ԱՌՑԱՆՑ ՀԱՆԴԻՊՈՒՄ՝ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍ Ն.Ս.Օ.Տ.Տ. ԱՐԱՄ Ա. ՎԵՀԱՓԱՌ ՀԱՅՐԱՊԵՏԻ ԵՒ ԱԶԳ. ԿԵՆՏՐՈՆԱԿԱՆ ՎԱՐՉՈՒԹԵԱՆ ԴԻՒԱՆԻ ՀԵՏ

Երեքշաբթի թւականիս յուլիսի 27-ի երեկոյեան, Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Ա. Վեհափառ հայրապետի թելադրութեամբ եւ ի շարունակութիւն տնօրինած Կաթողիկոսարան-Թեմ հանդիպումների, Թեմիս Առաջնորդ Գերշ. Տ. Սեպուհ Ս. Արք. Սարգսեանը ընկերակցութեամբ Թեմական խորհրդի ատենապետ՝ ճրտպ. Նորայր Արամեանի առցանց հանդիպում ունեցան Վեհափառ Հայրապետի եւ Ազգ. Կենտրոնական Վարչութեան դիւանի երկու ատենապետների հետ։

Թեմակալ Առաջնորդը որդիական ակնածանքով շնորհակալութիւն եւ երախտագիտութիւն յայտնեց Վեհափառ Հօր, Թեմիս աշխատանքներին, ճգնաժամային պայմանների բերումով դիմագրաււած դժւարութիւններին եւ մարտահրաւէրներին հետեւելու եւ այս առիթն ընծայելու համար։

Սրբազան Հայրը հանդիպման ընթացքում տեղեկութիւններ փոխանցեց ներկայ իրավիճակի նաեւ համավարակի կանխարգելման եւ հետեւանքների յաղթահարման ուղղութեամբ ձեռնարկւած քայլերի մասին։ Թեմակալ Առաջնորդը անդրադառնալով եկեղեցական, կրթական, միութենական եւ հասարակական կեանքին յայտնեց, որ հակառակ անսովոր պայմանների եւ սահմանափակումների, Ազգ. Իշխանութեան ճիշտ տնօրինման եւ համագործակցութեան արդիւնքում յաջողւել է մասամբ պահպանել աշխատանքների բնականոն ընթացքը։

Թեմական խորհրդի ատենապետը նաեւ իր հերթին երախտագիտութիւն եւ շնորհակալութիւն յայտնեց Մեծի Տանն Կիլիկիոյ Ն.Ս.Օ.Տ.Տ. Արամ Ա. Կաթողիկոսին, իր հայրական հոգածութեան համար, որ ցուցաբերում է մեր թեմի ժողովրդի եւ ժողովականութեան նկատմամբ։ Նա անդրադարձաւ Խորհրդի շուրջ երկամեայ գործունէութեան ընթացքում առաջացած երեք աննախադէպ դէպքերին եւ ճգնաժամային պայմաններին նաեւ այդ բոլորին զուգահեռ տիրող տնտեսական սղաճին եւ հակիրճ բացատրութիւններ փոխանցեց իրագործւած շինարարական, կալւածային եւ վարչակազմակերպչական գործունէութեան նաեւ տնտեսական տագնապի ստեղծած կացութիւն ընթացքում իրականացրած մարդասիրական աշխատանքների եւ նիւթական աջակցութիւնների կապակցութեամբ։

Հանդիպման աւարտին Վեհափառ Հայրապետը իր բարձր գնահատանքն յայտնեց Թեմիս Հոգեւոր Առաջնորդին, որը սրտի բաց վիրահատութիւն ունենալով հանդերձ շարունակում է իրեն վստահւած առաքելութիւնը նաեւ գնահատանքով ողջունեց թեմիս ազգային իշխանութեան կողմից իրականացւած աշխատանքները եւ ընդգծելով մարդասիրական աշխատանքների կարեւորութիւնը անհրաժեշտ նկատեց, որ նրանք վերանորոգ թափով շարունակւեն։ Նորին Սրբութիւնը ցաւով անդրադարձաւ բոլոր թեմերում համաճարակին զոհ գնացած համայնքային պատասխանատուներին ու ազգայիններին, ինչպէս նաեւ մեր ժողովրդի զաւակներին եւ շեշտեց, որ անհրաժեշտ է ամբողջութեամբ յարգել Պետական ու առողջապահական պատասխանատուների կողմից կատարւող թելադրութիւնները։

Ազգային Առաջնորդարանի հանրային Կապ