Զարմանքով կարդացինք արտասահմանիան քրիստոնէական մի լրատւական կայքում տեղադրւած այն լուրերը, որոնք անտեղի եւ բացարձակապէս ճշմարտութեան չհամապատասխանող տեղեկութիւններ են փոխանցում, կապւած 16-րդ շրջանի Պատգամաւորական Ժողովի ընտրութիւններին։
Յայտնենք, որ թեմիս առաջնորդ Գերշ. Տ. Սեպուհ Ս. Արք. Սարգսեան աւելի քան 27 տարւայ բարեկամութեամբ կապւած է Այաթուլլահ Թասխիրիին, որը շատ յարգւած ու սիրելի մի անձնաւորութիւն է, որի հետ տարբեր առիթներով հանդիպել է եւ շարունակում է հանդիպել, յատկապէս երբ Վեհափառ հայրապետը այցելում է Իրան, որովհետեւ Այաթուլլահ Թասխիրին, իր կարգին, յատուկ սէր եւ յարգանք ունի Վեհափառի հանդէպ եւ փոխադարձաբար:
Սրբազան հօր վերջին այցելութիւնը Այաթուլլահ Թասխիրիին Վեհափառի Իրանի Իսլամական Հանրապետութիւն տալիք այցելութեան առիթով էր եւ հետեւաբար ոչ հեռւից եւ ոչ էլ մօտիկից որեւէ մի առնչութիւն չունէր գաղութում տեղի ունեցող 16-րդ շրջանի Պատգամաւորական Ժողովի ընտրութիւններին։
Ինչ վերաբերում է ընտրութիւններին, դրանք տեղի ունեցան մեր կանոնագրութեան համաձայն նշանակւած Ընտրական Կենտրոնական Յանձնախմբի եւ իր կողմից կեանքի կոչւած Յանձնախմբերի միջոցաւ համագործակցաբար պետական համապատասխան գրասենեակների պատասխանատուների։
Առաջնորդ Սրբազան հայրը առաջին իսկ օրից Ընտրական Կենտրոնական Յանձնախմբին թելադրեց համբերատար, լայնախոհ, անկաշկանդ եւ լաւ տրամադրութեամբ յառաջ տանեն ընտրութիւնները։ Ուրախութեամբ հաստատում ենք, որ Պատգամաւորական Ժողովի ընտրութիւնները տեղի ունեցան առանց որեւէ մէկ լուրջ խոչընդոտի եւ դժւարութեան։ Ընտրական Կենտրոնական Յանձնախումբը իր նախ բանաւոր եւ ապա գրաւոր զեկոյցը ներկայացրեց, յայտնելով, որ մի բողոքագիր է ստացել Մեջիդիէի անկախ ցանկով ներկայացւած թեկնածուների կողմից, սակայն բողոքագրի ժամանակը անցել էր եւ հետեւաբար օրինաւորապէս կարելի չէր ընթացք տալ։
Տօնական այս օրերին աղօթում ենք, որ Աստւած իր օրհնութեամբ ու շնորհքով պայծառացնի մեր կեանքը, խաղաղութիւն պարգեւէ ամբողջ աշխարհին, յատկապէս Իրաքի, Սուրիոյ, Եմէնի եւ բոլոր այն երկրներին, որտեղ խաղաղութիւնն ու սէրը բացակայում են։