Թւականիս դեկտեմբերի 30-ի առաւօտեան, Ազգային առաջնորդարանի դահլիճում Թեմիս Բարեխնամ Առաջնորդ՝ Գերշ․ Տ․ Սեպուհ Արք․ ՍարգսեանՍ րբազան Հօր գլխաւորութեամբ կայացաւ Կրօնական խորհրդի նիստը, որին մասնակցեցին քահանայից դասը եւ եկեղեցական խորհուրդների ատենապետները։

Սրբազան Հայրը սկզբում գոհութիւն յայտնեց Աստծուն եկեղեցու պաշտօնեաների համատեղ հանդիպման համար՝ բոլորին համարելով միեւնոյն ընտանիքի անդամներ։ Նա յաւելեց լիայոյս ենք բոլորս միասին վերանորոգ հաւատքով սկսել գալիք 2021 թւականը․ նաեւ կարեւորեց մեռելոցի արարողութեան հանգստարանում մատուցւող Սուրբ եւ Անմահ Պատարագ եւ հոգեհանգստեան արարողութիւնները՝ որոնց միջոցով աղօթք է բարձրանում առ Աստւած ազգիս՝ յատկապէս Արցախեան պատերազմում նահատակւած եւ համաճարակից զոհւածների հոգու հանգստան համար։

Թեմակալ առաջնորդը համայնքիս յորդորեց հաւաքաբար, տօնական օրերին աղօթել Հայրենիքում եւ Արցախում այրիացած կանանց եւ բազում որբացած հայորդիների մխիթարութեան համար, սատարելով նիւթական միջոցներով, որպէսզի Սրբազան Հօր միջոցով առձեռն փոխանցւի Արցախի Բարեխնամ Առաջնորդ՝ Տ․Պարգեւ Սրբազան Արք․ Մարտիրոսեանին։ Ապա իր հայրական թելադրումով քաջալերեց համաճարակից գոյացած անձկութեան պահերը իմաստաւորել Աստւածաշնչի ընթերցմամբ, աղօթքով եւ ինքնազարգացմամբ ու Պօղոս առաքեալի բառերով, Քրիստոսի ընկալումով նորոգւել, եւ վերանորոգւած դիմաւորել նոր տարին եւ Սուրբ Ծննդեան եւ Աստւածայայտնութեան տօները։

Եկեղեցական եւ կրօնական արարողութիւնների ոլորտում, որոշում ընդունւեց համաճարակի պատճառով բացառւում է «Տնօրհնէքի արարողութիւն»-ը եւ քայանայից այցելութիւնները։ Առաջարկւեց նաեւ որ Ս․Ծննդեան պատարագի աւարտին Առաջնորդարանի դահլիճում քահանայ հայրերի ընկերակցութեամբ կը կատարի Տնօրհնէքի աւանդական արարողութիւն՝ որի տեսագիրը կսփռւի համացանցով։

Աստւածայայտնութեան օրը, ջրօրհնեաց արարողութեան աւարտին, օրհնւած ջուրը եկեղեցու բակում կըբաժանւի յատուկ սրւակներով: Ուրբաթ առաւօտեան, Թեհրանի բոլոր եկեղեցիներում յընթացս Պատարագի կընթերցւի Առաջնորդ Սրբազան Հօր Պատգամը, յունւարի 17-ին մեր բոլոր եկեղեցիներում ընթերցւելու է Մեծի Տանն Կիլիկոյ Կաթողիկոս Ն․Ս․Օ․Տ․Տ Արամ Ա․ Հայրապետի կոնդակը՝ որով 2021 տարին հռչակել է «Արցախի տարի»։

Ազգային Առաջնորդարանի Հանրային կապ