Չորեքշաբթի թւականիս յունւար 26-ին, Իրանի Իսլ. Հանրապետութիւնում հաւատարմագրւած Հայաստանի Հանրապետութեան Արտակարգ եւ Լիազօր նորանշանակ դեսպան Արսէն Աւագեանը, իր ազնւափայլ Տիկնոջ եւ դեսպանութեան դիւանագիտական անձնակազմի ընկերակցութեամբ, պաշտօնական այցելութիւն ունեցան Ազգային Առաջնորդարան եւ հանդիպեցին թեմիս Առաջնորդ Տ. Սեպուհ Ս. Արք. Սարգսեանին եւ Ազգային մարմինների ներկայացուցիչներին:

Հանդիպմանը ներկայ էին Պատգամաւորական Ժողովի դիւանի ատենապետ Վահիկ Աղաքեանը, Թեմական խորհրդի ատենապետ ճրտպ. Նորայր Արամեանը եւ փոխատենապետ Վահէ Թարոյեանը, Կրօնական խորհրդի ներիայացուցիչներ՝ Արժ. Տ. Սահակ քհնյ. Խոսրովեանը եւ Արժ. Տ. Գրիգորիս քհնյ. Ներսէսեանը, «Ալիք» օրաթերթի ներկայացուցիչներ պարոնայք՝ Սեւան Դանիէլեանը, Արամ Շահնազարեանը եւ Գառօ Յովհաննիսեանը եւ Ազգաին Առաջնորդարանի դիւանապետ Զօրիկ Կարապետեանը:

Առաջնորդ Սրբազան Հայրը ողջոյնի եւ բարեմաղթանքներից յետոյ, իր հայրական օրհնանքը տւեց դեսպանութեան աշխատանքների նոր շրջանն սկսելու կապակցութեամբ: Սրբազան Հայրը Ազգային Առաջնորդարանը Ազգի տունը համարելով յայտնեց, որ դեսպանութեան անձնակազմը, ցանկացած ժամանակ կարող են կապ հաստատել եւ միասնաբար քննարկել համայնքիս առնչւող յուզիչ հարցերը. Առաջնորդն նաեւ ակնարկեց այն իրողութեան, որ Հայաստանի դեսպանութիւնը, որպէս մեր պատմական Հայաստանի ներկայացուցիչը վայլելում է իր, Ազգային Առաջնորդարանի եւ համայնքիս սէրն ու գուրգուրանքը: Նա յաւելեց, որ Հայաստանը, որպէս պետութիւն մեր պատմանական հայրենիքն է, հետեւաբար որեւէ մէկը նրա նկատմամաբ տածած սէրը մեր սրտից չի կարող հանել: Սրբազան Հայրը նաեւ շեշտեց, որ իրանահայութիւնը, որպէս սփիւռքի մի կարեւոր մասնիկ իր հաստատակամ յարաբերութիւն է պահել Հայաստանում գործող կառավարութիւնների ու իշխանութիւնների հետ, սակայն վերջին տարիներում կատարւող իրադարձութիւնները դժբախտաբար մտահոգութեան առիթ են հանդիսանում հայութեան համար: Ապա յաւելեց, որ մենք, որպէս սփիւռքի մի մասնիկը համոզւած ենք մեր կեանքը այնպէս պիտի ապրենք, որ մեր գործով որոշ չափով զօրացնենք Հայաստանը, որովհետեւ խորապէս հաւատացած ենք, որ Հզօր Հայաստանը կը հզօրանայ հզօր սփիւռքով եւ փախադարձաբար Սփիւռքը կը զօրանայ հզօր Հայաստանով: Սրբազանը Հայրը անդրադառնալով հայ-թուրքական յարաբերութիւններին հաստատեց, որ Հայոց Ցեղասպանութեան հարցը խորապէս կապւած է սփիւռքի գոյութենական էութեան հետ, եւ մենք չենք կարող որեւէ ձեւով այդ չարիքը մտահանել եւ յորդորեց խուսափել այդ իրողութիւնն ուրացողական քայլերից: Նա նաեւ յոյս յայտնեց, որ մի օր պիտի տիրանանք մեր հայրենիքի հողային ամբողջականութեանը:

Պրն. Դեսպանը նաեւ իր հերթին շնորհակալութիւն յայտնեց ընդունելութեան համար եւ միաժամանակ իր ուրախութիւնը յայտնեց Իրանում եւ իրանահայութեան կողքին աշխատելու փաստի առթիւ: Նա իր խօսքերի ընթացքում հաստատեց այն իրողութիւնը, որ երկկողմ յարաբերութիւններում նախապայմաններով ներկայացողը եղել է Թուրքիան եւ յաւելեց, որ ըստ Հայաստանի սահմանադրական դատարանի որոշման Հայոց Ցեղասպանութիւնը անհերքելի եւ անվիճելի խնդիր է, եւ որեւէ անձնաւորութիւն եւ կազմակերպութիւն չի կարող կասկածի տակ դնել այդ իրականութիւնը:Նա նաեւ մատնանշեց այն իրողութեան, որ Հայաստանի բնակչութեան 70 տոկոսը կազմում է Եղեռնից վերպրողների սերունդներից, որոնք իրենց սրտում դեռ կրում են հայրենիքի կարօտն ու ցաւը, ապա յաւելեց այս փաստից ելնելով Հայոց Ցեղասպանութիւնը համահայկական բնոյթ ունենալով հանդերձ անհատական բնոյթ է կրում: Ապա անդրադարձ ունեցաւ Իրան-Հայաստան փոխյարաբերութիւնների կարեւորութեան եւ այդ ուղղութեամբ Իրանահայ համայնքի ներգործօն դերակատարութեան մասին, համայնք, որ կամուրջի դեր է կատարում Իրան-Հայաստան յարաբերութիւններում: Պրն. Դեսպանը իր խօսքի աւարտին յոյս յայտնեց, որ միասնական ուժերով եւ համատեղ ջանքերի արդիւնքում հնարաւոր լինի յաղթահարել դժւարութիւններին:

Հանդիպման ընթացքին Թեմական խորհրդի ատենապետ ճրտ. Նորայր Արամեանը ողջունելով դեսպանին, անդրադարձաւ Հայաստանի ներկայի իրավիճակին եւ յոյս յայտնեց, որ ժողովուրդը վերականգնի իր բարօր կարգավիճակը:

«Ալիք» հաստատութեան ներկայացուցիչ Արամ Շահնազարեանը նաեւ ողջունեց նորանշանակ դեսպանին, ով լաւածանօթ է համայնքին եւ իրանահայ համայնքի կառոյցին: Նա իր խօսքերի ընթացքում անդրադառնալով Հայաստանի պետականութեանը ընդգծեց, որ դա մեզ համար մնայուն արժէք է եւ մենք միշտ նեցուկ ենք պետականութեանը, որպէսզի իր պայքարը մեր թշնամիների դէմ բոլոր ճակատներում յաջողութեամբ պսակւի:

Ազգային Առաջնորդարանի Հանրային Կապ