Երեքշաբթի՝ փետրւարի 21-ին, ազգային առաջնորդարանի դահլիճում Թեհրանի հայոց թեմի Պատգամաւորական ժողովը շարունակեց փետրւարի 20-ին սկսւած 3-րդ նիստը, նախագահութեամբ թեմիս առաջնորդ Տ. Սեպուհ արք. Սարգսեանի եւ ատենապետութեամբ Ժոզէֆ Մեհրաբեանի: Տէրունական աղօթքից յետոյ ստուգւեց պատգամաւորների թւային պատկերը:

Ստուգման վաւերագրական պատկերը ստանալուն պէս տեղի ունեցաւ Սրբազան Հօր ելոյթը, այնուհետեւ Թ.Հ.Թ. Թեմական խորհրդի նիւթականի պատասխանատու Մինաս Աղանեանսի միջոցով ընթերցւեց նիւթական զեկոյցը, որից յետոյ պատգամաւորներին առիթ տրւեց իրենց լուսաբանական հարցերն ուղղել Թեմական խորհրդին, որոնց համարժէք պատասխաններ տւեց Մինաս Աղանեանսը: Լուսաբանական հարցումներից յետոյ տեղի ունեցաւ ըստ էութեան արտայայտութիւններ, որոնք վերաբերւում էին Թեմական խորհրդի նիւթական եւ բարոյական գործունէութեան զեկուցագրին: Պատգամաւորները իրենց ելոյթներում շնորհակալութիւն յայտնեցին Թեմական խորհրդի երկամեայ լայնածաւալ գործունէութեան համար: Ըստ Էութեան արտայայտութիւններն աւարտւեցին 3-րդ ցանկով: 15 րոպէ դադարից յետոյ ժողովը շարունակւեց քնարկելով Կրօնական խորհրդի գործունէութիւնը:

Թ.Հ.Թ. Պատգամաւորական ժողովի 3-րդ նիստը շարունակւելու է: