Կարիքաւորներին Օժանդակող մարմինն իր աշխատանքների շարանում պաբերաբար այցելութիւններ է կատարում պարսկական ծերանոցներում եւ հոգեբուժական կենտրոններում գտնւող հայ բնակիչներին։

Այս շրջագծում 30 յունւար 2025 թւականին տեղի ունեցաւ այս տարւայ առաջին այցելութիւնը, որն իրականացաւ Քրիստոնէական դաստիարակութեան հոգեւոր պատասխանատու Արժ. Տէր Արիստակէս քհնյ. Շահմիրեանի եւ նոյն յանձնախմբի անդամների ընկերակցութեամբ։

Այցելուների խումբն իր աշխատանքն սկսեց վաղ առաւօտեան ժամերից, այցելելով՝ «Ռազի» հոգեբուժական կենտրոն, «Քահրիզաք» ծերանոց, «Էհսան» հոգեկան ապաստարան եւ վերջում նաեւ «Եաւարանէ Մեհրան» կենտրոն։

Այցելութեան ընթացքին այցելու յանձնախմբի անդամները իրենց բարեմաղթանքներով եւ յուզիչ ու ոգեւորիչ արտայայտութիւններով, ոգեւորութիւն եւ յոյս ներշնչեցին կենտրոներում բնակւող հայրենակիցներին։

Ընթացքում Քահանայ Հայրը իւրաքանչիւրի համար աղօթեց եւ Սուրբ հաղորդութիւն տւեց նրանց իսկ Քրիստոնէական դաստիարակութեան յանձնախմբի կողմից պատրաստւած խաչերը յանձնւեցին, որպէս մնայուն օրհնութիւն եւ բժշկութեան յոյսի լուսաւոր միջոց։

Այդ ընթացքում այցելու պատւիրակութիւնը հանդիպումներ ունեցաւ կենտրոնների տնօրէնութեան եւ պատասխանատուների հետ, որոնց լուսաբանիչ բացատրութիւններով, աւելի ճշգրիտ տեղեկութիւններ փոխանցւեցին յիշեալ կենտրոններում բնակւող անձանց բուժման ընթացքից։

Բարձրեալից հայցում ենք շուտափոյթ ապաքինում բոլորին։

Ազգային Առաջնորդարանի Հանրային Կապ