Թւականիս 12-18 մայիսի ժամանակահատւածում Ա.Մ.Ն.ի Ֆիլադելֆիա քաղաքում տեղի ունեցաւ Աստւածաշնչական Ընկերութիւնների Համաշխարհային Ժողովը:

Սոյն ժողովին հրաւիրւել էր նաեւ Թեմիս առաջնորդ՝ Գերշ. Տ. Սեպուհ Ս. Արք. Սարգսեանը, նկատի առած Լիբանանում եւ Հայաստանում Աստւածաշնչային Ընկերութիւնների շրջագծում իր տարած բազմամեայ գործունեայ աշխատանքը: 

Համաժողովի ընթացքին իր ելոյթում Սրբազան Հայրը խօսելով Իրանում ապրող քրիստոնեաների մասին եւ ի մասնաւորի՝ Հայերին, ասաց թէ մենք ազատօրէն կիրառում ենք մեր կրօնական արարողութիւնները եւ կատարում մեր ազգային ու մշակութային տօներն ու ձեռնարկները: Նա նշեց նաեւ, թէ Իրանում մենք մեր ժողովրդին մեր լեզւով Աստւածաշունչ, Նոր Կտակարան եւ կրօնական գրքեր մատուցելու ոչ մի դժւարութիւն չունենք:

Ժողովական օրերի ընթացքում Առաջնորդ Սրբազան Հայրը բազմիցս առիթ ունեցաւ խօսելու Իրանի մասին, շեշտելով որ Իրանում ապրող փոքրամասնութիւնները եւ յատկապէս՝ քրիստոնեաները, վայելում են պետութեան անմիջական հովանաւորութիւնը:

Յատկանշական է իմանալ, որ այս համաժողովին թւով ութ հայեր էին մասնակցում:

Այդ օրերին, թւականիս կիրակի 15 մայիսի առաւօտեան,  Թեմիս առաջնորդ՝ Գերշ. Տ. Սեպուհ Ս. Արք. Սարգսեանը, Հոգեգալուստի տօնի առիթով յաւուր պատշաճի քարոզեց Ֆիլադելֆիոյ Ս. Գրիգոր Լուսաւորիչ եկեղեցում, եւ պատարագից յետոյ հանդիպեց նոյն եկեղեցու հոգեւոր Հովւին, հոգաբարձութեան եւ հաւատացեալ ժողովրդի հետ: 

Յիշեցնենք նաեւ, որ Թեմիս Առաջնորդ Սրբազան հայրը ժողովից յետոյ, թեմակալ առաջնորդների հրաւէրով այցելելու է Հիւսիսային Ամերիկայի Արեւելեան եւ Արեւմտեան Թեմերը, եւ ըստ յարմարւոյն հանդիպումներ է ունենալու: