Մայիսեան յաղթանակի գաղափարախօսութեամբ տոգորւած շարժւենք Մայիսեան նորանոր յաղթանակների ուղիով:

Այդ գաղափարախօսութիւնից ելնելով հինգշաբթի, մայիսի 25-ի երեկոյեան բանախօսական-գեղարւեստական յայտագրով յագեցած միջոցառում էր կազմակերպւել Հ. Ուս. «Չհարմահալ» միութեան նախաձեռնութեամբ «Յ. Թումանեան» սրահում:

Միջոցառման բացման խօսքով Անի Զաքարեանը ողջունեց ներկաներին, բեմ հրաւիրելով օրւայ բանախօսին: Բանախօս էր հրաւիրւել Տ. Վաղինակ ծ. վրդ. Մելոյեանը: Նա իր ելոյթի ընթացքում անդրադառձաւ Մայիս 28-ի յանգեցած պատմական իրադարձութիւններին: Նա անդրադառնալով հայրենի աշխարհի ներկայ քաղաքական ճգնաժամին կարեւորեց ժողովրդի միասնականութիւնը՝ ընդդէմ սադրիչ իշխանութիւնների:

Միջոցառման գեղարւեստական յայտագրով հանդէս եկան Սերժիկ Միրզայեանի ղեկավարութեամբ «Ուրարտու» երգչախմբի մենակատրաները, իսկ պարային կատարումներով Կարինէ Մանուչերեանի ղեկավարութեամբ «Ակունք» պարային համոյթի սաները: Ներկաները նաեւ ունկնդրեցին ժամանակին Դրոյի-Դրաստամատ Կանայանի հետ տեղի ունեցած հարցազրոյցը:

Միջոցառմանը ներկայ էին՝ Թ. Հ. Թ. Պատգամաւորական ժողովի ատենապետ Վահիկ Աղաքեանը, Թեմական խորհրդի ատենապետ ճրտ. Նորայր Արամեանը, Աւետարանական եկեղեցու հոգեւոր հովիւ Վերապատւելի Միշէլ Աղամալեանը, ԻԻՀ–ում ՀՀ դեսպանութեան մշակութային եւ համայնքային հարցերով խորհրդական Սերգէյ Գրիգորեանը, Թ.Հ.Թ. Թեմական խորհրդի կողմից կեանքի կոչւած Մայիս 28-ի 105-ամեակի մեծարման Կենտրոնական յանձնախմբի նախագահ Ալֆրէդ Քեշիշեանը, ազգային մարմինների ու միութիւնների ներկայացուցիչներ եւ մեծ թւով հանդիսականներ:

Լուրը՝ «Ալիք»-ից