Շաբաթ սեպտեմբերի 23-ի առաւօտեան, Սրբազան Հօր եւ Իսլ. խորհրդարանում Թեհրանի եւ հիւսիսային իրանահայութեան պատգամաւորի ներկայութեամբ «Նայիրի-Սողոմոնեան» միջնակարգ դպրոցի զանգով մեկնարկը տրւեց 2017-18 ուսումնական տարեշրջանի:

Աշակերտութեան լիակազմ ներկայութեամբ լեցուն դպրոցի բակը հիւրընկալեց նաեւ Թ. Հ. Թ. Թեմական խորհրդի, ՊԺ-ի եւ Կրթական խորհրդի ատենապետերին, ինչպէս նաեւ ներկայ քահանայ հայրին, ծնողներին, Պատգամաւորական ժողովի անդամներին եւ ուսուցչական կազմին:

Օրւայ առիթով իր օրհնանքի խօսքը բերելով աշակերտներին, Սրբազան Հայրը կարեւորեց հայոց դպրոցի գոյութեան փաստը, կապւած՝ ազգային գիտակցութեամբ ու հայապահպանման գործին եւ նշեց, որ պէտք է յորդորել բոլոր հայ ծնողներին ամուր եւ որակեալ դպրոց ստեղծելու եւ հայ աշակերտի ապագան ապահով դարձնելու համար, չմտածել նրան օտար դպրոց ուղարկելու մասին: 

Առաջնորդը նաեւ ողջունեց դպրոցի նոր տեսչին եւ փոխտեսչին՝ նշանակման համար եւ յոյս յատնեց, որ դպրոցը շարունակելու է նոյն ոգով կրթել եւ դաստիարակել մատաղ սերնդին:

Յիշեցնենք, որ «Նայիրի-Սողոմոնեան» միջնակարգ դպրոցը համալրւել է նոր ուսուցչական կազմով, որին աջակցելու գծով կամաւոր կերպով իրենց աջակցութիւնն են յայտնել համալսարանի դասախօսներ ու փորձառու եւ հեղինակութիւն վայելող ուսուցիչներ: Արժէ նշել նաեւ, որ նախորդ ուսումնական տարեշրջանին դպրոցում ուսողականի 10-րդ աշակերտները գրանցած ցուցանիշով շրջանի առաջատարների ցուցակում են յայտնւել: Դասարան, որն այս տարի համալրւեց օտար դպրոց յաճախող եւս մի քանի հայ աշակերտների վերադարձով: Դպրոցում յաջողւեց նաեւ կեանքի կոչել հաշւապահութեան թեքումով դասարան՝ 10-րդ դասարանցիների համար:

Լուրը քաղւեց «Ալիք» օրաթերթից