Ժողովրդական Աստւածաշնչական Լսարանների Վերսկսում

Ուրախութեամբ յայտնում ենք մեր ժողովրդի սիրելի զաւակներին, որ Թեմիս բարեխնամ առաջնորդ՝ Գերշ. Տ. Սեպուհ Ս. Արք. Սարգսեանի հրամանով, Կրօնական Խորհրդի որոշումով եւ Քրիստոնէական Դաստիարակութեան Բաժանմունքի համագործակցութեամբ, երկուշաբթի 3 Հոկտեմբերից վերսկսելու ենք 2016-2017 տարեշրջանի ժողովրդական Աստւածաշնչական լսարաններն ու սերտողութիւնները, որը կատարելու է թեմիս առաջնորդական փոխանորդ՝ Գերշ. Տ. Մակար Ս. եպս. Աշգարեանը:

Աստւածաշնչական լսարանները երեք տարբեր քաղաքամասերում տեղի են ունենալու հետեւեալ ժամանակացոյցով.-

1. Սասուն քաղաքամաս՝ Սրբոց Թարգմանչաց եկեղեցում, ամէն երկուշաբթի 

երեկոյեան ժամը 5:30-ին: 

2. Կենտրոն՝ Առաջնորդանիստ Ս. Սարգիս եկեղեցում, ամէն երեքշաբթի 

առաւօտեան ժամը 10:30-ին:

3. Զէյթուն քաղաքամաս՝ Ս. Գրիգոր Լուսաւորիչ եկեղեցում, ամէն չորեքշաբթի

երեկոյեան ժամը 5:30-ին:

Սիրով հրաւիրում ենք բոլորիդ ներկայ գտնւելու ներկայացւելիք լսարաններին եւ հնարաւորինս օգտւելու, լիցքաւորւելու, սովորելու, լուսաբանւելու ու մխիթարւելու մատուցւած Աստւածաշնչական, կրօնական, ծիսական, շարականագիտական, աղօթքի, բարոյական, ընկերային եւ այլ հարցերի մասին մատուցւած ուսուցումներից, ինչպէս նաեւ՝ աւարտին ընձեռնւած հարց-պատասխանի առիթից:

Թ.Հ.Թ Կրօնական Խորհուրդ