ՀՈԳԵՀԱՆԳՍՏԵԱՆ ԱՐԱՐՈՂՈՒԹԻՒՆ՝ ԻՐԱՆ-ԻՐԱՔ ՊԱՐՏԱԴՐԵԱԼ ՊԱՏԵՐԱԶՄԻ ՀԱՅ ՆԱՀԱՏԱԿՆԵՐԻ ՀՈԳԻՆԵՐԻ ԽԱՂԱՂՈՒԹԵԱՆ ՀԱՄԱՐ

Իրանում սրբազան պաշտպանութեան շաբաթւայ առիթով՝ ուրբաթ, թւականիս սեպտեմբերի 23-ին, Ս. Սարգիս եկեղեցում, յաւարտ Ս. Եւ Անմահ պատարագի, տեղի ունեցաւ հոգեհանգստեան արարողութիւն՝ Իրան-Իրաք պարտադրեալ պատերազմի հայ նահատակների հոգիների խաղաղութեան համար։

Կրօնական արարողութեան նախագահեց եւ այդ առիթով քարոզեց Թեմիս Առաջնորդ Գերշ. Տ. Սեպուհ Ս. Արք. Սարգսեանը:

Սրբազան Հայրը քարոզի սկզբին յայտնեց.- «Մարդկային կեանքում ամենաթանկ բանը կեանքն է՝ այն կեանքը, որ Աստւած պարգեւել է մեզ եւ որի համար մենք բոլորս կոչւած ենք այն լաւագոյն կերպով օգտագործելու, տնօրինելու եւ այնպիսի ձեւով ապրելու, որպէսզի Աստծու օրհնութեան եւ շնորհին արժանանայ: Մարդ արարածը տնտես է եւ վերակացու է իրեն տրւած կեանքին եւ այդ կեանքը պիտի արժեւորէ այնպիսի գործերով եւ աշխատանքներով, որ իր համար լինի պատւանդան ապագայ կեանքի: Երբ կեանքը ընծայաբերւում է վեh արժէքներին, այդ արժէքներով փառաւորւում եւ դառնում է նաեւ լծակ յաւիտենական կեանքի»:

Նա շարունակեց.- «Այսօր հոգեհանգստեան արարողութիւն է կատարւելու Իրան-Իրաք պարտադրեալ պատերազմին, անսակարկ նւիրումով իրենց կեանքը տւած նահատակների հոգիների խաղաղութեան համար: Մենք հաւաքւած ենք աղօթելու մեր Իրանեան հայրենիքի խաղաղութեան եւ բարգաւաճման համար եւ մեր պատմական հայրենիքի Հայաստանի ու Արցախի խաղաղ կեանքի գոյաւորման համար»:

Սրբազան Հայրը յայտնեց.- «Իրան-Իրաք պարտադրեալ պատերազմին Իրանի ժողովուրդը կարողացաւ աշխարհին ցոյց տալ, որ ինքը հայրենասէր ժողովուրդ է ու իր հայրենիքն ամեն բանից վեր է դասում եւ այս հասկացողութեամբ ինքը ապրեցաւ գործեց եւ կարողացաւ իր նպատակին հասնել»: Նա յաւելեց.-« Այս օրերին մենք ազգովին ճակատագրական ժամանակահատւածում ենք, բայց այդ չի նշանակում, որ մենք պիտի թուլանանք եւ տկարանանք՝ ընդհակառակը մեր կոչումն է առաւելագոյն բծախնդրութեան եւ պատասխանատւութեան զգացումով գործելու, աշխատելու եւ համատեղ կերպով մեր կեանքը լաւագայուն կերպով տնօրինելու: Երբ հայրենիքի նկատմամբ սէր ունենք, այս սէրը գոյաւորւում է մեր մէջ իբրեւ հաւատաք, կամք եւ նւիրւածութիւն: Երբ մենք սիրով եւ հաւատքով կառչած ենք մեր հայրենիքին, այդ ժամանակ մենք կը կարողանանք յաղթահարել ամէն տեսակ նեղութիւն եւ դժւարութիւն»:

Թեմակալ Առաջնորդն իր քարոզի աւարտին աղօթեց առ բարձրեալն Աստւած, որ Իրան-Իրաք պարտադրեալ պատերազմի ընկած նահատակների հոգիները երկնային խորաններում հանգչեցնէ եւ իրենց ընտանեկան պարագաներին եւ մեզ բոլորին կազդուրէ, զօրացնէ ու աժեւորէ, որպէսզի կարողանանք մեր առաքելութիւնը շարունակենք այս աշխարհի մէջ Աստծոյ փառքի համար եւ մեր հայրենիքի առաջադիմութեան համար:

Սուրբ պատարագին ներկայ էին Ի. Իսլ. Խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թեմական Խորհրդի ատենապետ ճրտպ. Նորայր Արամեանը եւ նոյն խորհրդի ներկայացուցիչներ՝ պարոնայք՝ Հայրիկ Աղանեանը եւ Հայկազ Շիրւանեանը, Ալիք հաստատութեան ներկայացուցիչ՝ պրն. Սեւան Դանիէլեանը, Թեհրան նահանգի Նահատակների եւ անձնուրացների հիմնարկի գերատեսուչ Ասհաբ Քարիմին եւ իրեն ընկերակցող պատւիրակութիւնը, Ազգային Առաջնորդարանի դիւանապետ Զօրիկ Կարապետեանը, Իրան-Իրաք Պարտադրեալ Պատերազմի Հայ Նահատակների եւ Անձնուրացների Արժէքների Պահպանման յանձնախմբի ներկայացուցիչները, նահատակների ընտանիքները եւ նկատառելի թւով հաւատացեալներ:

Արարողութեան աւարտին Ազգային Առաջնորդարանի դահլիճում տեղի ունեցաւ ընդունելութիւն:

Ընթացքում Սրբազան Հայրը հիւրերին ողջունելով յայտնեց, որ նահատակներն առանց կրօնի խտրութեան ազնւագոյն անձեր են, որոնք իրենց կեանքը նւիրել են իրենց հայրենիքին եւ ի խնդիր բարձրագոյն արժէքներին, հետեւաբար ամէն տարի իրենց յիշատակին հոգեհանգստեան արարողութիւն է կատարւում:

Սրբազան Հայրը գնահատելով Թեհրան նահանգի Նահատակների եւ անձնուրացների հիմնարկի գերատեսուչ Ասհաբ Քարիմիի ներկայութիւնը Ազգային Առաջնորդարանում յայտնեց, որ վերջին շաբաթներին Գերմանիայի Քարլսրու քաղաքի մէջ աւելի քան 5 հազար հոգու մասնակցութեամբ կայացած Եկեղեցիների Համաշխարհային Խորհուրդի (Ե.Հ.Խ.) 11-րդ համաժողովին, որտեղ Իրանից մասնակից էին նաեւ Ասորիների եպիսկոպոսը եւ Իսլամական Մշակոյթի եւ Միջազգային Հաղորդակցութեան Կազմակերպութեան ներկայացուցիչ՝ պրն. Ամերին, ընդգծւել է, որ Իրանը ուժեղ եւ յանձնառու երկիր է եւ իր ղեկավարութիւնը նախանձախնդիր է բարւօք յարաբերութիւններում՝ իր հարեւան երկրների հետ:

Հանդիպման ընթացքում Թեհրան նահանգի Նահատակների եւ անձնուրացների հիմնարկի գերատեսուչ Ասհաբ Քարիմին իր գոհունակութիւնը յայտնեց հոգեհանգստեան արարողութեանը ներկայ լինելու համար եւ իր արտայայտութիւնների ընթացքում երախտիքի խօսք ասաց Իրանի անվտանգութեան ու տարածքային ամբողջականութեան ճանապարհին իրենց կեանքը նւիրաբերած հայ նահատակների յիշատակին: Նա նշեց, որ հնարաւորութիւն է ստեղծւելու Խորհրդարանի պատգամաւոր Արա Շահվերդեանի եւ Թեմական խորհրդի ներկայացուցիչների հետ հանդիպումներ ունենալու եւ հայ նահատակների ընտանիքների եւ անձնուրացներին հանդիպելու եւ իրենց դժւարութիւնները հնարաւորինս փարատելու կապակցութեամբ:

Հանդիպման աւարտին Թեմական խորհրդի ատենապետ Նորայր Արամեանն իր ելոյթի ընթացքում անդրադառնալով նահատակների ընտանիքների եւ անձնուրացների դժւարութիւններին, ընդգծեց նրանց նկատմամբ ուշադրութիւն ցուցաբերելու կարեւորութիւնը, ինչն ընդմիշտ Թեմական խորհրդի ուշադրութեան կենտրոնում է եղել եւ այս ուղղութեամբ հարկ է պետական աջակցութիւնը, որը փոխյարաբերութեամբ հնարաւոր կը լինի իրագործել:

Ազգային Առաջնորդարանի Հանրային կապ