Երեքշաբթի 1 մարտ 2016-ի երեկոյեան թեմիս առաջնորդ Գերշ. Տ. Սեպուհ Արք. Սարգսեան իւրայատուկ հանդիպում ունեցաւ թեմիս կանանց միութիւնների վարչութիւնների հետ։
Սրբազան հայրը ջերմօրէն ողջունեց ազնւափայլ կանանց, շնորհակալութիւն յայտնեց նրանց իրենց ներկայութեան համար եւ ապա խօսեց այս հաւաքի իւրայատկութեան մասին յաւելելով որ այսօրւայ աշխարհի անկանխատեսելի երեւոյթների, իրադարձութիւնների, ինչպէս նաեւ մեր գաղութի կեանքում տեղի ունեցող իրադարձութիւնների ի տես եւ ի լուր չենք կարող անտարբեր մնալ։ Կան բաներ որոնց լուծումը մեր կարողութիւններից վեր է, սակայն կան էլ բաներ, որոնց լուծումը հնարաւոր է իրագործել համատեղ աշխատանքով։
Իր խօսքերի մի այլ բաժնում Սրբազան հայրը դիտել տւեց, որ մենք այսօր ազգովին պատասխանատու ենք մեր նոր սերունդի ազգային եւ քրիստոնէական դաստիարակութեան, իբրեւ միութենականներ պարտաւոր ենք գտնել միջոցներ, որոնցով հետաքրքրութիւն արթնացնենք մեր նոր սերունդի մօտ աւելիով նրանց ներգրաւելու մեր ազգային-եկեղեցական եւ ընկերային կեանքի մէջ, ապա յայտնեց, որ կան գեղեցիկ ու դաստիարակիչ սովորութիւններ, աւանդութիւններ, որոնցից մենք մեզ հեռու ենք պահում, ինչպէս օրինակ Կանանց Համաշխարհային Աղօթքի օր, որ կատարւում է ամէն տարւայ մարտ ամսւայ առաջին ուրբաթ օրը եւ կամ մայրենի լեզւի համաշխարհային օր, որ ընդհանրապէս ամէն տարի փետրւարի մէջ է կատարւում։ Մենք կարող ենք ամէն տարի կազմակերպել ե՛ւ Աղօթքի յատուկ օր ե՛ւ մայրենի լեզւի համաշխարհային օր։
Առաջնորդ Սրբազան հայրը կարեւորութեամբ շեշտեց եկեղեցական տօների եւ աղօթական կեանքի մասնակցելու անհրաժեշտութիւնը, թելադրելով միաժամանակ որ այդ արարողութիւնների յատկապէս պսակի եւ մկրտութեան խորհուրդներին մասնակցեն պատշաճ զգեստներով, հայավայել, քրիստոնէավայել կեցւածքով։
Այնուհետ առիթ տրւեց ներկաներին մասնակցելու ընդհանուր հարցազրոյցին։ Ներկաները նախ իրենց գոհունակութիւնն ու ուրախութիւնը յայտնեցին այս հանդիպման առիթով եւ ապա իրենց կարգին յայտնեցին իրենց մտահոգութիւնները մարդուժի եւ ընդհանրապէս ժողովրդի անտարբերութեան մասին։
Սրբազան հայրը մեծապէս գնահատեց բոլորին եւ ասաց թէեւ մեր թիւը նւազեր է սակայն մեր գործելու կամքը աւելի է զօրացել եւ մենք այսօր ուժեղ եւ զօրեղ ենք որեւէ մէկ ժամանակից աւելի, փաստ՝ խորհրդարանական վերջին ընտրութիւնների մեր ժողովրդի խուռներամ շարքերով մասնակցելն էր։
