Շաբաթ 3 դեկտեմբեր 2016-ին տօնն էր հայոց եկեղեցու հիմնադիր սրբազան առաքեալների՝ Ս. Թադէոսի և Ս. Բարթուղիմէոսի:

Նոյն օրը նաև Ս. Թադէոս և Ս. Բարթուղիմէոս եկեղեցու անւանակոչութեան տօնն է: 

Այս առիթով ուրբաթ, դեկտեմբերի 2-ին, Ս. Թադէոս և Բարթուղիմէոս եկեղեցում մատուցւեց եպիսկոպոսական հանդիսաւոր Ս. և Անմահ Պատարագ, որը մատոյց և յաւուր պատշաճի քարոզեց Թեհրանի հայոց թեմի բարեխնամ առաջնորդ՝ Գերշ. Տ. Սեպուհ Ս. Արք. Սարգսեանը:

Եկեղեցին ողողւել էր հարիւրաւոր հաւատացեալներով, որոնք եկել էին իրենց քրիստոնէական պարտականութիւնը կատարելու իր հիմնադիր առաքեալների հանդէպ, ինչպէս նաև հաղորդւելու աստւածային ներկայութեամբ և մասնակից դառնալու օրւայ խորհրդին:

Սրբազան Հայրն իր քարոզն սկսեց բացատրելով առաքեալների նահատակութեան խորհուրդը և շեշտեց թէ՝ «Մեր ժողովուրդը քրիստոնէութեան համար նաև առաջին նահատակ վկաուհին տւեց՝ Ս. Սանդուխտ կոյսը, որ իր քրիստոնէական հաւատքի համար չարչարւեց և նահատակւեց: Այս նահատակներով սկսւեց նահատակութեան խորհուրդը մեր եկեղեցում. Իրենց նահատակութիւնը մեր եկեղեցու կեանքում յատուկ իմաստ, նշանակութիւն և ինչու չէ նաև զօրութեան աղբիւր է հանդիսացել»:

Առաջնորդ սրբազանը շարունակեց՝ «Մեր ժողովուրդը իր քրիստոնէական հաւատքը վերանորոգելու և վերակենսաւորելու համար ամէն տարի Ս. Թադէոս Առաքեալի նահատակութեան վայրը՝ Թադէի Վանքը գնում է ուխտի: Բայց դժբախտաբար Ս. Բարթուղիմէոս Առաքեալի վանքը, որ ժամանակին մի փառաւոր կառոյց, ուսման, մշակոյթի և գիտութեան կենտրոն է եղել, այս օրերին աւերակ վիճակի մէջ է»:

Մի այլ բաժնում Սրբազան Հայրը աւելացրեց՝ «Քրիստոսի շունչն ընդունողներից մէկը եղաւ մեր ժողովուրդը: Այդ շունչը Սուրբ Հոգու շնորքների նման մեր ժողովրդի զաւակների միտքը լուսաւորեց և իր կեանքն ապրեց առաքեալների կողմից իրենց փոխանցւած Աստւածային շնչով, որը զօրացրեց իր զաւակներին. Մեր ժողովուրդը տեսաւ մահւան ստւերը, բայց չմահացաւ և չվախեցաւ մահից, որովհետև ընդունել էր Քրիստոսի շունչն ու հոգին և դրանով զօրացել ու ամրացել էր»:

Առաջնորդ Սրբազանը վերջում յիշեցրեց՝ «Մարկոսի Աւետարան հետևեալ խօսքը.- Հաւատացեալի համար անկարելի բան չկայ:  Անկեղծ հաւատքը ոչ միայն մեզ ուժ է տալիս և ոչ միայն մեր ախտերից մեզ բժշկում է, մեր աչքերին աւելի լոյս տալիս, այլ նաև մեզ հաղորդակից է դարձնում մեր երկնաւոր հօր՝ Աստծու հետ, և դրանով է, որ մենք ստանում ենք իր շնորհը և մեր դարմանն ու կեանքն ենք ապրում Նրան փառաւորելով»:

Յաւարտ Ս. Պատարագի՝ Ս. Գէորգի մասունքը կրող արծաթեայ աջով, կատարւեց Ջրօրհնէքի արարողութիւնը: Որից յետոյ, հաւատացեալները խուռներամ յառաջ գալով՝ խոր հաւատքով և երկիւղածութեամբ հաղորդւեցին և օրհնւած ջուրն առնելով՝ խաղաղութեամբ մեկնեցին իրենց տները:

{gallery}201612/2016120301{/gallery}