Երկուշաբթի 25 սեպտեմբեր 2023 թւականին, Թեմական խորհրդի ատենապետ ճրտպ. Նորայր Արամեանի հրաւէրով, կայացաւ՝ Կարիքաւորներին Օժանդակող մարմնի եւ «Գրիգոր Լուսաւորիչ» անւամբ բարեսիրական կենտրոնի միատեղ հանդիպումը, որի ընթացքում խորհրդակցութիւն կատարւեց բարեսիրական բնագաւառում աշխատանքների ընդլայնման եւ դրան նոր թափ տալու կարելիութեան եւ հնարաւոր քայլերի մասին:

Հանդիպմանը ներկայ էին Ի. Իսլ. Հանրապետութեան Խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Կարիքաւորներին Օժանդակող մարմնի անդամներ՝ պրն. Մուշեղ Ծատրեանը, պրն. Հրայր Աբդալեանը, տկն. Իւետ Մատթէոսեանը եւ տկն. Անի Մկրտչեանը, եւ «Գրիգոր Լուսաւորիչ» անւամբ բարեսիրական նորահիմն կենտրոնի անդամներ պարոնայք՝ Վարուժ Յովհաննիսեանը, Քրիստ Արզումանեանը եւ Զօրիկ Կարապետեանը:

Հանդիպման ընթացքում ընդգծւեց միասնական հանդիպումները յաճախակի դարձնելու եւ համադրւած միասնական աշխատանքներ կատարելու կարեւորութիւնը:

Հարկ է նշել, որ նախնական աշխատանքը կենտրոնացած կը լինի «Իմամ Խոմէյնի»-ի անւան օգնութեան կոմիտէի ցանկում չներառւած կարիքաւոր ընտանիքների գրանցման ուղղութեամբ, որը կը նպաստի առաւել դիւրութիւններ ստեղծելու հնարաւորութիւն ունենալուն իսկ ներկայ հանգրւանում, նկատի ունենալով նոր ուսումնական տարեշրջանի վերամուտը, «Իմամ Խոմէյնի»-ի անւան օգնութեան կոմիտէից օժանդակութիւններ ապահովել նիւթական անբարենպաստ պայմաններում գտնւող ընտանիքների դպրոցական աշակերտութեան համար:

Ազգային Առաջնորդարանի Հանրային կապ