Շաբաթ, 15 յունիս 2024 թւականին, Թեմական խորհրդի հրաւէրով, Ազգ. Առաջնորդարանի դահլիճում հանդիպում կայացաւ Թեհրանում աշխատող միութիւնների ատենապետների հետ:

Հանդիպման հիմնական օրակարգն առնչւած էր ազգային եւ կրօնական առիթներում ու տօնակատարութիւններում մասնակցութեան հետ կապւած հիմնահարցերին եւ մերօրեայ մարտահրաւէրներին, մասնաւորապէս ազգային ու հոգեւոր կեանքում երիտասարդութեան ներգրաւման շարժառիթ եւ հնարաւորութիւնների ստեղծման ժամանակակից ձեւաչափերի մշակման անհրաժեշտութեանը:

Հանդիպման սկզբին, Թեմական խորհրդի ատենապետ ճրտպ. Նորայր Արամեանը իր ատայայտութիւններում ընդգծեց միութիւնների ազգային դերակատարութիւնը եւ առաքելութիւնը, հայ պատանու եւ երիտասարդի հայեցի եւ ազգային առողջ դաստիարակութեան, ազգային ինքնութեան ոգու եւ մշակոյթի պահպանման նկատմամբ հետաքրքրութիւն եւ նախանձախնդրութիւն ստեղծելու, նաեւ աշխատանքներում միջամուխ դարձնելու գործընթացում:

Խորհրդակցութեան ընթացքին արծարծւեցին տեսակէտներ եւ առաջարկներ ապագայ ծրագրերի մշակման վերաբերեալ: Այս ուղղութեամբ ընդգծւեց նպատակասլաց եւ միաժամանակ ժամանակակից քայլեր ձեռնարկելու, համայնքիս ներկայ պայմաններին համապատասխան աշխատանքներ ծաւալելու եւ լուրջ կազմակերպւածութիւն, միասնական ու հաւաքական աշխատանք եւ հետեւողական գործընթաց ունենալու անհրաժեշտութիւնը:

Սոյն հանդիպման նաեւ ներկայ էր Թեմական խորհրդի անդամ՝ պրն. Ռաֆիկ Մելիսէթեանը:

Ազգային Առաջնորդարանի Հանրային կապ