Ննջեցեալների մասին ճշմարտութիւնն իմանալու եւ նրանց հետ մեր քրիստոսահիմն հաւատքի եկեղեցաբանական կապը ջերմ, կենդանի ու անխախտ պահելու Աստւածաշնչական թելադրանքից մղւած մեր եկեղեցու Սրբազան հայրերը յատուկ տնօրինումով հինգ մեծ ու գլխաւոր եկեղեցական ու քրիստոնէական տօների յաջորդող օրը յատկացրել են մեր ննջեցեալներին յիշատակելու, նրանց հոգիների համար աղօթք բարձրացնելու եւ Աստծու ողորմութիւնը հայցելու աշխատանքին ու պարտականութեան:

Այդ առիթով, թւականիս շաբաթ 7 յունւարի առաւօտեան ժամը 9:30-ին Թեհրանի Նոր Բուրաստանի Ս. Ստեփանոս մատուռում մատուցւեց մեռելոցի պատարագը ձեռամբ՝ Գերշ. Տ. Մեղրիկ Ս. Եպս. Բարիքեանի:

Պատարագի աւարտին դրսում՝ մատրան դրան առջեւ զետեղւած յատուկ սեղանի շուրջ խմբւած հաւատացեալների ներկայութեամբ կատարւեց ննջեցելոց հոգեհանգստեան արարողութիւնը, նախագահութեամբ՝ Թեմիս Առաջնորդ Գերշ. Տ. Սեպուհ Ս. Արք. Սարգսեանի: Արարողութեան աւարտին Առաջնորդ Սրբազան հայրը քարոզի ճամբով իր խօսքն ուղղեց ներկայ հաւատացեալներին անդրադառնալով ննջեցեալների նկատմամբ մեր ունեցած հոգեւոր պարտականութեան եւ նրանց համար աղօթելու ինչպէս նաեւ աղօթքով մեր կապը նրանց հետ ամուր պահելու հրամայականի մասին:

Արարողութիւնից յետոյ Սրբազան Հայրը բուրաստանում, ներկայ գտնւող Թեհրանի 15-րդ շրջանի քաղաքապետարանի ներկայացուցչի, տեղւոյն ապահովութեան զօրամասի մեծաւորի եւ այլ պատասխանատուների հետ միասին այցելեց մի քանի դամբարաններ ինչպէս նաև Իրան-Իրաք պարտադրեալ պատերազմի նահատակների հաւաքական դամբարան եւ Թեհրան-երեւան Աւիավթարի զոհ գնացածների հաւաքական դամբարանը եւ այնտեղ էլ աղօթք բարձրացրեց նահատակների եւ զոհւածների հոգիներին: Եւ ապա օտար պատասխանատուների հետ միասին, որպէս սիրոյ ու յարգանքի արտայայտութիւն՝ ծաղիկներ զետեղեցին նահատակների շիրիմնաքարերի վրայ:

{gallery}201701/2017011202{/gallery}