խորհրդի ներկայացուցիչներ՝ պրն. Վարուժ Յովհաննիսեանը, տկն. Արմինէ Սեթխանեանը և պրն. Զօրիկ Կարապետեանը, Հ.Մ.Ա.Կ.-ի Կենտրոնական վարչութեան նախագահ՝ պրն. Գէորգ Վարդանեանը եւ  Տ. Կոմիտաս քհնյ. Ղարախանեանը, և Ազգային Առաջնորդարանի Հանրային Կապի թղթակիցը, այցելեցին Թեհրանի քաղխորհուրդի շէնք, որտեղ ներկայ գտնւեցին քաղխորհրդի հերթական՝ 33-րդ նիստին:

Քաղխորհրդարանում պատւիրակութեանն ընդունեցին խորհրդի նախագահ՝ Մոհսէն Հաշեմին և անդամները, այնուհետեւ Սրբազան Հայրը, իր հերթին ողջունելով ներկաներին, իր շնորհակալական խօսքերն յայտնեց ընդունելութեան կապակցութեամբ: 

Քաղխորհրդի նախագահը բոլոր ներկաների անունից շնորհաւորեց Սուրբ Ծննդեան և Ամանորի տօների կապակցութեամբ, այնուհետեւ արբազան հօրը առիթ տրւեց ընթերցելու իր պատգամը: 

Յատկանշական է որ, նիստին ներկայ էին մեծ թւով քաղխորհրդարանի անդամներ և  լրագրողներ, որոնք լուսաբանում էին քաղխորհրդի նիստը:

Սրբազան հայրը իր խօսքերում նշեց, որ տօնական այս օրերին աշխարհն առաւել քան երբևէ խաղաղութեան, սիրոյ և հաճութեան կարիքն ունի: Նա Աստծուց աշխարհի, Մերձաւոր Արեւելքի և Իրանի ժողովրդի համար խաղաղութիւն խնդրեց: