Կիրակի, թւականիս փետրւարի 5-ին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց Սրբ. Վարդանանց եկեղեցու խորհրդի ներկայացուցիչներին, ովքեր եկել էին Սրբազան Հօր հովանաւորութիւն եւ օրհնութիւնը խնդրելու Սրբ. Վարդանանց տօնին եկեղեցու անւանակոչութեան տօնակատարութեան կապակցութեամբ:

Հինգշաբթի, փետրւարի 2-ին, Թեմիս Առաջնորդ Գերշ. Տ. Սեպուհ Ս. Արք. Սարգսեանն իր գրասենեակում ընդունեց Իրանի պարալեռնադահուկային «Ֆաջր» միջազգային մրցոյթին մասնակցող Հայաստանի Հանրապետութեան Պարամարզաձեւերի ֆեդերացիայի դահուկորդներ՝ Հայկ Աբգարեան, Ստասիկ Նազարեան, Տիգրան Գրիգորեան եւ Էրիկ Գրիգորեանին, որոնցից երկուսն Արցախեան 44-օրեայ պատերազմի հետեւանքով զինհաշմւած տղաներից են: Այցելուներին ուղեկցում էին Հ. Մ. «Արարատ» Կազմակերպութեան մարզական միութեան ներկայացուցիչները:

Ամէն տարի Առաջաւորաց Պահքին յաջորդող շաբաթ օրը յիշատակւում է Ս. Սարգիս Զօրավարի տօնը։ Սուրբ Սարգիս Զօրավարը կարգւած է համաքրիստոնէական աշխարհի սրբերի դասին եւ պատկանում է սրբոց այն փաղանգին, որոնք Սուրբ Առաքեալների շրջանից սկսեալ մինչեւ 5-րդ դար իրենց հաւատքով եւ արեամբ վկայել են Քրիստոսին եւ ամփոփւել են հայրենի հողում։

Մեր խոր վշտակցութիւնն ու զօրակցութիւնն ենք յայտնում՝ Սիրիայի հայ համայնքին, վերջին երկու օրերին տեղի ունեցած աղէտալի երկրաշարժի հետեւանքով կրած ծանր եւ անվերադարձ մարդկային զոհերի եւ նիւթական վնասների համար:

Այս առիթով, Թեմիս Առաջնորդ Գերշ. Տ. Սեպուհ Ս. Արք. Սարգսեանը հեռաձայնային կապ է հաստատել Իրանի Իսլ. Հանրապետութիւնում հաւատարմագրւած Սիրիայի դեսպան դոկտ. Շաֆիղ Դայուբի նաեւ Բերիոյ Հայոց թեմի առաջնորդ Գերշ. Տ. Մակար Ս. Եպս. Աշգարեանի հետ, նրանց փոխանցելով մեր համայնքի վշտակցութիւնն ու զօրակցութիւնը միանգամայն:

Այս առիթով կոչ ենք ուղղում մեր ժողովրդին՝ զօրակցութեամբ եւ նիւթական օժանդակութեամբ զօրավիգ կանգնելու սիրիահայ համայնքին:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ԹԵՀՐԱՆԻ ՀԱՅՈՑ ԹԵՄԻ

Իսլ. յեղափոխութեան յաղթանակի 44-րդ տարեդարձի ծրագրերի շարանում, հինգշաբթի, փետրւարի 2-ին, համայն Իրանում յարգեցին նահատակների յիշատակը: Այդ առիթով՝ Թեհրանում զրադաշտների գերեզմանատանը կրօնական փոքրամասնութիւնների նահատակների յիշատակին կազմակերպւել էր յարգանքի միջոցառում, որը ի դէպ որպէս կրօնական փոքրամասնութիւնների նահատակների իւրայատուկ միջոցառում համարւում էր 17-րդը եւ ամէն տարի փոքրամասնութիւններից մէկի գերեզմանատանն է կազմակերպւում:

Այսու Թեհրանի մեր հաւատացեալ ժողովրդի զաւակներին յայտնում ենք, որ երեքշաբթի փետրւարի 14-ին, 2023 թ. Տեառնընդառաջ է, այսինքն Տօն Քառասնօրեայ Գալստեանն Քրիստոսի ի Տաճարն:

Այս առիթով, երկուշաբթի փետրւարի 13-ի երեկոյեան ժամը 4-ին, Թեհրանի մեր բոլոր եկեղեցիներում կատարւելու է Տեառնընդառաջի հանդիսաւոր նախատօնակ:

Այսու մեր սիրելի ժողովրդի զաւակներին յայտնում ենք, որ երկուշաբթի, փետրւարի 13-ին, 2023 թ. տօնն է Սրբոց Ղեւոնդեանց քահանայիցն: Սոյն տօնը տօնն է նաեւ քահանայութեան, որով եւ քահանայից: Այս առիթով, երկուշաբթի փետրւարի 13-ին, հանդիսաւոր Ս. եւ Անմահ պատարագ է մատուցւելու Սրբ. Վարդանանց եկեղեցում։

Չորեքշաբթի, յունւարի 25-ին, Կրթական խորհրդի նախաձեռնութեամբ եւ Թեմական խորհրդի հովանաւորութեամբ` Հայ Արհեստաւորների միութեան հիւրընկալ յարկի տակ իրականացաւ Նոր տարւայ առիթով մտերմիկ հանդիպում-հիւրասիրութիւն:

Երեքշաբթի, թւականիս յունւարի 31-ին, Թեմիս Առաջնորդ Գերշ. Տ. Սեպուհ Ս. Արք. Սարգսեանը, Ազգ. Առաջնորդարանի դահլիճում ընդունեց Կրթական խորհրդի փոխատենապետ Կարինէ Բալըքճեանին եւ «Սասուն» մանկապարտէզի տեսչուհի Մադլէն Քեշիշեանին ու Ծնողական խորհրդի անձնակազմին, ովքեր եկել էին Սրբազան Հօր հովանաւորութիւնը եւ օրհնութիւնը խնդրելու յիշեալ մանկապարտէզի հիմնադրման 40-ամեակին նւիրւած նախաձեռնութիւնների կապակցութեամբ:

Կիրակի, 29 յունւար 2023-ին, Թեհրանի հայոց թեմի բոլոր եկեղեցիներում, կիրակնօրեայ Ս. եւ Անմահ Պատարագի ընթացքում, յատուկ հանդիսաւորութեամբ ընթերցւեց Մեծի Տանն Կիլիկիոյ Կաթողիկոսութեան Ն.Ս.Օ.Տ.Տ. Արամ Ա. Վեհափառ Հայրապետի հռչակագիրը՝ 2023 թւականը «Սփիւռքի տարի Բ.» հռչակելու եւ Ինքնաքննութիւնից՝ վերակազմակերպում շեշտաւորելու կապակցութեամբ: