«ՀՈՒՍԿ» հաստատութեան նախաձեռնութեամբ, երկուշաբթի, 1 մայիս 2023 թւականին, դասախօսական երեկոյ էր կազմակերպւել Հ. Ուս. «Չհարմահալ» միութեան «Յովհ. Թումանեան» դահլիճում:

Օրւայ դասախօսներն էին ՀՀ Ազգային ժողովի պատգամաւոր, «Հայաստան» խմբակցութեան անդամ Ասպրամ Կրպէյեանը եւ Ադրբեջանի հարցերով փորձագէտ Անժելլա Էլիբեգովան:

ՀՈՒՍԿ-ի անունից ներկաներին ողջոյնի խօսք ասելով Նայիրի Բալայեանը, հակիրճ գծերով ներկայացրեց դասախօսների կեսագրական տւեալները՝ բեմ հրաւիրելով նրանց, եւ ՀՈՒՍԿ-ի վարչութեան փոխնախագահ Նարբէ Աբուլեանին:

Ասպրամ Կրպէյեանն իր ելոյթի ընթացքում անդրադարձաւ Հայաստանի ներքաղաքական իրավիճակին եւ իշխող օկուպանտ համակարգի ոչ հայրենանպաստ քայլերին, որոնց հետեւանքով այսօր Հայաստանը եւ Արցախը կանգնած են նմանօրինակ լուրջ մարտահրաւէրների եւ ծանր պայմանների առջեւ: Նա կարեւորեց սփիւռքահայութեան եւ ի մասնաւորի իրանահայ համայնքի դերը, եւ մի խօսքով Հայաստան-Սփիւռք միասնական ազգային կամքը, ներկայի անմխիթար իրավիճակը բարեկարգելու եւ հայրենի պետականութիւնը ամուր հիմքերի վրայ դնելու համար: Նա նշեց, որ այսօր այն ինչ իրագործւում է Հայաստանում իշխող համակարգի կողմից չի բխում հայկական պետականութեան շահերից, որովհետեւ չի կարող հայկական պետականութեան շահից բխել՝ Արցախն Ադրբեջանի կազմում տեղաւորելու մոլուցքը, Սփիւռքը պառակտելը, թշնամուց եկող իրական վտանգը չկարեւորելը, եւ սեփական ժողովրդին խաբկանքներով սնելը: Նա վերջում ընդգծեց, որ մենք փոքր ազգ ենք, բայց թոյլ չենք եւ մեծ ռեսուրսներ ունենք Հայաստանում, Արցախում եւ Սփիւռքում, բայց դժբախտաբար չունենք համակարգ, որոնք անվերապահօրէն ստանձնեն պատասխանատւութիւն: Նա կարեւոր համարեց միասնականութիւնը, եւ անզիջում պայքարը բոլոր պառակտողների դէմ:

Օրւայ յաջորդ դասախօս՝ Ադրբեջանի հարցերով փորձագէտ Անժելլա Էլիբեգովան անդրադարձաւ այն արտաքին մարտահրաւէրներին, որոնց դէմ-յանդիման է կանգնած Հայաստանը: Նա անդրադարձաւ Ադրբեջանի այն վտանգաւոր ծրագրին, որի նպատակն է արցախահայութեանը ինտեգրել Ադրբեջանի կազմում եւ նշեց, որ այդ ծրագիրը ուղեկցւում է մի քանի տարբեր մեխանիզմներով, ինչպէս՝ ռազմական, որ տարբեր հանգրւաններում ծաւալւում է խաղաղ բնակչութեան դէմ, երկրորդը՝ հումանիտար ճգնաժամ ստեղծելն է՝ շրջափակելով արցախահայութեանը, իսկ երրորդը՝ տնտեսականը, որ տարբեր միջոցներով փորձում են տնտեսապէս ճնշել ժողովրդին, մի խօսքով Ադրբեջանը տարբեր ոլորտներում ինտենսիւ արշաւ է սկսել արցախահայութեան դէմ: Նա ընդգծեց, որ 90-ականներին թէեւ Արցախի պայմանները ծանր էին, սակայն Հայաստանի պետութիւնը ամէն կերպ փորձում էր նրանց աջակցել, իսկ ցաւօք այսօր նոյնը չէ: Նա կարեւոր մարտահրաւէրը համարեց նաեւ «Զանգեզուրի միջանցք»-ը, որը պահանջում է Ադրբեջանը՝ անդրադառնալով այն քայլերին, որը ձեռնարկել է Ադրբեջանը, ըստ որի՝ միտում է Հայաստանի տարածքով միանալ Նախիջեւանին, Թուրքիային եւ ապագայում Եւրոպային: Էլիբեգովան այս հարցով անդրադարձաւ Իրանի բարիդրացիական մօտեցմանը, եւ հակաիրանական այն քայլերին, որ Ադրբեջանն է կատարում: Դասախօսը գնահատանքով անդրադարձաւ Իրանի բարի կամքի դրսեւորմանը, եւ այս հարցով կարեւոր համարեց իրանահայ համայնքի դերակատարութիւնը:

Դասախօսական ելոյթներից յետոյ ներկաներին առիթ տրւեց հարցումների, իսկ եզրափակիչ խօսքի համար հրաւիրւեց Թեհրանի հայոց թեմի առաջնորդ Տ. Սեպուհ արք. Սարգսեանը: Սրբազան Հայրը գնահատանքով անդրադարձաւ դասախօսների անկեղծ ելոյթներին եւ ընդգծեց, որ ժողովուրդների կեանքում միշտ լինում են դժբախտութիւնները, սակայն կարեւոր համարեց չընկերկելը: Սրբազան Հայրը անհրաժեշտ համարեց հաւատարիմ մնալ ազգային սկզբունքներին, ինքնուրոյնութեանը եւ ազգային պատկանելիութեանը, եւ ընդգծեց, ամուր գիտական տւեալներով պէտք է մեզ զօրացնենք, որպէսզի կարողանանք յաղթել զէնքով, գիտութեամբ եւ գրչով:

Միջոցառմանը ներկայ էին՝ Իրանում ՀՀ դեսպանութեան մշակութային եւ համայնքային հարցերով խորհրդական՝ Սերգէյ Գրիգորեանը, Թ.Հ.Թ. Պատգամաւորական ժողովի ատենապետ Վահիկ Աղաքեանը, Թեմական խորհրդի փոխատենապետ Վահէ Թարոյեանը, Տ. Վաղինակ ծ. վրդ. Մելոյեանը, «Ալիք» հաստատութեան ներկայացուցիչ Սեւան Դանիէլեանը, ազգային մարմինների ու միութիւնների ներկայացուցիչներ եւ հայրենակիցներ:

Լուրը՝ «Ալիք»-ից