Կիրակի, թւականիս նոյեմբերի 24-ին, Ս. Գրիգոր Լուսաւորիչ եկեղեցի այցելեցին՝ Թեհրանի քաղաքապետարանի խօսնակ եւ միջազգային կապերի կենտրոնի տնօրէն Աբդոլմոթահար Մոհամադխանին եւ նրան ընկերակցող պատւիրակութիւնը:

Ս. Գրիգոր Լուսաւորիչ եկեղեցում հիւրերին դիմաւորեցին՝ Իրանի Իսլ. Խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թեմական խորհրդի ատենապետ Վարուժ Յովհաննիսեանը եւ նոյն խորհրդի ներկայացուցիչները:

Պատւիրակութիւնը նախ մուտք գործեց եկեղեցի ապա հիւրընկալւեց Եկեղեցու ժողովասրահում:

Հանդիպմանը, Խորհրդարանի Պատգամաւոր՝ պրն. Արա Շահվերդեանը բարի գալուստ մաղթելով, շնորհակալական խօսքեր յայտնեց եւ երախտագիտութեամբ անդրադարձաւ՝ Թեհրանի քաղաքապետ դոկտ. Ալիռեզա Զաքանիի կողմից հայ համայնքի հանդէպ ցուցաբերւած ուշադրութեանը: Պրն. Շահվերդեանը ընդհանուր բացատրութեամբ անդրադարձ ունեցաւ հայահոծ տարբեր քաղաքամասերում իրականացւած աշխատանքներին եւ յատկապէս՝ 3-րդ, 6-րդ, 7-րդ եւ 8-րդ շրջանների նաեւ 14-րդ եւ 15-րդ շրջանների քաղաքապետարանների կողմից ցուցաբերւած աջակցութեանը՝ դպրոցներում եւ եկեղեցիներում նաեւ Հայոց զոյգ գերեզմանատներում իրականացւած շինարարական եւ բարեկարգման ու բարեզարդման աշխատանքների ուղղութեամբ իսկ ապագայ աշխատանքների շրջագծում, որպէս առաջնահերթութիւն մատնանշում ունեցաւ Ս. Աստւածածին եկեղեցու տարածքում առկայ խնդիրներին եւ յոյս յայտնեց, որ այս ուղղութեամբ շուտափոյթ վերահասութիւն տրւի՝ 12-րդ շրջանի քաղաքապետարանի աջակցութեամբ:

Թեհրանի քաղաքապետարանի խօսնակ եւ միջազգային կապերի կենտրոնի տնօրէն Աբդուլմոթահար Մոհամադ խանին գոհունակութիւն յայտնելով այցի կազմակերպման կապակցութեամբ, իր հերթին գնահատեց կրօնական փոքրամասութիւնների եւ ի մասնաւորի հայ համայնքի երկրում կատարած ներդրումները եւ պատրաստակամութիւն յայտնեց հայ համայնքին բոլոր ասպարէզներում աջակցելու ուղղութեամբ: Նա ընդհանուր բացատրութիւն ներկայացրեց քաղաքապետարանին առնչւող աշխատանքների շուրջ եւ այդ շրջագծում ներկայացրեց «شهر من» անւամբ համակարգը, որն ըստ բացատրութեան քաղաքացիների մասնակցութեան եւ քաղաքային ծառայութիւնների մատուցման գործընթացի եւ քաղաքացիների գոհունակութեան գործընթացն ուսումնասիրելու համապարփակ հարթակն է, որով առաջնորդւում է նաեւ քաղաքապետարանի աշխատանքը, հետեւաբար քաղաքացիների ակտիւ մասնակցութեամբ առաւել են սահունացւում՝ աշխատանքների ընթացքը:

Թեմական խորհրդի ատենապետ Վարուժ Յովհաննիսեանը նաեւ իր հերթին շնորհակալութիւն յայտնելով, կարեւորեց տարբեր շրջանների քաղաքապետարանների հետ երկկողմ յարաբերութիւնների ամրապնդումն ու առաւել ընդլայնումը՝ յատկապէս հայահոծ քաղաքամասերում, որտեղ գտնւում են Թեմիս եկեղեցինները, դպրոցները եւ զոյգ գերեզմանատները: Նա անդրադարձաւ նաեւ Ս. Սարգիս եկեղեցուն կից մետրոյի նախագծին խնդրելով, որ նախքան գործադրում կրկին ուսումնասիրւի Եկեղեցու շէնքի անվտանգութիւնը:

Հանդիպման աւարտին յուշանւէրներ յանձնւեցին՝ առ ի շնորհակալութիւն եւ երախտագիտութիւն:

Ազգային Առաջնորդարանի Հանրային կապ