Մուհամէտ մարգարէի ծննդեան տօնի առիթով շնորհաւորում ենք Իսլամական աշխահի մեր եղբայրներին ու քոյրերին եւ յատկապէս իրանի Իսլամական հանրապետութեան քաղաքացի մեր եղբայրներին ու քոյրերին ու երկրի հոգեւոր ու աշխարհիկ ղեկավարութեան եւ բոլորին մաղթում առողջութիւն, յաջողութիւն եւ երկար կեանք։

Կրօնների հիմնադիրները իրենց ուսուցումներով մարդկութեան առաջնորդներն ու լուսաւոր ճանապարհ ցոյց տւողներն են եւ մարդկութիւնը պարտի միշտ յարգալից վերաբերմունք ունենայ նրանց նկատմամբ։ Ոչ միայն այդքան այլ կրօնների նւիրական սրբութիւններն ու նշանները նոյնքան պէտք է զերծ պահւեն անարգական արտայայտութիւններից, արարքներից։

Դժբախտաբար Եւրոպական երկրները, այսինքն աշխարհիկ պետութիւնները իրենք իրենց իրաւունք են տալիս խօսքի ազատութեան պիտակի ներքոյ կրօնների՝ Իսլամի, Քրիստոնէութեան սրբութիւններն արհամարհելու, անարգելու որով առիթ են տալիս տւեալ կրօնների հետեւորդներին իրենց ընդվզումը արտայայտելու փողոց իջնելով։ Թուրքիայի մէջ գործարանատէրերը իրենց շինած կօշիկների տակը Քրիստոնէութեան ամենանւիրական սրբութիւններից մէկի՝ Ս. խաչի նշանն են դրել, աւելին, պատերազմ պատրւակելով, հայ քրիստոնեայ բնակչութեան ու նրա պատմական եկեղեցիները ռմբակոծում ու հրետակոծում է։ Բռնութիւնն ու ահաբեկչութիւնը ճամբայ չեն խաղաղութեան եւ արդարութեան։

Մենք ուզում ենք բոլորին յիշեցնել Քրիստոսի ոսկեայ հետեւեալ խօսքը «Այն ինչ ուզում էք, որ մարդիկ ձեզ անեն, նոյնը դուք արէք նրանց. այս սկզբունքն իր մէջ ամփոփում է օրէնքն ու մարգարէութիւնների ուսուցումները» (Մթ 7։12)։

Աղօթում ենք, որ Աստւած լուսաւորի մարդկութեան միտքն ու աչքերը եւ իմաստութիւն պարգեւէ աշխարհի ղեկավարութեան, որպէսզի հետամուտ լինել խաղաղութեան, եղբայրութեան եւ համատեղ կեցութեան։

ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ

1 Նոյեմբեր 2020