Հինգշաբթի 23 փետրւար 2017-ի առաւօտեան թեմիս առաջնորդ Գերշ. Տ. Սեպուհ Ս. Արք. Սարգսեան առաջնորդարանի իր գրասենեակում ընդունեց Պաղեստինի Զօրակցութեան ի խնդիր Թեհրանում գումարւած երկօրեայ համագումարի մասնակիցներ՝ Լիբանանից երեսփոխան Էմիլ Րահմէ, Լիբանանի Արտաքին Գործոց Նախարարութեան դեսպան Էլի Թըրք եւ Էլ Մայադին հեռուստալիքի գլխաւոր աշխատից եւ «Արեւելեան Զանգակներ» յայտագրի գլխաւոր խմբագիր Ղասան Էլ Շամին։
Հիւրերը յայտնեցին, որ մեր ջերմ փափաքն էր այցելել հայոց առաջնորդարան եւ հանդիպել Առաջնորդ Սրբազան հօր, որի մասին Թեհրանի, Լիբանանի ու Սիրիայի հոգեւորականներն ու մտաւորականները միշտ գեղեցիկ վկայութիւններ են տւել։ Սրբազան հայրը շնորհակալութիւն յայտնեց հիւրերին իրենց արտայայտութիւնների համար շեշտելով, որ ինք եւ Մեծի Տանն Կիլիկիոյ Կաթողիկոսութեան միաբանները խորապէս գիտակցում են Պաղեստինեան հարցի էութեան եւ դրա համար միշտ զօրավիգ են Պաղեստինցի ազնիւ ժողովրդին, իսկ իրանահայ համայնքը, որ հազարաւոր դարերի պատմութիւն ունի Իրանում եղել է անբաժան մասը իրանեան ընկերութեան եւ հայրենիքի, որի զարգացման, ամբողջականութեան պահպանման համար անձնւիրաբար գործել է ու սատարել արւեստի զանազան բնագաւառների ինչպէս, երաժշտութեան, կինոյի, թատրոնի, ճարտարապետութեան, երկրագործութեան, ջրամատակարարման սիստեմների ու տպագրութեան զարգացման։
