Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



Events Calendar

Կրօնական Տօն՝

Saturday, 16 July 2022

«ՏՕՆ ՅԻՍՈՒՍԻ ՏԱՍՆԵՐԿՈՒ ԱՌԱՔԵԱԼՆԵՐԻ ԵՒ ՏԱՍՆԵՐԵՔԵՐՈՐԴ ԱՌԱՔԵԱԼԻ՝ ՊՕՂՈՍԻ»

«ՏՕՆ ՅԻՍՈՒՍԻ ՏԱՍՆԵՐԿՈՒ ԱՌԱՔԵԱԼՆԵՐԻ ԵՒ ՏԱՍՆԵՐԵՔԵՐՈՐԴ ԱՌԱՔԵԱԼԻ՝ ՊՕՂՈՍԻ»

Յիսուս Քրիստոսը՝ իր փրկչական առաքելութիւնը երկրում տարածելու եւ մարդկանց փրկութեան գործը իր լրումին հասցնելու նպատակով, ընտրեց Տասներկու առաքեալներին: Նրանք կոչւեցին առաքեալներ, նւիրեալներ՝ որոնք ուղարկւեցին՝ Աստծու պատւիրանները քարոզելու եւ Ս․ Երրորդութեան անունով մարդկանց մկրտելու, հիւանդներին բժշկելու եւ Աստծու արքայութիւնը տարածելու համար: Քրիստոսը իր նախախնամական հոգատարութեամբ՝ տարբեր պայմաններում թրծեց եւ պատրաստեց նրանց, իրենց ապագայ առաքելութիւնների համար։ Նրանք լսեցին Յիսուսի քարոզները,տեսան Նրա հրաշքները եւ Նրա խաչելութեան ու յարութեան վկան եղան: Քրիստոսը Իր համբարձումից առաջ առաքեալներին ասաց. «Ամէն իշխանութիւն տրւեց Ինձ երկնքում եւ երկրի վրայ : Ինչպէս որ Հայրն Ինձ ուղարկեց, այնպէս էլ Ես ձեզ եմ ուղարկում: Գնացէ՛ք, ուրեմն, եւ բոլոր ժողովուրդներին Իմ աշակերտնե՛րը դարձրէք: Մկրտեցէ՛ք նրանց Հօր, Որդու եւ Սուրբ Հոգու անունով» (Մատթէոս 28:18-19):

Հայ Առաքելական Սուրբ եկեղեցին Քրիստոսի տասներկու առաքեալների եւ Պօղոս առաեալի յիշատակը ոգեկոչում է Վարդավառի Բարեկենդանը կանխող շաբաթ օրը:

1-«Պետրոս առաքեալ» Պետրոս առաքեալը ամենատարեց ու գլխաւորն էր 12 առաքյալների մէջ: Եղբայրն էր Անդրէաս առաքեալի: Երկու եղբայրները ծնունդով Գալիլեացի էին՝ Բեթսայիդա գիւղից, որդիները Յովնան անունով մարդու: Նրանք ձկնորսներ էին: Յիսուսը երբ առաջին անգամ հանդիպեց Պետրոսին, նրան ասաց. «Յովնանի որդի Սիմոն, դու Կեփաս պիտի կոչւես », որ վէմ է նշանակում , Յունարէն՝ Պետրոս: Քրիստոսի կոչով Պետրոսը եղբօր՝ Անդրէասի հետ թողեց ձկնորսութիւնն ու դարձաւ Յիսուսի ամենամօտ երեք առաքեալներից ՝եկեղեցու սիւներից մէկը: Պետրոսի գործը եղաւ այն, որ աստւածային տեսիլքով հեթանոսներին ընդունեց Եկեղեցու գիրկը (Գործք 10): Իր քարոզութեան ճանապարհին Պետրոսն Անտիոքից հասնում է Հռոմ եւ գլխիվայր խաչւելով՝ նահատակւում: Նրա գերեզմանի վրայ հետագայում կառուցւում է Հռոմի Ս. Պետրոս եկեղեցին: Այս մեծ առաքեալի անունով մեզ է հասել Նոր Կտակարանը համալրող երկու նամակ:
2-«Անդրէաս առաքեալ» Պետրոս առաքեալի եղբայրն էր եւ արհեստակիցը: Նա էր, որ Պետրոսին ծանօթացրեց Յիսուսի հետ(Յովհ 1․40): Անդրէաս առաքեալը Կոչւում է «նախակոչ» առաքեալ, քանի որ նա էր, որ Յովհաննէս առաքեալի հետ միասին, առաջինը ծանօթացաւ Յիսուսին եւ հետեւեց Նրան Յովհաննէս Մկրտչի պատւէրով՝ թէ․ «Ահա Աստծու Գառը»: Անդրէաս առաքեալը Հոգեգալուստից յետոյ քարոզել է Փոքր Ասիայում, Թրակիայում, Մակեդոնիայում, Այնուհետեւ, քարոզել է Հռոմում, Բիւզանդիոնում, Հիւսիսային Յունաստանում եւ սկիւթացիների երկրում: Նահատակւել է Բաթրաս քաղաքում՝ X ձեւով խաչի վրայ. խաչ, որն այդ պատճառով կոչւում է Ս. Անդրէասի խաչ:

3-«Յակոբոս առաքեալ» Գալիլեացի ձկնորս՝ Զեբեդէոսի որդին, Յովհաննէս աւետարանչի աւագ եղբայրը: Նրանք Ս. Մարիամ Աստւածածնի ազգականներն էին: Յիսուսը Յակոբոսին եւ Յովհաննէսին տւեց «որոտման որդիներ» մականունը, քանի որ նրանց բնաւորութիւնը շատ բռնկուն էր: Յակոբոսը Պետրոսի եւ Յովհաննէսի հետ կազմում է առաքելական այն եռեակը, որն ամենամտերիմն էր Տէր Յիսուսի հետ՝ Նրա երկրային կեանքի շրջանում: Յակոբոսի մահւան մասին գրւած է Գործք Առաքելոցում (12:1-2): Նրան գլխատել տւեց Հերովդէս Ագրիպպաս Ա թագաւորը Երուսաղէմում: Այս պատճառով Յակոբոսը յայտնի է գլխադիր անւամբ։

4-«Յովհաննէսը» Յակոբոս առաքեալի փոքր եղբայրն էր: Նա ձկնորս էր եւ Յիսուսի երեք պայծառատես՝ հոգեւոր պարզ տեսողութիւն ունեցող եւ ամենամտերիմ առաքեալներից մէկը: Յովհաննէսը չորս Աւետարաններից մէկի, յայտնութեան գրքի եւ երեք կարճ նամակների հեղինակն է: Նա Յիսուսի ամենասիրելի աշակերտն էր: Աւետարանում Յովհաննէսը խոնարհաբար՝ երբեք չի նշել իր անունը, այլ օգտագործել է «Յիսուսի սիրելի աշակերտը» արտայայտութիւնը: Նա տասնւեց տարեկան էր, որ առաքելութեան կանչւեց։ Յիսուսի ձերբակալման գիշերը, նա ականատես է լինում իր վարդապետի չարչարանքներին՝ հաւատարմաբար ուղեկցում է Նրան մինչեւ Գողգոթա, որտեղ Յիսուսը Իր մօրը յանձնում է Յովհաննէսին՝ ասելով․«Սա է քո մայրը», իսկ մօրը ասում է. «Ահա քո որդին»: Յովհաննէս առաքեալը կոչւում է նաեւ սիրոյ առաքեալ, քանի որ խօսքով թէ գործով բոլորից շատ քարոզել է սիրոյ մասին: Յովհաննէսը միակ առաքեալն է, որ չի նահատակւել, այլ վախճանւել է Եփեսոսում, խոր ծերութեան հասակում, խաղաղ պայմաններում, որից երեք օր յետոյ պիտի արժանանար, իր խնամքը վայելած Աստւածամօր պատւին՝ այսինքն վերափոխման։

5-«Մատթէոս» Սկզբնական անունը Ղեւի էր, ապրում էր Կափառնայում քաղաքում եւ արհեստով մաքսաոր էր։ Մի անգամ, երբ Յիսուսն անցնում էր այն մաքսատան մօտով, ուր նստած էր Մատթէոսը, դիմելով նրան, ասում է․«Հետեւիր Ինձ»: Մատթէոսն անմիջապէս, հրաժարւում է ամէն ինչից ու Յիսուսի եւ բազմաթիւ հարկահաւաքների համար իր տանը խնջոյք կազմակերպում: Հոգեգալուստից յետոյ Մատթէոսը քարոզում է նախ Պաղեստինում, ապա Ասորիքում, Պարսից եւ Պարթեւաց երկրներում, այնուհետեւ անցնում է Եթովպիա, ուր՝ նահատակւում է: Հեղինակն է առաջին Աւետարանի:

6-«Բարդուղիմէոս առաքեալ» Հայաստանում քարոզած երկու առաքեալներից մէկն է: Նրա անունը նշանակում է Թոլոմէի որդի։ Նա Յովհաննէսի Աւետարանում յիշատակւած Նաթանայէլն է: Նրան Յիսուսին է ներկայացնում Փիլիպպոս առաքեալը: Երբ Յիսուսը տեսնում է Նաթանայէլին, ասում է. «Ահա մի իսրայէլացի, որի մէջ նենգութիւն չկայ»: Բարդուղիմէսոը ստանում է Նախադաւան առաքեալի կոչումը, քանի որ առաջինն էր աշակերտներից, որ խոստովանեց Քրիստոսի աստւածութիւնը: Հոգեգալուստից յետոյ Բարդուղիմէոսը քարոզում է Եգիպտոսում, Միջագետքում, Պարսից երկրում եւ յետոյ գալիս Հայաստան, ուր՝ նահատակւում է Սանատրուկ թագաւորի հրամանով, Աղբակում: Նրա գերեզմանի վրայ հետագայում կառուցւել է Ս. Բարդուղիմէոս վանքը:

7-«Փիլիպպոս առաքեալ» Յիսուսի առաջին հետեւորդներից էր: Նա է, որ Բարդուղիմէոս առաքեալին բերում է Յիսուսի մօտ: Փիլիպպոսը նոյնպէս Գալիլեայի Բեթսայիդա գիւղից էր: Ս․Գրիգոր Տաթեւացին նրան Նաթանայէլի եղբայրն է համարում։ Հոգեգալուստից յետոյ քարոզել է Յունաստանում, Փոքր Ասիայում եւ խաչելութեամբ նահատակւել Ասորիքի Հիերոպոլիս քաղաքում:
8-«Թովմաս առաքեալ»Աւետարանում ներկայացւում է իբրեւ Քրիստոսի համար մեռնելու պատրաստ քաջարի հետեւորդ, իսկ մի ուրիշ տեղ՝ մէկը, ով Քրիստոսի յարութիւնից յետոյ թերահաւատութիւն է ցուցաբերում Տիրոջ յարութեան նկատմամբ՝ ասելով. «Մինչեւ իմ աչքերով չտեսնեմ Նրան եւ ձեռքս չմտցնեմ նրա խոցւած կողի մէջ, չեմ հաւատայ»: Յիսուսը, յայտնւելով առաքեալներին, դիմում է Թովմասին եւ ասում. «Մատներդ բեր, դիր այստեղ եւ տես ձեռքերս: Ձեռքդ բեր եւ մխիր կողիս մէջ եւ մի եղիր անհաւատ, այլ՝ հաւատացեալ»: Սրան ի պատասխան՝ Թովմասը ծնրադրում ու բացականչում է. «Տէր իմ եւ Աստւած իմ»: Հոգեգալուստից յետոյ Թովմաս առաքեալը քարոզում է Պարթեւաստանում, ապա Հնդկաստանում, ուր նետահարւելով նահատակւում է: Համարւում է Հնդկաստանի առաքեալը:
9-«Թադէոս» առաքեալը Բարդուղիմէոս առաքեալի հետ համարւում է հայոց առաջին լուսաւորիչը: Թադէոսն Աւետարանում յիշւում է մի քանի անունով՝ Յուդա Յակոբեան, Ղեբէոս: Թադէոս առաքեալը գալիս է Եդեսիա՝ Հայաստանի այսօրւայ Ուրֆա մայրաքաղաքը, ուր Քրիստոսի խոստման համաձայն, բժշկում է Աբգար թագաւորին: Ապա անցնում է Արտազ գաւառ, որտեղ այդ ժամանակ գտնւում էր Աբգար թագաւորի քեռորդի՝ Սանատրուկ արքան: Թադէոսի քարոզութեամբ Սանատրուկի դուստր Սանդուխտը հաւատում է Քրիստոսին: Սանատրուկ թագաւորի հրամանով մահապատժի են ենթարկւում եւ Սանդուխտը եւ Թադէոս առաքեալը: Թադէոս առաքեալի գերեզմանը գտնւում է Իրանի տարածքում՝ Ս. Թադէի վանքում:

10-«Յակոբոս Ալփեան» եղբայրն է Մատթէոս աւետարանչի: Յակոբոսն Աւետարանը քարոզել է Պաղեստինում եւ Եգիպտոսում, ուր եւ նահատակւել է:
11-« Սիմոն Կամ Շմաւոն առաքեալ»Մականւել է Նախանձայոյզ կոչումով: Ծնւել է Գալիլիայի Կանա Քաղաքում: Անւանւել է նաեւ Սիմոն Կանանացի: Ըստ յոյն եկեղեցու աւանդութեան` նա էր Կանայի հարսանիքի փեսան: Հարսանիքին Աստւածամօր հետ ներկայ է եղել Յիսուսը եւ գործել առաջին հրաշքը` ջուրը վերածելով գինու: Քարոզել է Աֆրիկայում, Մեծն Բրիտանիայում, Պարսկաստանում, որտեղ եւ նահատակւել է խաչի մահւամբ:

12-«Մատաթիա առաքեալ» Երբ Յուդա Իսկարիովտացին իր սուրբ կոչումից ընկաւ որպէս մատնիչ եւ դաւաճան՝ ինքնասպան եղաւ, Յիսուսի Համբարձումից յետոյ եւ Հոգեգալստից առաջ աղօթական վիճակահանութեամբ Մատաթիան դասւեց տասնմէկ առաքեալների շարքը` որպէս տասներկուերորդը: Նա Յուդայից ցեղից էր: Հետեւել է Քրիստոսին եւ քարոզել է Հրէաստանում եւ Եթովպիայում, որտեղ եւ նահատակւել է քարկոծմամբ:
13- «Պօղոս՝ 13-րդ առաքեալ» Ծնունդով Կիլիկիայի Տարսոն քաղաքից էր, որի համար էլ կոչւել է Տարսոնացի: Հրէական անունը` Սաւուղ (յունական ձեւով` Սօղոս): Հռոմի քաղաքացի էր, կրթութեամբ ու դաւանանքով` փարիսեցի, արհեստով` վրանագործ: Ելնելով հայրենի օրէնքի եւ աւանդոյթի հանդէպ նախանձախնդրութիւնից` հալածել է քրիստոնեաներին, նրանց մատնել աքսորի եւ սպանութեան: Նա մասնակից էր Ստեփանոս Նախավկայի սպանութեանը Դամասկոս մեկնելու ճանապարհին հանդիպել է յարուցեալ Յիսուսին, որը նրան կարգել է հեթանոսների առաքեալ: Յիսուսին որպէս Աստծու Որդի եւ Փրկիչ ընդունելուց յետոյ, Սուրբ Հոգով լցւած, քարոզել է Դամասկոսում, Երուսաղէմում, Անտիոքում, Կիպրոսում, Պամփիւլիայում, Լիւստրիայում (Իկոնիա), Փռիւգիայում, Յունաստանում, Հռոմում եւ այլուր` ենթարկւելով բազում հալածանքների, չարչարանքների, աքսորի, արկածների, եւ բանտարկութեան: Հեղինակ է 14 առաքելական թղթերի: 67 կամ 68-ին, Հռոմում, Ներոն կայսեր օրօք, մարտիրոսական պսակ է ընդունել` գլխատւելով:

 

 
 

ՏՕՆԵՐ

Կրօնական Տօների Օրացոյց


Կիրակի 24 Մարտի 2024;
Ծաղկազարդ

Երկուշաբթի 25 Մարտի 2024;
Աւագ երկուշաբթի

Երեքշաբթի 26 Մարտի 2024;
Աւագ երեքշաբթի

Չորեքշաբթի 27 Մարտի 2024;
Աւագ չորեքշաբթի

Հինգշաբթի 28 Մարտի 2024;
Աւագ հինգշաբթի

Ուրբաթ 29 Մարտի 2024;
Աւագ ուրբաթ

Շաբաթ 30 Մարտի 2024;
Ճրագալոյց

Կիրակի 31 Մարտի 2024;
Սուրբ Յարութիւն կամ Զատիկ

Կիրակի 07 Ապրիլի 2024;
Կրկնազատիկ եւ Աւետումն Սուրբ Կոյս Մարիամ Աստւածածնի

Կիրակի 14 Ապրիլի 2024;
Կանաչ կամ Աշխարհամատրան Կիրակի

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ