ՇՆՈՐՀԱՒՈՐԱԿԱՆ ԱՅՑ ՍՐԲԱԶԱՆԻՆ

Երեքշաբթի թւականիս դեկտեմբերի 28-ի առաւօտեան, Սրբազան Հայրն իր գրասենեակում ընդունեց համայնքիս ազգային գործիչներից պրն. Սերոժ Մատթէոսեանին, որն եկել էր Նոր Տարւայ եւ Ս. Ծննդեան եւ Աստւածայայտնութեան տօների առիթով, իր շնորհաւորանքները եւ բարեմաղթանքները փոխանցելու Սրբազան Հօրը: Հանդիպումն առիթ եղաւ խօսելու Հայաստանեան եւ մեր համայնքի իրավիճակի մասին:

Նոյն օրը կէսօրին, Սրբազան Հայրն իր գրասենեակում ընդունեց, «Յակոբեան» ընկերութեան սեփականատէր, տնօրէն ու բարերար Սմբատ Յակոբեանին, որն յատուկ կերպով այցելել էր Սրբազան Հօրը շնորհաւորելու Նոր տարւայ եւ Ս․ Ծննդեան տօները։

Վերոնշեալ հանդիպումներից յետոյ Թեմիս Առաջնորդին այցելեցին Կարիքաւորներին Օժանդակող մարմնի ատենապետ Մուշեղ Ծատրեանն եւ Փոխատենապետ Հրայր Աբդալեանը, ովքեր նաեւ իրենց հերթին շնորհաւորելով մօտալուտ տօնական օրերը, խորհրդակցեցին եւ Սրբազան Հօր տեսակէտը խնդրեցին տօնական օրերի առիթով ընտանիքների այցելութեան կապակցութեամբ:
Սրբազան Հայրը մեծապէս ողջունեց եւ գնահատեց այցելուների այցը եւ իր հերթին փոխադարձ շնորհաւորանքներ փոխանցեց նրանց:

Ազգային Առաջնորդարանի հանրային Կապ